କନକ ବ୍ୟୁରୋ : ୟେଲୋପାଥି ଔଷଧ ଓ ଚିକିତ୍ସାକୁ ନେଇ ବାବା ରାମଦେବଙ୍କ ବିବାଦୀୟ ବୟାନ ଏବେ ତାଙ୍କ ପାଇଁ ଅଡ୍ରୁଆ ସୃଷ୍ଟି କରିଛି । ଏନେଇ ରେଜିମେଣ୍ଟ ଡାକ୍ତର ସଂଘ ସାରା ଦେଶରେ ଜୁନ୍ ପହିଲା ଦିନ ବାବା ରାମଦେବଙ୍କ ବିରୋଧରେ କଳା ଦିବସ ପାଳନ କରିବ ବୋଲି ନିଷ୍ପତ୍ତି ନେଇଛି । ଏହାସହ ସଂଘ ତରଫରୁ କୁହାଯାଇଛି କି, ବାବା ରାମଦେବ ବିନା ସର୍ତ୍ତରେ କ୍ଷମା ପ୍ରଥନା କରନ୍ତୁ ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି କରୋନା ସଂକ୍ରମିତଙ୍କ ଠାରେ ବ୍ୟବହାର କରାଯାଉଥିବା କିଛି ଔଷଧକୁ ନେଇ ବାବା ରାମଦେବ ପ୍ରଶ୍ନ ଉଠାଇଥିଲେ । ଏହାପରେ ଏହାକୁ ନେଇ ବିବାଦ ଦେଖା ଦେଇଥିଲା । ସୋସିଆଲ ମିଡିଆରେ ଭାଇରାଲ ହେଉଥିବା ଏହି ଭିଡିଓରେ ବାବା ରାମଦେବ ଏଲୋପାଥି ମେଡିସିନକୁ ଷ୍ଟୁପିଡ ଓ ଦେବାଳିଆ ବିଜ୍ଞାନ ବୋଲି କହୁଥିବାର ଦେଖିବାକୁ ମିଳିଛି । ଏହାସହ ଏହି ଭିଡିଓରେ ବାବା ରାମଦେବ କହୁଛନ୍ତି କି ଏଲୋପାଥି ମେଡିସିନ୍ ବ୍ୟବହାର ଦ୍ୱାରା କରୋନା ସଂକ୍ରମିତଙ୍କର ମୃତ୍ୟୁ ହେଉଛି ।
ରାମଦେବଙ୍କର ଏଭଳି ବୟାନକୁ ବିଭିନ୍ନ ସ୍ତରରୁ କଡା ବିରୋଧ କରାଯାଇଛି । ଏହାକୁ ନେଇ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡ.ହର୍ଷବର୍ଦ୍ଧର୍ନ ଏଭଳି ଦୁର୍ଭାଗ୍ୟପୂର୍ଣ୍ଣ ବୟାନକୁ ପ୍ରତ୍ୟାହାର କରିନେବାକୁ କହିଥିଲେ । ଏହାପରେ ମେ ୨୩ ତାରିଖରେ ବାବା ରାମଦେବ ଗଣମାଧ୍ୟମ ଆଗରେ ଏଭଳି ବୟାନକୁ ପ୍ରତ୍ୟାହାର କରିନେଇଥିଲେ । ହେଲେ ୨୪ ତାରିଖ ଦିନ ସେ ଭାରତୀୟ ଚିକିତ୍ସା ସଂଘ (ଆଇଏମଏ) କୁ ଏକ ଖୋଲା ଚିଠି ଲେଖି ୨୫ ଟି ପ୍ରଶ୍ନ ପଚାରିଥିଲେ । ସେ କହିଥିଲେ କି ଏଲୋପାଥି ଚିକିତ୍ସା ଦ୍ୱାରା ରୋଗର ସ୍ଥାୟୀ ପ୍ରତିକାର ହୋଇପାରୁଛି କି ?
ଅନ୍ୟପଟେ ପଶ୍ଚିମବଙ୍ଗରେ ଆଇଏମଏ ପକ୍ଷରୁ ବାବା ରାମଦେବଙ୍କ ବିରୋଧରେ ଥାନାରେ ଅଭିଯୋଗ ହୋଇଛି । ସଂଗଠନ ତରଫରୁ କୋଲକତାର ସିନ୍ଥୀ ଥାନାରେ ୨୮ ତାରିଖ ଦିନ ଅଭିଯୋଗ ହୋଇଛି । କରୋନା ମହାମାରୀ ସମୟରେ ବାବା ରାମଦେବ ଯେଭଳି ଲୋକଙ୍କୁ ଭ୍ରମିତ କରିବା ସହ ମିଛ ସୂଚନା ଦେଉଛନ୍ତି ସେନେଇ ତାଙ୍କ ଉପରେ ରାଜଦ୍ରୋହ ମାମଲା ରୁଜୁ କରିବାକୁ ଦାବି ହୋଇଛି ।