କନକ ବ୍ୟୁରୋ : ମୟୂରଭଞ୍ଜର ମୋରଡ଼ାରେ ଉଡ଼ାପର୍ବ ପ୍ରୋସେସନ୍ ଚାଲିଥିବା ବେଳେ ଓଲଟିଲା ଡିଜେ ଗାଡ଼ି । ମାଇକ୍ ଓ ସାଉଣ୍ଡ ବକ୍ସ ନେଇ ଯାଉଥିବା ଗାଡ଼ି ଓଲଟି ପଡ଼ିବାରୁ ୫ ଜଣ ଆହତ ହୋଇଥିବା ସୂଚନା ମିଳିଛି । ସେମାନଙ୍କ ମଧ୍ୟରୁ ୩ଜଣ ଗୁରୁତର ଥିବା ଜଣାପଡ଼ିଛି । ଦୁର୍ଘଟଣାର ସଂପୂର୍ଣ୍ଣ ଦୃଶ୍ୟ କଏଦ ହୋଇଛି କ୍ୟାମେରାରେ । ଆଉ ଏହି ଦୃଶ୍ୟ ହିଁ ବୟାନ କରୁଛି, କେତେ ସାଂଘାତିକ ହୋଇଛି ଦୁର୍ଘଟଣା । ଗୁରୁବାର ବିଷୁବ ସଂକ୍ରାନ୍ତି ଅବସରରେ ମୋରଡ଼ାରେ ଅନୁଷ୍ଠିତ ଉଡ଼ା ପର୍ବରେ ହଜାର ହଜାର ଲୋକଙ୍କ ସମାଗମ ହୋଇଥିଲା । ତିନିଟି ଡିଜେ ଗାଡ଼ି ପ୍ରୋସେସନରେ ବାହାରିଥିଲା । ଏକାଧିକ ମାଇକ୍ ଓ ସାଉଣ୍ଡ ବକ୍ସ ଗାଡ଼ିରେ ଲୋଡ୍ ହୋଇଥିଲା ।

ଅନେକ ଯୁବକ ମଧ୍ୟ ଗାଡ଼ି ଉପରେ ରହିଥିଲେ । ତିନିଟି ଦଳରେ ବିଭକ୍ତ ହୋଇ ଯୁବକମାନେ ପରସ୍ପର ମଧ୍ୟରେ ପ୍ରତିଯୋଗିତା କରି ଗୀତର ତାଳେ ତାଳେ ମସଗୁଲ ହୋଇ ନାଚୁଥିଲେ । ଗୁରୁବାର ରାତି ପ୍ରାୟ ୭ଟାରୁ ୮ଟା ମଧ୍ୟରେ ଘଟିଥିଲା ବଡ଼ ଅଘଟଣ । ଅତ୍ୟଧିକ ଲୋଡ୍ ଯୋଗୁଁ ଭାରସ୍ୟାମ ହରାଇ ଲୋକଙ୍କ ଉପରେ ଓଲଟି ପଡିଥିଲା ଡିଜେ ଗାଡ଼ି । କିଛି ଲୋକ ଗାଡ଼ି ତଳେ ଚାପି ହୋଇ ରହିଯାଇଥିବା ବେଳେ ଗାଡ଼ି ଉପରେ ଥିବା ଯୁବକମାନେ ମଧ୍ୟ ଛିଟିକି ପଡିଥିଲେ । ହସଖୁସିର ମାହୋଲ ଚାହୁଁ ଚାହୁଁ ଦୁଃଖର ପରିବେଶରେ ପରିଣତ ହୋଇ ଯାଇଥିଲା । ଦୁର୍ଘଟଣାରେ ୫ଜଣ ଆହତ ହୋଇଥିବା ସୂଚନା ମିଳିଛି । ସେମାନଙ୍କ ମଧ୍ୟରୁ ୩ଜଣଙ୍କ ଅବସ୍ଥା ଗୁରୁତର ରହିଛି । ଗୁରୁତରଙ୍କୁ ବାରିପଦା ପିଆରଏମ୍ ହସପିଟାଲରେ ଭର୍ତ୍ତି କରାଯାଇଛି ।