ବ୍ୟବସାୟୀଙ୍କୁ ନାଲି ଫିତାରେ ବାନ୍ଧିବା ମୋ ସରକାରର ଉଦ୍ଦେଶ୍ୟ ନୁହେଁ : ମୋଦି
କନକ ବ୍ୟୁରୋ: ଦେଶରେ ଜିଏସଟି ଲାଗୁ ହେବା ଦ୍ୱାରା କ୍ଷୁଦ୍ର ଓ ମଧ୍ୟମ ବ୍ୟବସାୟୀମାନେ ଲାଭବାନ ହେବେ । ବ୍ୟବସାୟୀଙ୍କୁ ନାଲି ଫିତାରେ ବାନ୍ଧିବା ମୋ ସରକାରର ଉଦ୍ଦେଶ୍ୟ ନୁହେଁ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଜିଏସଟି ବା ଦ୍ରବ୍ୟ ଓ ସେବା କର କ୍ଷୁଦ୍ର ଓ ମଧ୍ୟମ ବ୍ୟବସାୟୀମାନଙ୍କୁ ଆଶ୍ୱସ୍ତି ପ୍ରଦାନ କରିଥିବା ମୋଦି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗତ ଶୁକ୍ରବାର ଦିନ ଯେତେବେଳେ ଜିଏସଟି ସମ୍ପର୍କିତ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆ ଯାଇଥିଲା ସମଗ୍ର ଦେଶବାସୀ ପନ୍ଦର ଦିନ ପୂର୍ବରୁ ଦୀପାବଳୀ ଉତ୍ସବ ପାଳନ କରିଥିଲେ ବୋଲି ମୋଦି ଗୁଜରାଟରେ ଆୟୋଜିତ ସଭାରେ ଦେଶବାସୀଙ୍କ ଉଦ୍ଦେଶ୍ୟରେ କହିଥିଲେ । ଗୁଜୁରାଟକୁ ଦୁଇ ଦିନିଆ ଗସ୍ତରେ ଯାଇ ମୋଦି ଡିସେମ୍ବରରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ତତ୍ପରତା ଦେଖାଇଛନ୍ତି । ଗୁଜୁରାଟର ବିଭିନ୍ନ ପ୍ରକଳ୍ପର ଶିଳାନ୍ୟାଶ କରିବା ସହ ବିରୋଧୀଙ୍କୁ ଟାର୍ଗେଟ କରିଛନ୍ତି ମୋଦି ।
ଶନିବାର ଆୟୋଜିତ ସଭାରେ ଜିଏସଟି ସମାଲୋଚକଙ୍କୁ କଡା ଜବାବ ଦେଇଛନ୍ତି ପ୍ରଧାନମନ୍ତ୍ରୀ ମୋଦି । ଯେଉଁ ସମୟରେ ଦେଶରେ ଜିଏସଟି ଲାଗୁ କରାଯାଇଥିଲା ସେତେବେଳେ ଏଥିରେ ଆବଶ୍ୟକ ପରିବର୍ତ୍ତନ କରାଯିବ ବୋଲି ମୋଦି କହିଥିଲେ । ବ୍ୟବସାୟୀଙ୍କ ସ୍ୱାର୍ଥକୁ ଦୃଷ୍ଟିରେ ରଖି ଜିଏସଟିରେ ପରିବର୍ତ୍ତନ କରାଯାଇଛି । ବ୍ୟବସାୟୀଙ୍କୁ ଯେପରି କୌଣସି ପ୍ରକାର ଅସୁବିଧାର ସାମ୍ନା ନକରିବାକୁ ପଡିବ, ସେଥିପାଇଁ ଜିଏସଟିକୁ ସରଳରୁ ଅତି ସରଳ କରାଯାଇଛି । ଟ୍ୟାକ୍ସ ପ୍ରଦାନ , ଆମଦାନୀ ରପ୍ତାନୀ ଏବଂ ୨୭ ଟି ଦ୍ରବ୍ୟରେ ଜିଏସଟି କୋହଳ କରାଯିବା ନେଇ ଜିଏସଟି ପରିଷଦରେ ନିଷ୍ପତ୍ତି ନିଆଯାଇଥିବା ସେ କହିଛନ୍ତି । ଦେଶର ବିକାଶ ଓ ସମସ୍ତଙ୍କ ଉନ୍ନତି ମୋ ସରକାରର ଉଦ୍ଦେଶ୍ୟ ବୋଲି ଏହି ଅବସରରେ ମୋଦି କହିଛନ୍ତି ।