କରୋନା ପାଇଁ ଫିକା ଫିକା ହେବ ଦୁର୍ଗାପୂଜା । କଟକରେ କଟକଣା ଭିତରେ ପାଳନ ହେବ ଦଶହରା । ଝଲସିବନି ପୂଜା ମଣ୍ଡପ, ରହିବନି ଶ୍ରଦ୍ଧାଳୁଙ୍କ ଭିଡ । ନିୟମ ନମାନିଲେ କଡା କାର୍ଯ୍ୟାନୁଷ୍ଠାନ
କନକ ବ୍ୟୁରୋ: କରୋନା ପାଇଁ ଏଥର କଟକଣା ଭିତରେ ହେବ ଦୂର୍ଗାପୂଜା । ସାଜସଜ୍ଜା ହେବନି କି ଲୋକ ଭିଡ ଲାଗିବନି । ବିନା ଗହଳି, ବିନା ସମାବେଶରେ ଏଥର କଟକରେ ପାଳନ ହେବ ଦୁର୍ଗାପୂଜା । ପୂଜା ପାଇଁ ବାରଣ ନାହିଁ ମାତ୍ର ସମାଗମ ଉପରେ ଲାଗିଲା କଣକଣା । ତେବେ କଣକଣା ପରେ ନିୟମ ଭାଙ୍ଗିଲେ କଡା କାର୍ଯ୍ୟାନୁଷ୍ଠାନ ହେବ ବୋଲି କଟକ ଜିଲ୍ଲାପାଳ ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ କରୋନା କଟକଣା ଯୋଗୁଁ ସାରା ରାଜ୍ୟରେ ଗଣେଷ ପୂଜା ବନ୍ଦ ରହିବା ପରେ ଏବେ ବଡ ପ୍ରଶ୍ନ ହେଲା, ଦୁର୍ଗାପୂଜା ଉତ୍ସବ ପାଳନ ହେବ ନା ନାହିଁ । କାରଣ ମାଙ୍କ ପୂଜା ପାଇଁ କଟକ ସମେତ ରାଜ୍ୟର ପ୍ରମୁଖ ଜିଲ୍ଲାମାନଙ୍କରେ ଏବେଠାରୁ ପ୍ରସ୍ତୁତି ଆରମ୍ଭ ହୋଇଯାଇଥାଏ । ତେଣୁ ଦୁର୍ଗାପୂଜା ପାଇଁ ଅନୁମତି ଦେବାକୁ କଟକ ବାଲୁବଜାର ପୂଜା କମିଟି ପକ୍ଷରୁ ହାଇକୋର୍ଟରେ ଆବେଦନ କରାଯାଇଛି । ଏଥିରେ ଦର୍ଶାଯାଇଛି କୋଭିଡ଼ ନିୟମ ପାଳନ କରି ପୂଜା କରାଯିବ । ଦୀର୍ଘ ଦିନର ପରମ୍ପରା ଭଙ୍ଗା ନଯାଉ ।
ରାଜଧାନୀ ଭୁବନେଶ୍ୱରରେ ମଧ୍ୟ ଦୁର୍ଗାପୂଜା କରିବା ପାଇଁ ମନସ୍ଥ କରିଛନ୍ତି ପୂଜା କମିଟି । ସରକାରୀ କଟକଣା ଭିତରେ ଦୁର୍ଗା ପୂଜା କରିବାକୁ ପ୍ରସ୍ତୁତ ଅଛନ୍ତି ସହିଦ ନଗର ଏବଂ ରସୁଲ ଗଡ ପୂଜା କମିଟି । ବଡ କଥା ହେଲା ଯଦି ଚଳିତ ବର୍ଷ ପୂଜା ଅନୁଷ୍ଠିତ ହୁଏ , ତେବେ ପୂଜା କମିଟି ଚାନ୍ଦା ଆଦାୟ କରିବ ନାହିଁ ବୋଲି ସ୍ପଷ୍ଟ କରିଛି । ଏସବୁ ଭିତରେ ଅପେକ୍ଷା ହାଇକୋର୍ଟ କରୋନା କଟକଣା ଭିତରେ ଦୁର୍ଗା ପୂଜା କରିବା ପାଇଁ କଣ ନିଷ୍ପତି ନେଉଛନ୍ତି ।