କନକ ବ୍ୟୁରୋ: ସୁରକ୍ଷା ପାଇଁ ସାରା ରାତି ଧାରଣା । ଜିଲ୍ଲାପାଳଙ୍କ ଅଫିସ ଆଗରେ ଏପରି ସାରା ରାତି ଧାରଣା ଦେଇଛି ଅନୁପ ସାଏଙ୍କ ପୁରା ପରିବାର । ଝାରସୁଗୁଡା ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଏହି ଧାରଣା ଅନୁପଙ୍କ ବଡ ଭାଇ, ମାଆ, ସ୍ତ୍ରୀ, ପୁଅ ଓ ପୁତୁରା ଧାରଣାରେ ବସିଛନ୍ତି । ସେମାନଙ୍କୁ ଅନୁପଙ୍କ ସହ ଭେଟିବାକୁ ସୁଯୋଗ ଦିଆଯାଉନଥିବା ଅଭିଯୋଗ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏପରିକି ଛତିଶଗଡ ପୋଲିସ ତାଙ୍କ ପରିବାରକୁ ଉଠାଇ ନେବାକୁ ଧମକ ଦେଉଥିବା ଅଭିଯୋଗ କରି ଜିଲ୍ଲା ପ୍ରଶାସନ ନିକଟରେ ଗୁହାରି କରିଛନ୍ତି । ଏବଂ ଜାଣିଶୁଣି ଅନୁପଙ୍କୁ ରାଜନୈତିକ ଆକ୍ରୋଶର ଶିକାର କରାଯାଉଥିବା ଅଭିଯୋଗ କରିଛନ୍ତି । ଏପରିକି ମାମଲାର ସିବିଆଇ ତଦନ୍ତ ଦାବି କରିଛନ୍ତି ଅନୁପଙ୍କ ପରିବାର ଲୋକ ।
ସେପଟେ ତିନି ଦିନିଆ ପୋଲିସ ରିମାଣ୍ଡ ସରିବା ପରେ ରାଇଗଡ କୋର୍ଟରେ ଗତକାଲି ହାଜର ହୋଇଥିଲେ ଡବଲ ମର୍ଡର ଅଭିଯୁକ୍ତ ଅନୁପ ସାଏ । ସେପଟେ ବ୍ରଜରାଜ ନଗରର ଏହି ପୂର୍ବତନ ବିଧାୟକଙ୍କୁ ପୁଣି ୩ ଦିନିଆ ରିମାଣ୍ଡରେ ନେବାକୁ ଆବେଦନ କରିଛନ୍ତି ସରକାରୀ ଓକିଲ । କିନ୍ତୁ ଅନୁପ ସାଏଙ୍କ ଓକିଲ ଆପତି ଉଠାଇଲେ ଆଉ ଶୁଣାଣିକୁ ସୋମବାର ଯାଏଁ ଘୁଂଚାଇ ଦେଲେ ରାଇଗଡ କୋର୍ଟ । ଆଉ ଏହାପରେ ଅନୁପଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।