ପାନୀୟ ଜଳ ସୁବିଧା ନଥିବାରୁ ଗାଁର ଜଣେ ଶିକ୍ଷକଙ୍କ ଘରୁ ପାଣି କିଣି ପିଉଛନ୍ତି ଗ୍ରାମବାସୀ । ୪ ବର୍ଷ ହେଲା ଏଭଳି ସମସ୍ୟା ଭୋଗୁଛନ୍ତି ରାୟଗଡ଼ା ଟିକରପଡ଼ା ଗାଁ ଲୋକେ
କନକ ବ୍ୟୁରୋ : ଟଙ୍କା ଦେଲେ ମିଳୁଛି ପାଣି । ଆଦିବାସୀ ଅଧ୍ୟୁଷିତ ରାୟଗଡ଼ା ଜିଲ୍ଲାର ଟିକରପଡ଼ା ଗାଁ ୪ ବର୍ଷ ହେଲା ଏଭଳି ପାଣି କିଣି ପିଉଛନ୍ତି । ପାନୀୟ ଜଳର ସୁବିଧା ନଥିବାରୁ ଗାଁରେ ଥିବା ଜଣେ ଶିକ୍ଷକଙ୍କ ଘରୁ ପାଣି କିଣିବାକୁ ବାଧ୍ୟ ହେଉଛନ୍ତି ଲୋକେ । ଏଥିପାଇଁ ଗୋଟିଏ ପରିବାରକୁ ମାସକୁ ୧୦୦ ଟଙ୍କା ସହ ମାସିକ ବିଦ୍ୟୁତ ବିଲ୍ ଯେତିକି ଆସେ ତାକୁ ମଧ୍ୟ ଗାଁ ଲୋକେ ମିଳି ମିଶି ପୈଠ କରିବା ପାଇଁ ଉକ୍ତ ଶିକ୍ଷକଙ୍କୁ ଟଙ୍କା ପ୍ରଦାନ କରିଥାନ୍ତି । ଟଙ୍କା ପୈଠ ନହେଲେ ଗାଁ ଲୋକଙ୍କୁ ପାଣି ମିଳିନଥାଏ । ପାଣି ସମସ୍ୟା ନେଇ ସରପଂଚ, ସମିତି ସଭ୍ୟ, ବିଭାଗୀୟ ଅଧିକାରୀଙ୍କ ଠାରୁ ଆରମ୍ଭ କରି ଜିଲ୍ଲା ପ୍ରଶାସନ ନିକଟରେ ଯେତେ ଗୁହାରି କଲେ ମଧ୍ୟ କେହି ଶୁଣୁନଥିବା ଗାଁ ଲୋକେ ଅଭିଯୋଗ କରିଛନ୍ତି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଗାଁରେ ୬ଟି ସାହିରେ ପାଖାପାଖି ୧୫୦ରୁ ଉଦ୍ଧ୍ୱର୍ ପରିବାର ବାସ କରୁଥିବା ବେଳେ ଜନସଂଖ୍ୟା ୫୦୦ରୁ ଅଧିକ ରହିଛି । ଗାଁରେ ଗୋଟିଏ ସୋଲାର ପାଇପ ସହ ୪ଟି ନଳକୂପ ରହିଛି । ସୋଲାର ପାଇପରୁ ପର୍ଯ୍ୟାପ୍ତ ପରିମାଣର ପାଣି ବାହାରୁନଥିବା ବେଳେ ଗାଁରେ ଥିବା ନଳକୂପ ଅଚଳ ପଡ଼ିଛି । ଗାଁ ନିକଟରେ ଝଞ୍ଜାବତି ନଦୀ ପ୍ରବାହିତ ହେଉଛି । ହେଲେ ତାହା ବି ବ୍ୟବହାର ଯୋଗ୍ୟ ନୁହେଁ । ତେଣୁ ଲୋକ ମାନେ ବାଧ୍ୟ ହୋଇ ଗାଁରେ ଥିବା ଶିକ୍ଷକଙ୍କ ଘରୁ ପାଣି କିଣି ବ୍ୟବହାର କରୁଛନ୍ତି ।
ପ୍ରତ୍ୟୋକ ଘରକୁ ପାନୀୟ ଜଳ ଯୋଗାଣ ପାଇଁ ଟ୍ୟାପ ଲଗିଛି । ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ପକ୍ଷରୁ ୪୨ ଲକ୍ଷ ୪୬ ହଜାର ଟଙ୍କା ବ୍ୟୟରେ ୫୦ ହଜାର ଲିଟର କ୍ଷମତା ବିଶିଷ୍ଟ ଉନ୍ନତ ଜଳ ଭଣ୍ଡାର ସହ ଦୁଇଟି ବୋରୱେଲ ନିର୍ମାଣ କରାଯାଇଛି । ହେଲେ ବିଦ୍ୟୁତ ସଂଯୋଗ ହୋଇପାରିନଥିବାରୁ ଏହା କାର୍ଯ୍ୟକ୍ଷମ ହୋଇନପାରି ଦୀର୍ଘ ବର୍ଷ ହେଲାଣି ଜରାଜିର୍ଣ୍ଣ ଅବସ୍ଥାରେ ପଡି ଭାଙ୍ଗିରୁଜି ଗଲାଣି । ତେଣୁ ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ସାଧରଣରେ ଦାବି ହୋଇଛି ।