ବାତ୍ୟା ‘ଫୋନି’ ସହାୟତା ନାଁରେ ବଡ଼ ଗୁଜବ । ବିକ୍ରି ହେଉଛି ନକଲି ଫର୍ମ, ଠକେଇ ପାଇଁ ବିଛାଯାଇଛି ଜାଲିଆତିର ବୁଢ଼ିଆଣି ଜାଲ ।
କନକ ବ୍ୟୁରୋ : ଫୋନି ସହାୟତା ପାଇଁ ପୁରୀରେ ଅଭାବନୀୟ ପରିସ୍ଥିତି ସୃଷ୍ଟି ହୋଇଛି । ହଜାର ହଜାର ଲୋକ ନାଲି ଓ ଧଳା ରଙ୍ଗର ଫର୍ମ ଫିଲ-ଅପ୍ କରି ଜିଲ୍ଲାପାଳଙ୍କ ଅଫିସ ଆଗରେ ଧାଡି ଲଗାଇଛନ୍ତି । ଆଶ୍ଚର୍ଯ୍ୟର କଥା ହେଉଛି ରାଜ୍ୟ ସରକାର କିମ୍ବା ଜିଲ୍ଲା ପ୍ରଶାସନ ପକ୍ଷରୁ ଏଭଳି ଆବେଦନ ପାଇଁ କୌଣସି ବିଜ୍ଞାପନ ହୋଇନାହିଁ । ତେବେ କେଉଁ ଆଧାରରେ ଏଭଳି ଆବେଦନ କରାଯାଉଛି ତାହା ସ୍ପଷ୍ଟ ହୋଇନାହିଁ । ଏନେଇ ଆମେ ଜିଲ୍ଲାପାଳଙ୍କ ସହ କଥା ହୋଇଥିଲୁ । ସେ ଆନୁଷ୍ଠାନିକ ଭାବେ କୌଣସି ମନ୍ତବ୍ୟ ଦେଇନଥିଲେ ମଧ୍ୟ ଏହା କେବଳ ଏକ ଗୁଜବ ବୋଲି କହିଛନ୍ତି । କିନ୍ତୁ କିଏ ଏହି ଗୁଜବ ସୃଷ୍ଟି କରିଛି ଓ ଏହାର ଉଦ୍ଦେଶ୍ୟ କଣ ତାହା ସ୍ପଷ୍ଟ ହୋଇନାହିଁ ।
Kanak News is now on WhatsApp
Join and get latest news updates delivered to you via WhatsApp
ଫନି ବାତ୍ୟାରେ ଅନେକ କିଛି ହରାଇ ସାରିଥିବା ଲୋକମାନେ ସରକାରୀ ସହାୟତା ପାଇଁ କେତେ ଆତୁର, ପୁରୀ ଜିଲ୍ଲାପାଳ କାର୍ଯ୍ୟାଳୟ ସାମ୍ନାର ଆଜିର ଗହଳି ଏବଂ ଲମ୍ବା ଲାଇନ୍ ହିଁ ପ୍ରମାଣିତ କରୁଛି । ହେଲେ, ଲୋକଙ୍କ ସମସ୍ୟାରୁ ଫାଇଦା ନେବା ପାଇଁ ବିଛାଯାଇଛି ଜାଲିଆତିର ବୁଢ଼ିଆଣି ଜାଲ ।
ବାତ୍ୟା ସହାୟତା ପାଇଁ ବିକ୍ରି ହେଉଛି ନକଲି ଫର୍ମ ! ଧଳା ଫର୍ମ ପାଇଁ ୫ଟଙ୍କା, ନାଲି ଫର୍ମ ପାଇଁ ୧୦ ଟଙ୍କା । ଫନି ବାତ୍ୟାରେ କ୍ଷତିଗ୍ରସ୍ତ ହୋଇଥିବା ଲୋକଙ୍କୁ କ୍ଷତିପୁରଣ ନାଁରେ ଖୋଲାଖୋଲି ହିତାଧିକାରୀଙ୍କୁ ଭକୁଆ ବନାଯାଉଥିବା ଅଭିଯୋଗ ସାମ୍ନାକୁ ଆସିଛି । ପୁରୀ ଜିଲ୍ଲାପାଳଙ୍କ କାର୍ଯ୍ୟାଳୟକୁ ପ୍ରତିଦିନ ହଜାର ହଜାର ଲୋକ ଧାଇଁ ଆସୁଥିବା ଦେଖି, ଠକେଇର ପସରା ମେଳିଛନ୍ତି ଜେରକ୍ସ ଦୋକାନୀ । ଆଉ ଏହି ସବୁ ଜେରକ୍ସ ଦୋକାନରେ ଗୋଟିଏ ଧଳାଫର୍ମ ୫ ଟଙ୍କାରେ ବିକ୍ରି ହେଉଥିବା ବେଳେ ଗୋଟିଏ ନାଲିଫର୍ମ ୧୦ଟଙ୍କାରେ ବିକ୍ରି ହେଉଛି ।
ରାଜ୍ୟ ସରକାର କିମ୍ବା ଜିଲ୍ଲା ପ୍ରଶାସନ ପକ୍ଷରୁ ଏଭଳି ଆବେଦନ ପାଇଁ କୌଣସି ବିଜ୍ଞାପନ ହୋଇନଥିବା ବେଳେ କେବଳ ଗୁଜବକୁ ଭିତ୍ତି କରି ଚାଲିଛି ଏକ ବଡ଼ ଧରଣର ଠକେଇ । ବର୍ତମାନ ସୁଦ୍ଧା ୧୫ ହଜାର ବାତ୍ୟା ବିପନ୍ନ ଫର୍ମ କିଣି ସାରି ଜିଲ୍ଲାପାଳଙ୍କ କାର୍ଯ୍ୟାଳୟରେ ଆବେଦନ କରିଛନ୍ତି ।
ପୁରା ଘଟଣା ସଂପର୍କରେ ଜିଲ୍ଲା ପ୍ରଶାସନର ମତାମତ ନେବାକୁ ଆମେ ଯେତେବେଳେ ଚେଷ୍ଟା କରିଥିଲୁ । ଜିଲ୍ଲାପାଳ କହିଥିଲେ, ସେଭଳି କୌଣସି ଆବେଦନ ପାଇଁ କୌଣସି ସୂଚନା ଦିଆଯାଇ ନାହିଁ । କିମ୍ବା ବାତ୍ୟା ବିପନ୍ନ ପାଇଁ କୌଣସି ନୂଆ ଆବେଦନ ଗ୍ରହଣ ହେଉନି । ସବୁଠାରୁ ବଡ଼ କଥା ହେଉଛି କାଳିଆ ଯୋଜନା ସମୟରେ ଯେମିତି ଲୋକଙ୍କୁ ଠକିବା ପାଇଁ ଫର୍ମ ବିକ୍ରି ହେଉଥିଲା ଏବେ ବାତ୍ୟା ସହାୟତା ପାଇଁ ଫର୍ମ ବିକ୍ରି କରିବା ଭଳି ସାଂଘାତିକ୍ ଅଭିଯୋଗ ଆସିଛି ।