ଆସିଗଲା କି ତୃତୀୟ ଲହର? ବିଶିଷ୍ଟ ବୈଜ୍ଞନିକ ତଥା ହାଇଦ୍ରାବାଦ ବିଶ୍ୱବିଦ୍ୟାଳୟର ପୂର୍ବତନ କୁଳପତି ଡକ୍ଟର ବିପିନ ଶ୍ରୀବାସ୍ତବଙ୍କ ଦାବି । ଜୁଲାଇ ୪ରୁ ଆସିଗଲାଣି ଦେଶରେ ତୃତୀୟ ଲହର ।
କନକ ବ୍ୟୁରୋ: ସ୍ୱାସ୍ଥ୍ୟ ମନ୍ତ୍ରାଳୟର କରୋନା ଗ୍ରାଫରୁ ଜଣାପଡୁଛି ଯେ, ଜୁଲାଇ ମାସରେ ସଂକ୍ରମଣ ହାର ୩ ପ୍ରତିଶତ ତଳେ ରହିଥିଲେ ବି ଜୁନ ମାସ ଆରମ୍ଭରେ ଏହା ଯେପରି ଭାବେ ହ୍ରାସ ପାଉଥିଲା, ସେହିଭଳି ଗତିରେ ତଳକୁ ଖସୁନାହିଁ ସଂକ୍ରମଣ । ଭାରତରେ କରୋନା ଦ୍ୱିତୀୟ ଲହର ଶୀର୍ଷକୁ ଯାଇ ତଳକୁ ଖସିଥିଲେ ବି କରୋନା ଗ୍ରାଫ୍ ମୋଟା ଲାଞ୍ଜ ଦେଇ ଗତି କରୁଛି । ପ୍ରଥମ ଲହର ଯେପରି ପାଟର୍ନରେ ହ୍ରାସ ପାଇଥିଲା, ଦ୍ୱିତୀୟ ଲହରରେ ସେପରି ଭାବେ ହ୍ରାସ ପାଇବା ଦେଖିବାକୁ ମିଳିନାହିଁ ।
Kanak News is now on WhatsApp
Join and get latest news updates delivered to you via WhatsApp
ଦେଶର ବିଶିଷ୍ଟ ବୈଜ୍ଞାନିକ ତଥା ହାଇଦ୍ରାବାଦ ବିଶ୍ୱବିଦ୍ୟାଳୟର ପୂର୍ବତନ କୁଳପତି ଡକ୍ଟର ବିପିନ ଶ୍ରୀବାସ୍ତବ ଦାବି କରିଛନ୍ତି, ଦେଶରେ ତୃତୀୟ ଲହର ଆରମ୍ଭ ହୋଇଯାଇଛି । ଦୈନିକ ସଂକ୍ରମଣ, ଦୈନିକ ମୃତ୍ୟୁ ଏବଂ ପ୍ରତିଦିନ ସୁସ୍ଥ ସଂଖ୍ୟାର ପାଟର୍ନକୁ ଅନୁଶୀଳନ କରି ଏପରି ଯୁକ୍ତି ବାଢିଛନ୍ତି ଡକ୍ଟର ବିପିନ ଶ୍ରୀବାସ୍ତବ । ସେ କହିଛନ୍ତି ଜୁଲାଇ ୪ ତାରିଖରୁ କରୋନାର ତୃତୀୟ ଲହର ଚାଲିଆସିଛି ।
ଗତ ୧୫ ମାସ ଧରି ପ୍ରତିଦିନର ତଥ୍ୟ ଆଧାରରେ କରୋନା ସଂକ୍ରମଣ ନେଇ ଗବେଷଣା କରୁଛନ୍ତି ବୈଜ୍ଞାନିକ ଡକ୍ଟର ବିପିନ ଶ୍ରୀବାସ୍ତବ । ସେ କହିଛନ୍ତି ଗତ ଫେବ୍ରୁଆରି ମାସରେ ଦ୍ୱିତୀୟ ଲହର ଆରମ୍ଭ ହେବା ବେଳେ ଯେଉଁ ପାଟର୍ନ ଦେଖା ଦେଇଥିଲା, ସେହି ପାଟର୍ନ ଦେଇ ଗତି କରୁଛି କରୋନା ।
