ସରକାରଙ୍କୁ ଆଇଏମଏ ଅଧ୍ୟକ୍ଷଙ୍କ ପରାମର୍ଶ । କରୋନାର ତୃତୀୟ ଲହରରୁ ରକ୍ଷା ପାଇବାକୁ ହେଲେ ଘର ଘର ବୋଲି କରିବାକୁ ପଡିବ ଟିକାକରଣ
କନକ ବ୍ୟୁରୋ : ଭାରତରେ କରୋନା ସଂକ୍ରମଣର ଦ୍ୱିତୀୟ ଲହର ଏବେ ଜାରି ରହିଛି । ଏହାରି ମଧ୍ୟରେ ଦେଶରେ ଦୈନିକ ସଂକ୍ରମଣ କମୁଥିବା ବେଳେ ସଂକ୍ରମଣରେ ମୃତକଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଏନେଇ ବିଶେଷଜ୍ଞମାନେ କରୋନାର ତୃତୀୟ ଲହରକୁ ନେଇ ଦେଶବାସୀ ତଥା ସରକାରଙ୍କୁ ସଚେତନ କରିବାରେ ଲାଗିଛନ୍ତି । ଏହି ପରିପେକ୍ଷୀରେ ଇଣ୍ଡିଆନ ମେଡିକାଲ ଆସୋସିଏସନ (ଆଇଏମଏ) ର ଅଧ୍ୟକ୍ଷ ଡ.ଜିଏ ଜୟାଲାଲ୍ ତୃତୀୟ ଲହରରୁ ରକ୍ଷା ପାଇବାକୁ କିଛି ମହତ୍ୱପୂର୍ଣ୍ଣ ପରାମର୍ଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଡ.ଜିଏ ଜୟାଲାଲ୍ କହିଛନ୍ତି କି କରୋନା ବିରୋଧରେ ଆଗକୁ ବଢିବାର ଗୋଟଏ ମାତ୍ର ରାସ୍ତା, ତାହା ହେଉଛି ଟିକାକରଣ । ଟିକାକରଣ ମନ୍ଥର ହେଲେ ଆମେ କରୋନାର ତୃତୀୟ ଲହରରୁ ରକ୍ଷା ପାଇପାରିବା ନାହିଁ ବୋଲି ସେ କହିଛନ୍ତି । ସେ କହିଛନ୍ତି କି ସମୁହ ଟିକାକରଣର ଆବଶ୍ୟକତା ରହିଛି । ଏଥିପାଇଁ କେନ୍ଦ୍ର ସରକାର ଅଧିକ ଟିକା କିଣିବାର ଆବଶ୍ୟକତା ରହିଛି । ଏହା ସହ ସରକାର ଟିକାକରଣ କେନ୍ଦ୍ର ଚଳାଇବା ସହ ଘର ଘର ବୋଲି ଲୋକଙ୍କୁ ଟିକା ଦେବାର ଆବଶ୍ୟକତା ରହିଛି । କହିରଖୁ କି ଦେଶରେ ଏପର୍ଯ୍ୟନ୍ତ ମାତ୍ର ୧୮ କୋଟି ଲୋକଙ୍କୁ ଟିକା ଦିଆଯାଇଛି ।
ସୂଚନା ଥାଉକି ଗତ ୨୪ ଘଂଟା ମଧ୍ୟରେ ଦେଶରେ କରୋନା ସଂକ୍ରମଣରେ ୪,୫୨୯ ଜଣଙ୍କର ଜୀବନ ଯାଇଛି । ଏହାକୁ ମିଶାଇ ଦେଶରେ କରୋନା ସଂକ୍ରମଣରେ ମୋଟ ମୃତକଙ୍କ ସଂଖ୍ୟା ୨,୮୩,୨୪୮ ରେ ପହଂଚିଛି । ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ମୁତାବକ ଗତ ୨୪ ଘଂଟାରେ ଦେଶରେ ୨,୬୭,୩୩୪ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ଏହାକୁ ମିଶାଇ ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ୨,୫୪,୯୬,୩୩୦ କୁ ବୃଦ୍ଧି ପାଇଛି ।