ପୁଣି ଡିଆରଡିଓର ପାକିସ୍ତାନ ଲିଙ୍କ ! ଗୁଇନ୍ଦାଗିରି ଅଭିଯୋଗରେ ୪ ଗିରଫ ।
କନକ ବ୍ୟୁରୋ: ୨୦୧୪ ମସିହାରେ ଈଶ୍ୱର ବେହେରା ଗିରଫ ହେବାପରେ, ପୁଣି ଚାନ୍ଦିପୁର ଡିଆରଡିଓରୁ ପାକିସ୍ତାନକୁ ଗୁପ୍ତ ସୂଚନା ପ୍ରଦାନ ଭଳି ସାଂଘାତିକ ଅଭିଯୋଗ ସାମ୍ନାକୁ ଆସିଛି । ଆଉ ଦେଶଦ୍ରୋହ ମାମଲାରେ ୪ ଜଣଙ୍କୁ ଗିରଫ କରିଛି ବାଲେଶ୍ୱର ଚାନ୍ଦିପୁର ପୋଲିସ । ଏମାନଙ୍କ ବିରୋଧରେ ଆଇପିସିର ଧାରା ୧୨୦- ବି ଅର୍ଥାତ ଅପରାଧିକ ଷଡଯନ୍ତ୍ର, ୧୨୧-ଏ ଅର୍ଥାତ ଦେଶଦ୍ରୋହ, ଆଇପିସିର ଧାରା ୩୪ ଅର୍ଥାତ ମିଳିତ ଭାବେ ଅପରାଧ ଘଟାଇବା ପାଇଁ ଷଡଯନ୍ତ୍ର କରିବା ଏବଂ ସରକାରୀ ଗୋପନୀୟତାକୁ କ୍ଷୁର୍ଣ୍ଣ କରିବା ବା ଗୁଇନ୍ଦାଗିରି କରିବା ଭଳି ପାଇଁ ଭଳି ମାମଲା ଲଗାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ପୋଲିସର କହିବା ହେଲା ବାଲେଶ୍ୱର ଚାନ୍ଦିପୁରରେ ଥିବା ଭାରତୀୟ ଗବେଷଣା ପ୍ରତିଷ୍ଠାନରୁ କିଛି ଗୁରୁତ୍ୱପୂର୍ଣ୍ଣ ତଥ୍ୟକୁ ଶତ୍ରୁ ରାଷ୍ଟ୍ର ହାତକୁ ଟେକି ଦେଇଥିଲେ ଏମାନେ । ପାକିସ୍ତାନର ଏଜେଣ୍ଟ ଭାବେ କାମ କରୁଥିବା କିଛି ଲୋକଙ୍କୁ ଏହି ଗୁରୁତ୍ୱପୂର୍ଣ୍ଣ ଦସ୍ତାବିଜ ହସ୍ତାନ୍ତର କରାଯାଇଛି । ଆଉ ଏଥିପାଇଁ ବିପୁଳ ପରିମାଣର ଟଙ୍କା ହାସଲ କରିଛନ୍ତି ୪ ଷଡଯନ୍ତ୍ରକାରୀ ।
ସୂଚନାଯୋଗ୍ୟ ଯେ, ୨୦୧୪ରେ ଗୁଇନ୍ଦାଗିରି ଅଭିଯୋଗରେ ଈଶ୍ୱର ବେହେରା ଗିରଫ ହେବାପରଠାରୁ ପୋଲିସ ଅଧିକ ସତର୍କ ହୋଇଥିଲା । ବିଶେଷ କରି ବିଦେଶକୁ ଫୋନକଲ ଉପରେ ନଜର ରଖାଯାଉଥିଲା । ଗୁଇନ୍ଦାଗିରି ଅଭିଯୋଗରେ ଗିରଫ ହୋଇଥିବା ୪ ଜଣ ବାରମ୍ବାର ଆଇଏସଡି କଲ କରିଥିବାରୁ ସେମାନଙ୍କ ଉପରେ ସନ୍ଦେହ ବଢିଥିଲା ।