ବିପଦ ବେଳାରେ ଚିନ୍ତା ବଢ଼ାଇଲା ବିଷ ବେଉସା । ରାଜ୍ୟର୧୩ଟି ଜିଲ୍ଲାରେ ନକଲି ଔଷଧ, ଆଜି ଏକାଧିକ ସ୍ଥାନରେ ଚଢାଉ
କନକ ବ୍ୟୁରୋ: ବିଶ୍ୱାସରେ ବିଷ ଦେଇ ମୁନାଫା ଲୋଭରେ ମଣିଷ ଜୀବନକୁ ବିପଦରେ ଠେଲି ଦେଉଥିବା ଔଷଧ ମାଫିଆଙ୍କ କାରନାମା ସାମ୍ନାକୁ ଆସିବା ପରେ ଓଡ଼ିଶାର କୋଣଅନୁକୋଣରେ ତତ୍ପରତା । କଟକ ଓ ରାଉରକେଲା ପରେ କଳାହାଣ୍ଡି, ଝାରସୁଗୁଡ଼ା, ବଲାଙ୍ଗୀର ଭଳି ଏକାଧିକ ସ୍ଥାନରେ ଚଢ଼ାଇ କରାଯାଇଛି । କଟକ କନିକା ଛକ ମେଡିଲଏଡ୍ ମେଡିକାମେଂଟ ପ୍ରାଇଭେଟ ଲିମିଟେଡ୍ରୁ ଔଷଧ ଆସି ବିକ୍ରି ହୋଇଛି କି? ଯଦି ଆସିଛି କେତେ ଆସିଛି ଓ କୁଆଡେ ଯାଇଛି ତାର ଛାନବିନ୍ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
କରୋନା କାଳରେ ଔଷଧ ଅଭାବର ସୁଯୋଗ ନେଇ ନକଲି ଫାବିପିରାଭିର ଔଷଧ ବିକ୍ରି କରି ରୋଗୀଙ୍କ ଜୀବନ ସହ ଖେଳୁଛନ୍ତି ଡ୍ରଗ୍ସ ମାଫିଆ । ବଡ଼ କଥା ହେଉଛି- ନକଲି ଔଷଧ ଓଡ଼ିଶାର କେତେ ଜାଗାକୁ ଯାଇଛି? ସାଧାରଣ ରୋଗୀଙ୍କ ଉପରେ ଏହାର କ’ଣ ପ୍ରଭାବ ପଡ଼ିଛି? ଏଭଳି ଅନେକ ପ୍ରଶ୍ନ ଉଠୁଥିବା ବେଳେ ଓଡ଼ିଶା ଡ୍ରଗ୍ କଂଟ୍ରୋଲର୍ଙ୍କ କାର୍ଯ୍ୟାଳୟରୁ ସୂଚନା ଦେଇ କୁହାଯାଇଛି ।
– କୌଣସି କୋଭିଡ୍ ହସ୍ପିଟାଲକୁ ଏହି ନକଲି ଔଷଧ ଯିବାର ପ୍ରମାଣ ମିଳିନାହିଁ
– କଟକ କନିକା ଛକ ହୋଲସେଲରଠାରୁ ରାଜ୍ୟର ୧୩ଟି ଜିଲ୍ଲାକୁ ଔଷଧ ଯାଇଛି
– ଖୋର୍ଦ୍ଧା, ଝାରସୁଗୁଡ଼ା, କେନ୍ଦ୍ରାପଡ଼ା, ଭଦ୍ରକ, ବାଲେଶ୍ୱର, ଜଗତସିଂପୁର, ଯାଜପୁର ସମେତ ୧୩ ଜିଲ୍ଲାକୁ ଯାଇଛି
– ସେହିପରି ମଧ୍ୟପ୍ରଦେଶ ଓ ପଶ୍ଚିମବଙ୍ଗକୁ ମଧ୍ୟ ଏହି ନକଲି ଔଷଧ କଟକରୁ ଯାଇଛି
– ଆଉ ୩ ଦିନ ଭିତରେ ନମୂନା ପରୀକ୍ଷା ରିପୋର୍ଟ ଆସିବା ପରେ କାର୍ଯ୍ୟାନୁଷ୍ଠାନ ପ୍ରକ୍ରିୟା ଆରମ୍ଭ ହେବ
କଟକର ଏହି ହୋଲ୍ ସେଲର ସିଧାସଳଖ କମ୍ପାନୀଠାରୁ ଔଷଧ ଆଣୁଥିଲା । ତେବେ ବର୍ତମାନ ସମୟରେ ଏହି ହୋଲସେଲରଙ୍କ ବ୍ୟବସାୟ ଉପରେ କଟକଣା ଲଗାଯାଇଛି । ଏପଟେ ନକଲି ଔଷଧ କାରବାରକୁ ନେଇ ଅନେକ ପ୍ରଶ୍ନ ଉଠୁଥିବା ବେଳେ ପ୍ରତିକ୍ରିୟା ରଖିଛନ୍ତି ସ୍ୱାସ୍ଥ୍ୟମନ୍ତ୍ରୀ ନବ ଦାସ । ସେ କହିଛନ୍ତି, ଅଭିଯୋଗ ଆସିବା ମାତ୍ରେ ଚଢାଉ କରାଯାଇଥିଲା । ନକଲି ଔଷଧ କାରବାରକୁ ବରଦାସ୍ତ କରାଯିବ ନାହିଁ ।
ହିମାଚଳ ପ୍ରଦେଶରେ ତିଆରି ହୋଇ ଏହି ନକଲି ଔଷଧ କଟକ ଆସିଥିଲା । ଆଉ ତନାଘନା ପରେ ଜଣା ପଡ଼ିଲା ୨ଟି ରାଜ୍ୟ ସମେତ ଓଡ଼ିଶାର କୋଣ ଅନୁକୋଣକୁ ଔଷଧ ଯାଇସାରିଥିଲା । ବଡ଼ କଥା ହେଉଛି ବଳକା ନକଲି ଫାଭିଫିରାଭିର୍ ଜବତ ହୋଇଥିବା ବେଳେ ଓଡ଼ିଶାରେ ୯ ପ୍ରକାରର ଔଷଧ ବଂଟନ ହୋଇଥିବା ଜଣାପଡ଼ିଛି ।