କନକ ବ୍ୟୁରୋ : ପୁଣିଥରେ ଚାଲିବ ଟ୍ରମ୍ପଙ୍କ ଯାଦୁ । ଏଥର କିନ୍ତୁ ସୋସିଆଲ ମିଡ଼ିଆରେ । କାରଣ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜର ସୋସିଆଲ ମିଡିଆ ପ୍ଲାଟଫର୍ମକୁ ଉନ୍ମୋଚନ କରିବାକୁ ପ୍ରସ୍ତୁତ ହେଉଛନ୍ତି । ଆସନ୍ତା ଫେବ୍ରୁଆରି ୨୧ ତାରିଖରେ ଟ୍ରୁଥ ସୋସିଆଲ ଲଞ୍ଚ ହେବ ବୋଲି କୁହାଯାଉଛି । ସୋସିଆଲ ମିଡିଆଠାରୁ ବ୍ୟାନ ହେବା ପରେ ଟ୍ରମ୍ପ ନିଜ ସୋସିଆଲ ମିଡିଆ ପ୍ଲାଟଫର୍ମ ମାଧ୍ୟମରେ ତାଙ୍କ ପ୍ରଶଂସକଙ୍କ ସହ ପୁଣି ଯୋଡି ହେବେ। ଟ୍ରୁଥ୍ ସୋସିଆଲ୍ ଆପ, ଆପଲ୍ ଆପ୍ ଷ୍ଟୋର୍‌ରେ ତାଲିକାଭୁକ୍ତ ହୋଇସାରିଛି । ବଡ କଥା ଯେ ଟ୍ରମ୍ପ ମିଡିଆ ଆଣ୍ଡ ଟେକ୍ନୋଲୋଜି ଗ୍ରୁପ୍ (ଟିଏମଟିଜି) ଦ୍ୱାରା ପ୍ରସ୍ତୁତ କରାଯାଇଥିବା ଟ୍ରୁଥ୍ ସୋସିଆଲ୍, ଟ୍ୱିଟର ସହିତ ସମାନ।

Advertisment

ଏହି ଆପ୍ ଲୋକମାନଙ୍କୁ ଅନ୍ୟ ଲୋକଙ୍କୁ ଅନୁସରଣ କରିବାକୁ ଅନୁମତି ଦିଏ ଏବଂ ଲାଟେଷ୍ଟ ଟ୍ରେଣ୍ଡ ମଧ୍ୟ ଦେଖାଏ । ତେବେ ଟୁଇଟ୍ ପରିବର୍ତ୍ତେ, ପୋଷ୍ଟଗୁଡ଼ିକୁ “ଟ୍ରୁଥ୍” କୁହାଯିବ । ତେବେ ଉଭୟ ଆପଲ୍ ଏବଂ ଟ୍ରମ୍ପଙ୍କ ମ୍ୟାନେଜମେଣ୍ଟ ସୋସିଆଲ ମିଡିଆ ଆପର ଶୁଭାରମ୍ଭ ଉପରେ ମନ୍ତବ୍ୟ ଦେବାକୁ ମନା କରିଦେଇଛନ୍ତି। ତେବେ ଟ୍ରମ୍ପଙ୍କ ନିକଟ ସୂତ୍ରରୁ ପ୍ରକାଶ ଯେ ଫେବ୍ରୁଆରି ୨୧ ରେ ଏହି ଆପ ଉପଲବ୍ଧ ହେବ। ଏହାର ଡେମୋ ଇମେଜ ମଧ୍ୟ ସାମ୍ନାକୁ ଆସିଛି ।ଏହାର ପ୍ରୋଫାଇଲ ପେଜ ପ୍ରାୟତଃ ଟ୍ୱିଟର ପେଜ ଭଳି ଦେଖାଯାଉଛି ।

ଟ୍ରମ୍ପ କେବଳ ଟ୍ୱିଟର ପରି ଏକ ପ୍ଲାଟଫର୍ମ ଲଞ୍ଚ କରିବେ ନାହିଁ, ବରଂ ୟୁଟ୍ୟୁବ ଭଳି ନେଟୱାର୍କ ମଧ୍ୟ ଲଞ୍ଚ କରିବେ। ଉଲ୍ଲେଖଯୋଗ୍ୟ, ୨୦୨୧ ଜାନୁଆରୀ ୬ରେ ଆମେରିକାର କ୍ୟାପିଟାଲ ହିଲ୍ସରେ ହୋଇଥିବା ଦଙ୍ଗାରେ ନିଜ ସମର୍ଥକଙ୍କୁ ସୋସିଆଲ ମିଡ଼ିଆରେ ଭଙ୍ଗାରୁଜା କରିବାକୁ ପୋତ୍ସାହିତ କରିଥିବାରୁ ଟ୍ରମ୍ପଙ୍କୁ ବିଭିନ୍ନ ସୋସିଆଲ ମିଡ଼ିଆ ପ୍ଲାଟଫର୍ମ ୟୁଟ୍ୟୁବ, ଫେସବୁକ, ଟ୍ୱିଟର ପ୍ରତିବନ୍ଧକ ଲଗାଇଥିଲେ । ଆଉ ଏହାପରେ ଟ୍ରମ୍ପ ନିଜର ସୋସିଆଲ ମିଡିଆ ସାଇଟ୍ ଲଞ୍ଚ କରିବା ବିଷୟରେ କହିଥିଲେ ।ଟ୍ରମ୍ପ ନିଜର ସୋସିଆଲ ମିଡ଼ିଆ ପ୍ଲାଟଫର୍ମ ଟ୍ରୁଥ୍ ସୋସିଆଲ ଉନ୍ମୋଚନ କରିବା ପୂର୍ବରୁ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଛି । କାରଣ ଟ୍ରୁଥ୍ ସୋସିଆଲକୁ ଜନ୍ମ ଦେଇଥିବା କମ୍ପାନିର ସେୟାର ବଢିବା ଆରମ୍ଭ କରିଛି । ଏବେ ଏହି କମ୍ପାନିର ବଜାର ମୂଲ୍ୟ ପାଖାପାଖି ୩୯,୪୩୦ କୋଟି ଟଙ୍କା ରହିଛି । ଏହାପୂର୍ବରୁ ସୋସିଆଲ ମିଡ଼ିଆରେ ପ୍ରତିବନ୍ଧକ ଲଗାଇଥିବାରୁ ୍ରୁଟ୍ୟୁବ, ଫେସବୁକ, ଟ୍ୱିଟର କମ୍ପାନି ବିରୋଧରେ ମାମଲା ରୁଜୁ କରୁଥିଲେ ଟ୍ରମ୍ପ ।