ସାରୁଅ ଜମି କେଳେଙ୍କାରୀ ମାମଲାରେ ମୁହଁ ଖୋଲିଲେ ଡ୍ରାଇଭର ରବି ସେଠୀ । କହିଲେ, ମନା କରିବା ସତ୍ୱେ ତାଙ୍କ ନାଁରେ କିଣାଯାଇଥିଲା ଜମି
କନକ ବ୍ୟୁରୋ : ସାରୁଅ ଜମି ଦୁର୍ନୀତି ମାମଲାରେ ଆସିଲା ଚାଞ୍ଚଲ୍ୟକର ବୟାନ । ଡ୍ରାଇଭର ରବି ସେଠୀ, ଯାହାଙ୍କ ନାଁରେ ଜମି କିଣାଯାଇଛି ଆଜି ସେ କହିଛନ୍ତି, କିପରି ତାଙ୍କ ନାଁରେ ଜମି କିଣା ଯାଇଥିଲା । ତାଙ୍କ ନାଁରେ ଜମି କିଣିବାକୁ ସେ ମନାକରିଥିଲେ ମଧ୍ୟ କିପରି ତାଙ୍କୁ ଧମକାଇ ଏହି କାରବାର କରାଯାଇଥିଲା ସେ କଥା କହିଛନ୍ତି ରବୀନ୍ଦ୍ର । ସାରୁଅ ଜମି ଅନୁସୂଚିତ ଜାତିର ଲୋକଙ୍କର ହୋଇଥିବାରୁ ତାଙ୍କ ନାଁରେ କିଣା ଯାଇଥିଲା ବୋଲି ସେ କହିଛନ୍ତି । ଏଥିସହ ପୁରୀରେ ମଧ୍ୟ ତାଙ୍କ ନାଁରେ ଜମି କିଣାଯାଇଥିବା ଅଭିଯୋଗ ଆଣିଛନ୍ତି ରବୀନ୍ଦ୍ର ।
Kanak News is now on WhatsApp
Join and get latest news updates delivered to you via WhatsApp
ଖୋର୍ଦ୍ଧା ସାରୁଅ ଜମି ହେରଫେର ଘଟଣାରେ ଓଡିଶା ଇନଫ୍ରାଟେକର ଜଣଙ୍କ ପରେ ଜଣେ ଅଧିକାରୀ ଗିରଫ ହେବା ପରେ ଏବେ ସାମନାକୁ ଆସିଛି ଡ୍ରାଇଭର ରବି ସେଠୀଙ୍କ ଦୋହଲାଇ ଦେବା ଭଳି ବୟାନ । ଇଏ ହେଉଛନ୍ତି ସେହି ରବି ସେଠୀ, ଯାହାଙ୍କ ନାଁରେ ଜମି କାରବାର ହୋଇଥିଲା ।
ରବି ସେଠୀ କହିଛନ୍ତି, ଓଡିଶା ଇନ୍ଫ୍ରାଟେକ୍ ପ୍ରାଇଭେଟ୍ ଲିମିଟେଡ୍ ତାଙ୍କ ନାଁରେ ବେଆଇନ୍ ଭାବେ ସାରୁଅ ଜମି କିଣିଛି । ତାଙ୍କ ନାଁରେ ଜମି କିଣିବା ପାଇଁ କମ୍ପାନୀ କର୍ତୃପକ୍ଷ କହିବା ସମୟରେ ସେ ମନା କରିଥିଲେ । କର୍ତୃପକ୍ଷ ତାଙ୍କ ଚାକିରି ଛଡେଇ ନେବାର ଧମକ ଦେଇ ଜମି କିଣିଛନ୍ତି । ଚାକିରି ଚାଲି ଯିବା ଭୟରେ କମ୍ପାନୀ କର୍ତୃପକ୍ଷ ଯେଉଁଠି କହିଲେ ସେଇଠି ସେ ଦସ୍ତଖତ କରିଥିଲେ । ବେଆଇନ୍ ଜମି କିଣିବା ନେଇ ସେ ଖୋର୍ଦ୍ଧା ଜିଲ୍ଲାପାଳଙ୍କୁ ଲିଖିତ ଆକାରରେ ଅଭିଯୋଗ ମଧ୍ୟ କରିଥିଲେ ।
୨୦୦୦ ମସିହାରୁ ୨୦୧୭ ଯାଏଁ ରବି ସେଠୀ ଓରଟେଲ୍ରେ ଡ୍ରାଇଭର ଭାବେ କାମ କରୁଥିଲେ । ଯେହେତୁ ସାରୁଅ ଜମି ଅନୂସୁଚିତ ଜାତିର ଲୋକଙ୍କର ତେଣୁ ତାଙ୍କ ନାଁରେ କିଣା ଯାଇଛି । ଏବେ ଏ ସମ୍ପର୍କରେ ବୟାନ ଦେଇ ପୁରୀ ଜିଲ୍ଲାରେ ମଧ୍ୟ ତାଙ୍କ ନାଁରେ ଜମି କିଣାଯାଇଛି ବୋଲି କହିଛନ୍ତି ରବି ସେଠୀ ।
ଅନ୍ୟପକ୍ଷରେ ସାରୁଅ ଜମି ଦୁର୍ନୀତି ମାମଲାରେ ଓଟିଭି ସ୍ପଷ୍ଟୀକରଣ ଦେଇ କହିଥିଲା, ସମସ୍ତ ଅଭିଯୋଗର ଠିକ ଭାବେ ତଦନ୍ତ କରାଯାଉ । ଏବଂ ପୋଲିସ ତାଙ୍କ କର୍ମଚାରୀଙ୍କୁ ଅଯଥାରେ ଟାର୍ଗେଟ ନକରୁ । ଏନେଇ ମୁଖ୍ୟମନ୍ତ୍ରୀଙ୍କୁ ନିବେଦନ କରି ଭିଡିଓ ଜାରି କରିଥିଲେ ଜାଗି ପଣ୍ଡା ।