ଏଥର ସାବାଡ ହେବେ ମଦୁଆ । ଘଂଟ ବାଡେଇ ଗ୍ରାମବାସୀଙ୍କ ସତର୍କବାଣୀ । ମଦ ପିଇ ଗାଁକୁ ଆସିଲେ ଗଣିବେ ୨୦ ହଜାର ଟଙ୍କା ଜରିମାନା
କନକ ବ୍ୟୁରୋ : ମଦ ମଣିଷକୁ ନଷ୍ଟ କରିବାର ଏକ ସୁଗମ ପଥ । ନିଶାସକ୍ତ ବ୍ୟକ୍ତି କେବଳ ନିଜର କ୍ଷତି କରିନଥାଏ । ସମାଜକୁ ବି ବିଶୃଙ୍ଖଳିତ କରିବାର ପ୍ରମୁଖ ଭୁମିକା ନିଭାଇଥାଏ । ଏହାସହ ପରିବାର ଭିତରେ କଳହର କାରଣ ମଦ ହୋଇଥାଏ । ଏସବୁରୁ ମୁକ୍ତି ପାଇବାକୁ କେତେ ଯେ ସଚେତନ କେତେ ଉପଦେଶ । ହେଲେ ଦିନକୁ ଦିନ ସମାଜରେ ମଦର ବ୍ୟବହାର ବହୁଳ ହେବାରେ ଲାଗିଛି । ଏହାକୁ ନଜରରେ ରଖି ଅନେକ ସ୍ୱେଚ୍ଛାସେବୀ ସଂଗଠନ ବାରମ୍ବାର ସରକାର ମଦ ବିକ୍ରି ବନ୍ଦ କରନ୍ତୁ ବୋଲି ଦାବି କରୁଛନ୍ତି । ଏହାରି ମଧ୍ୟରେ କିଛି ରାଜ୍ୟ ବି ମଦ ବିକ୍ରି ଉପରେ ନିଶେଧାଦେଶ ଜାରି କରିଛନ୍ତି । ହେଲେ ମଦ ବିକିବା ଲୋକ ଓ ପିଇବା ଲୋକଙ୍କୁ ଏସବୁରେ କିଛି ଫରକ ପଡୁ ନାହିଁ ।
ହେଲେ ପୁରୀ ନିମାପଡା ବ୍ଲକର ବସନ୍ତପୁର ଗ୍ରାମର ଗ୍ରାମ କମିଟି ଏକ ଅଭିନବ ଉପାୟରେ ଗ୍ରାମକୁ ମଦମୁକ୍ତ କରିବାକୁ ଚେଷ୍ଟା କରିଛି ।
ଏଥର ସାବାଡ ହେବେ ମଦୁଆ । ଗାଁରେ ଘଂଟ ବଡେଇ ମଦୁଆଙ୍କୁ ସତର୍କ କଲେ ଗ୍ରାମବାସୀ । ଗାଁକୁ ସଂପୂର୍ଣ୍ଣ ନିଶାମୁକ୍ତ କରିବା ପାଇଁ ଏକତ୍ରିତ ହୋଇଛନ୍ତି ଗ୍ରାମବାସୀ । ନୀଳକଣ୍ଠେଶ୍ୱର ମହାଦେବ ମନ୍ଦିରରେ ବୈଠକ କରିବା ପରେ ଗାଁ ଦାଣ୍ଡ ଘଂଟ ବାଡେଇ ସତର୍କବାଣୀ ଶୁଣାଇ ଦେଇଛନ୍ତି ନିମାପଡ଼ା ବ୍ଲକ ବସନ୍ତପୁର ଗ୍ରାମବାସୀ । କହିଛନ୍ତି, ଗାଁର ମଦ୍ୟପାନ କଲେ ସଂପୃକ୍ତ ବ୍ୟକ୍ତିଙ୍କୁ ୨୦ହଜାର ଟଙ୍କା ଜରିମାନା ଦେବାକୁ ପଡିବ ।
ସରକାର ରାଜସ୍ୱ ଆଦାୟ ଲକ୍ଷ୍ୟରେ ଗାଁ ଠାରୁ ସହର ଯାଏଁ ମଦଦୋକାନ ଖୋଲି ଚାଲିଛନ୍ତି । ହେଲେ ବସନ୍ତପୁର ଗ୍ରାମବାସୀ ମଦୁଆଙ୍କୁ ସାବାଡ଼ କରିବା ପାଇଁ ଅଂଟା ଭିଡ଼ିଛନ୍ତି । ବସନ୍ତପୁର ଗାଁର ମହିଳା ଏବଂ ପୁରଷମାନେ ଏକ ହୋଇ ନିଶା ନିବାରଣ ଅଭିଯାନ ଆରମ୍ଭ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମଦ ପିଇ ଗାଁର ଯୁବକମାନେ ପଥଭ୍ରଷ୍ଟ ହେଉଥିବା ବେଳେ ସେମାନଙ୍କୁ ପୁନର୍ବାର ସମାଜର ମୁଖ୍ୟସ୍ରୋତରେ ସାମିଲି କରିବା ପାଇଁ ଗ୍ରାମବାସୀ ଉଦ୍ୟମ କରୁଛନ୍ତି ।