ଇନ୍ଦୋର ବିଧାୟକଙ୍କ ଗୁଣ୍ଡାଗର୍ଦ୍ଦି ନେଇ ବିଜେପି ସଂସଦୀୟ ଦଳ ବୈଠକରେ ନାଁ ନନେଇ ମୁହଁ ଖୋଲିଲେ ମୋଦି । କହିଲେ, ଯାହାର ପୁଅ ହେଉ ଦଳରୁ ବାହାର କରିବା ଉଚିତ
ସମର୍ଥନ କରୁଥିବା ବ୍ୟକ୍ତିଙ୍କ ଉପରେ ବି ହେଉ କାର୍ଯ୍ୟାନୁଷ୍ଠାନ
କନକ ବ୍ୟୁରୋ: ଇନ୍ଦୋରରେ ବିଜେପି ବିଧାୟକ ଆକାଶ ବିଜୟବର୍ଗୀୟଙ୍କ ଗୁଣ୍ଡାଗର୍ଦି ନେଇ କଡା ସନ୍ଦେଶ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କାହାର ନାଁ ନ ନେଇ ପ୍ରଧାନମନ୍ତ୍ରୀ କହିଛନ୍ତି, ସିଏ ଯାହାର ବି ପୁଅ ହୁଅନ୍ତୁ ନା କାହିଁକି ଏଭଳି ଆଚରଣକୁ ଆଦୌ ବରଦାସ୍ତ କରାଯିବନାହିଁ । ଯେଉଁମାନେ ଏହାକୁ ସମର୍ଥନ କରିଛନ୍ତି ସେମାନଙ୍କୁ ବି ଦଳରୁ ବାହାର କରାଯିବା ଦରକାର । ଆଜି ବିଜେପି ସଂସଦୀୟ ଦଳ ବୈଠକରେ ଏ ନେଇ କଡା ସନ୍ଦେଶ ଦେଇଛନ୍ତି ପ୍ରଧାନମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ବିଜେପିର ବରିଷ୍ଠ ନେତା କୈଳାସ ବିଜୟବର୍ଗୀୟଙ୍କ ପୁଅ ତଥା ବିଜେପି ବିଧାୟକ ଆକାଶ ବିଜୟବର୍ଗୀୟଙ୍କ ଗୁଣ୍ଡାଗିରିର ଭିଡିଓ କିଛି ଦିନ ତଳେ ବେଶ ଚର୍ଚ୍ଚାର ବିଷୟ ହୋଇଥିଲା । ନିଗମ ଅଧିକାରୀଙ୍କୁ ବ୍ୟାଟରେ ପିଟିଥିଲେ ଆକାଶ ବିଜୟବର୍ଗୀୟ । ଇନ୍ଦୋରରେ ଉଚ୍ଛେଦ ବେଳେ ନିଗମ ଅଧିକାରୀଙ୍କୁ ମାଡ ମାରିଥିଲେ ଆକାଶ । ଏହି ଘଟଣାରେ ବିଧାୟକଙ୍କ ବିରୋଧରେ ଏଫଆଇଆର ରୁଜୁ ହୋଇଛି । ଏହା ପରେ ଆକାଶ ଗିରଫ ହୋଇଥିଲେ । ରବିବାରଦିନ ସେ ଜାମିନରେ ଆସିଛନ୍ତି । ଆକାଶଙ୍କୁ କୈଳାସ ବିଜୟବର୍ଗୀୟ ଓ କିଛି ବିଜେପି ସମର୍ଥକ ଖୋଲାଖୋଲି ସମର୍ଥନ କରିଥିଲେ । ଏପରିକି ଜେଲରୁ ମୁକୁଳିବା ଦିନ ଉତ୍ସବ ପାଳିଥିଲେ ଆକାଶ ବିଜୟବର୍ଗୀୟଙ୍କ ସମର୍ଥକ ।