ଡକ୍ଟର ବିପିନ ଶ୍ରୀବାସ୍ତବଙ୍କ ମତରେ ଫେବ୍ରୁଆରି ମାସରେ ଦୈନିକ ସଂକ୍ରମଣ, ଦୈନିକ ମୃତ୍ୟୁ ଓ ପ୍ରତିଦିନର ସୁସ୍ଥ ସଂଖ୍ୟାର ପାର୍ଟନ ସହ ବର୍ତ୍ତମାନର ପାଟର୍ନ ମେଳ ଖାଉଛି । ଜୁଲାଇ ମାସରେ ଦେଶର କରୋନା ମିଟର ସାମାନ୍ୟ ଉପର ତଳ ହୋଇ ଗତି କରୁଛି । ନୂଆ ଆକ୍ରାନ୍ତଙ୍କ ସଂଖ୍ୟା ସାମାନ୍ୟ କମ ବେଶୀ ହୋଇ ଗତି କରୁଛି । ମୃତ୍ୟୁ ସଂଖ୍ୟା ମଧ୍ୟ ନିର୍ଦ୍ଦିଷ୍ଟ ରେଞ୍ଜ ଭିତରେ ରହୁଛି । ଜୁନ ମାସରେ ଯେପରି ତଳମୁହାଁ ହେଉଥିଲା ସେପରି ଦେଖିବାକୁ ମିଳୁନାହିଁ । ବିଶେଷ କରି ପ୍ରତିଦିନର ମୃତ୍ୟୁକୁ ନେଇ ମଡେଲ ତିଆରି କରିଛନ୍ତି ଡକ୍ଟର ଶ୍ରୀବାସ୍ତବ । ଆଉ ଏହାରି ଆଧାରରେ ସେ ଆକଳନ କରିଛନ୍ତି ଜୁଲାଇ ୪ ତାରିଖକୁ ତୃତୀୟ ଲହରର ପ୍ରଭାବ ଦେଶରେ ପଡିଛି ।
ଭାରତ କରୋନା ମିଟର
ତାରିଖ ନୂଆ ଆକ୍ରାନ୍ତ ମୃତ୍ୟୁ
- ୪ ଜୁଲାଇ ୪୩,୦୭୧ ୯୫୫
- ୫ ଜୁଲାଇ ୩୯,୭୯୬ ୭୨୩
- ୬ ଜୁଲାଇ ୩୪,୭୦୩ ୫୫୩
- ୭ ଜୁଲାଇ ୪୩,୭୩୩ ୯୩୦
- ୮ ଜୁଲାଇ ୪୫,୮୯୨ ୮୧୭
- ୯ ଜୁଲାଇ ୪୩,୩୯୩ ୯୧୧
- ୧୦ ଜୁଲାଇ ୪୨,୭୬୬ ୧୨୦୬
- ୧୧ ଜୁଲାଇ ୪୧,୫୦୭ ୮୯୫
- ୧୨ ଜୁଲାଇ ୩୭,୧୫୪ ୭୨୪
ଦେଶରେ ପ୍ରତିଦିନର ଆକ୍ରାନ୍ତ ଓ ମୃତ୍ୟୁ ସଂଖ୍ୟାକୁ ନେଇ ବୈଜ୍ଞାନିକ ବିପିନ ଶ୍ରୀବାସ୍ତବ ମଡେଲ ପ୍ରସ୍ତୁତ କରିଛନ୍ତି । ତେବେ ବଡ଼କଥା ହେଉଛି, ପ୍ରତିଦିନ ଯେତିକି ମୃତ୍ୟୁ ରେକର୍ଡ ହେଉଛି, ତାହା ୨୪ ଘଣ୍ଟାର ମୃତ୍ୟୁ ନୁହେଁ । ଅଡିଟ୍ ପରେ ରାଜ୍ୟ ସରକାର ଏହାକୁ ଧିରେ ଧିରେ ପ୍ରକାଶ କରୁଛନ୍ତି । ତାହା କେତେ ଗ୍ରହଣ ଯୋଗ୍ୟ ଏହାକୁ ନେଇ ପ୍ରଶ୍ନ ରହିଛି । ଏପଟେ ଦେଶର ପ୍ରମୁଖ ଡାକ୍ତର ସଂଘ ଇଣ୍ଡିଆନ୍ ମେଡିକାଲ ଆସୋସିଏସନ୍ ବା ଆଇଏମଏ କହିଛି, ଦେଶରେ କରୋନାର ତୃତୀୟ ଲହର ଆସିବା ଅବସମ୍ଭାବୀ । ତେଣୁ କୌଣସି ପରିସ୍ଥିତିରେ କଟକଣା କୋହଳ ନକରିବାକୁ ସରକାରଙ୍କୁ ପରାମର୍ଶ ଦେଇଛି ଆଇଏମଏ । ଧାର୍ମିକ ଉତ୍ସବ, ତୀର୍ଥଯାତ୍ରା ଓ ପର୍ଯ୍ୟଟନକୁ ଅନୁମତି ନଦେବାକୁ ସରକାରଙ୍କୁ ଅନୁରୋଧ କରିଛି ଡାକ୍ତର ସଂଘ ।