ମୃତ୍ୟୁ ପରେ ଲାଞ୍ଚ ମାଗିଲେ ଡାକ୍ତର : ଟଙ୍କା ନେଉଥିବା ବେଳେ ଧରିଲା ଭିଜିଲାନ୍ସ
୪୦ ହଜାର ନଦେଲେ ସାପ କାମୁଡା ବଦଳରେ ବିଷ ପିଇ ମୃତ୍ୟୁ ହୋଇଥିବା ରିପୋର୍ଟ ଦେବେ ବୋଲି ଦେଇଥିଲେ ଧମକ
କନକ ବ୍ୟୁରୋ : ଲାଞ୍ଚ ନଦେଲେ ରିପୋର୍ଟ ବଦଳାଇ ଦେବାକୁ ଧମକ । ଏପରିକି ସାପକାମୁଡ଼ାରେ ମୃତ୍ୟୁବରଣ କରିଥିବା ଜଣେ ଯୁବକଙ୍କ ପୋଷ୍ଟମର୍ଟମ ରିପୋର୍ଟକୁ ବିଷପିଇ ଆତ୍ମହତ୍ୟା କରିଥିବା ରିପୋର୍ଟ ଦର୍ଶାଇବାକୁ ମଧ୍ୟ ଧମକ ଦେଇଥିଲେ ଜଣେ ଡାକ୍ତର । ବାରିପଦାର ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜ ଓ ହସ୍ପିଟାଲର ଡାକ୍ତର ଦେବୀଦତ ପାତ୍ରଙ୍କୁ ଗିରଫ କରିଛି ଭିଜିଲାନ୍ସ ।
Kanak News is now on WhatsApp
Join and get latest news updates delivered to you via WhatsApp
ଖବର ଅନୁସାରେ, ବାଙ୍ଗିରିପୋଷି ଥାନା ଅନ୍ତର୍ଗତ ବଣକାଟି ପଞ୍ଚାୟତ ସାତଭାୟା ଗାଁର ରଘୁନାଥ ମାର୍ଣ୍ଡି ଗତମାସ ୨୪ରେ ସାପ କାମୁଡ଼ାରେ ମୃତ୍ୟୁବରଣ କରିଥିଲେ । ପରେ ଶବବ୍ୟବଚ୍ଛେଦ ନିମନ୍ତେ ମୃତକଙ୍କୁ ପିଆରଏମ୍ ଅଣାଯାଇଥିଲା । ସେଠାରେ ଡାକ୍ତର ପାତ୍ର ମୃତକଙ୍କ ବ୍ୟବଚ୍ଛେଦ କରିଥିଲେ । ଚଳିତ ସପ୍ତାହରେ ଶବ ବ୍ୟବଚ୍ଛେଦ ରିପୋର୍ଟ ଆଣିବାକୁ ମୃତକଙ୍କ ଭଉଣୀ ସୁଦେବୀ ଟୁଡୁ ପିଆରଏମ୍ ଆସି ଡାକ୍ତର ପାତ୍ରଙ୍କୁ ଭେଟିଥିଲେ । ମାତ୍ର ରିପୋର୍ଟ ପାଇଁ ୪୦ହଜାର ଟଙ୍କା ଦେବାକୁ ପଡ଼ିବ ବୋଲି ଡାକ୍ତର କହିଥିବା ସୁଦେବୀ ଅଭିଯୋଗ କରିଛନ୍ତି । ସାପ କାମୁଡ଼ା ମୃତକଙ୍କ ପରିବାରକୁ ୪ଲକ୍ଷ ମିଳିବ । ତେଣୁ ତାଙ୍କୁ ୪୦ ହଜାର ଦେବାକୁ ପଡ଼ିବ ବୋଲି ଡାକ୍ତର ପାତ୍ର ମୃତକଙ୍କ ଭଉଣୀଙ୍କୁ କହିଥିବା ଅଭିଯୋଗ ହୋଇଛି । ଟଙ୍କା ନଦେଲେ ଶବ ବ୍ୟବଚ୍ଛେଦ ରିପୋର୍ଟରେ ବିଷ ଖାଇ ମୃତ୍ୟୁବରଣ କରିଥିବା ଦେଖେଇଦେବେ ବୋଲି ଡାକ୍ତର ଦେବୀଦତ୍ତ ପାତ୍ର ଧମକ ଦେଇଥିଲେ ।
ଏନେଇ ଡାକ୍ତର ଶ୍ରୀ ପାତ୍ର ମୃତକଙ୍କ ଭଉଣୀ ଭିଣୋଇଙ୍କୁ ବାରିପଦା ଡାକି କଥା ହୋଇଥିଲେ। ଶେଷରେ ୨୦ହଜାରରେ ମାମଲା ଛିଣ୍ଡିଥିଲା । ତେବେ ଏହି ଘଟଣା ସମ୍ପର୍କରେ ମୃତକଙ୍କ ସମ୍ପର୍କୀୟଙ୍କ ପକ୍ଷରୁ ବାଲେଶ୍ବର ଭିଜିଲାନ୍ସକୁ ସୂଚନା ଦିଆଯାଇଥିଲା । ତଦନୁଯାୟୀ ମୃତକଙ୍କ ଭଉଣୀ ଡାକ୍ତର ପାତ୍ରଙ୍କୁ ରଙ୍ଗାମାଟିଆ ନିକଟରେ ୨୦ହଜାର ଟଙ୍କା ଲାଞ୍ଚ ଦେଉଥିବାବେଳେ ଭିଜିଲାନ୍ସ ହାବୁଡ଼ରେ ପଡ଼ିଥିଲେ । ସୂଚନାଯୋଗ୍ୟ ଡାକ୍ତର ଏମିତି ରିପୋର୍ଟ ଦେବାକୁ ଏକାଧିକ ଲୋକଙ୍କୁ ହଇରାଣ କରୁଥିବା ଅଭିଯୋଗ ହୋଇଛି । ଡାକ୍ତର ଜଣଙ୍କ ତାଙ୍କର ନୂତନ ପୋଷ୍ଟିଂ ପାଇଁ ପିଆରଏମ୍ରୁ ରିଲିଭ୍ ହୋଇଯାଇଥିବା ଜଣାପଡ଼ିଛି । ଭିଜିଲାନ୍ସ ହାତରେ ଧରାପଡ଼ିବା ପରେ ଡାକ୍ତର ଜଣଙ୍କ ଅସୁସ୍ଥ ଅନୁଭବ କରିବା ସହିତ ତାଙ୍କୁ ତୁରନ୍ତ ଅକ୍ସିଜେନ୍ ଦେବାକୁ କହିଥିଲେ । ତେଣୁ ଭିଜିଲାନ୍ସ ପକ୍ଷରୁ ତାଙ୍କୁ ପିଆରଏମ ଅଣାଯାଇଥିଲା । ମାତ୍ର ଡାକ୍ତରୀ ପରୀକ୍ଷା ପରେ ସେ ଠିକ୍ ଥିବା ଜଣାପଡ଼ିବା ପରେ ତାଙ୍କୁ ବାଲେଶ୍ବର ନିଆଯାଇଥିଲା।