ବିଧାନସଭାରେ ଓଡିଶାର ଜୀବନରେଖାକୁ ନେଇ ବିତର୍କ ! ମହାନଦୀରେ ଜଳପ୍ରବାହ କମିବା କାରଣରୁ ଚିଲିକାକୁ ବନ୍ଦ ହୋଇଛି ମଧୁର ଜଳ ପ୍ରବାହ, ବିଜେପିର ପ୍ରଶ୍ନ, ୧୮ ବର୍ଷ ଧରି କଣ କରୁଥିଲେ ସରକାର
କନକ ବ୍ୟୁରୋ : ମହାନଦୀକୁ ନେଇ ଚିନ୍ତା ବଢୁଥିବା ବେଳେ ଆଜି ବିଧାନସଭାରେ ଚିନ୍ତା ବଢାଇଦେବା ଭଳି ତଥ୍ୟ ଦେଇଛନ୍ତି ରାଜ୍ୟ ସରକାର । ଜଳସମ୍ପଦ ମନ୍ତ୍ରୀ ନିରଂଜନ ପୂଜାରୀ କହିଛନ୍ତି, ମହାନଦୀରେ ଜଳ ପ୍ରବାହ କମିବା କାରଣରୁ ଭାର୍ଗବୀ ଓ କୁଆଖାଇ ନଦୀ ଶୁଖିଯାଇଛି । ଏହାର ପ୍ରଭାବରେ ଚିଲିକାକୁ ମଧୁର ଜଳପ୍ରବାହ ମଧ୍ୟ ବାଧାପ୍ରାପ୍ତ ହୋଇଛି ବୋଲି ମନ୍ତ୍ରୀ ବିଧାନସଭାକୁ ସୂଚନା ଦେଇଛନ୍ତି । ମହାନଦୀକୁ ନେଇ ବିତର୍କରେ ଆଜି ବିଧାନସଭାରେ ଆରୋପ-ପ୍ରତ୍ୟାରୋପ ଦେଖିବାକୁ ମିଳିଥିଲା ।
Kanak News is now on WhatsApp
Join and get latest news updates delivered to you via WhatsApp
ଦୁଇ ଦିନର ହଟ୍ଟଗୋଳ ଏବଂ ହଙ୍ଗାମା ପରେ ଓଡ଼ିଶାର ଜୀବନ ରେଖା କୁହାଯାଉଥିବା ମହାନଦୀ ପ୍ରସଙ୍ଗରେ ବିତର୍କ କରିଛି ବିଧାନସଭା । ଗୋଟିଏ ପଟେ ମହାନଦୀ ଶୁଖିବାକୁ ବସୁଥିବା ବେଳେ ଅନ୍ୟ ପଟେ ରାଜନୀତିର ବନ୍ୟା ପ୍ରଖର ହେବାରେ ଲାଗିଛି । ଗୃହରେ ଯୁକ୍ତି ଉପସ୍ଥାପନ କରି ଜଳ ସଂପଦ ମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି- ଟ୍ରିବୁନାଲ ଗଠନ କରାଯାଇଥିଲେ ମଧ୍ୟ ଏଯାଏଁ ଟର୍ମସ ଅଫ ରେଫରେନ୍ସ ପ୍ରସ୍ତୁତ କରାଯାଇ ନାହିଁ । ଫଳରେ ଟ୍ରିବୁନାଲରେ ଶୁଣାଣି ହୋଇପାରିବ ନାହିଁ ।
ଜଳ ସଂପଦ ମନ୍ତ୍ରୀ ପୁଣି କହିଛନ୍ତି- ଛତିଶଗଡ଼ କଲମା ବ୍ୟାରେଜ ନିର୍ମାଣ କରିବା କାରଣରୁ ଜଳ ପ୍ରବାହ ବହୁ ପରିମାଣରେ କମି ଯାଇଛି । ଏହାର ସାଂଘାତିକ୍ ପରିସ୍ଥିତି ସୂଚାଇବାକୁ ଯାଇ, ସରକାର କହିଛନ୍ତି- ମହାନଦୀରେ ଓଡ଼ିଶାକୁ ୨୦ ମିଲିୟନ୍ ଫୁଟ ପାଣି ଆସୁଥିବା ବେଳେ ଛତିଶଗଡ଼ ୨୭ ମିନିଲିୟନ୍ ଫୁଟ୍ ପାଣି ଗଚ୍ଚିତ ରଖିବାକୁ ଯୋଜନା କରୁଛି ।
ଛତିଶଗଡ଼ରେ ବନ୍ଧ ନିର୍ମାଣ ଯୋଗୁଁ ଭାର୍ଗବୀ ଓ କୁଆଖାଇ ନଦୀ ସଂପୂର୍ଣ୍ଣ ଶୁଖି ଯାଇଛି ବୋଲି ଆଜି ବିଧାନସଭାରେ ମନ୍ତ୍ରୀ ସୂଚନା ଦେଇଛନ୍ତି । ଆଉ ଏହାର ପ୍ରଭାବରେ ଚିଲିକାକୁ ମଧୂର ଜଳ ପ୍ରବେଶ କରି ପାରୁନାହିଁ ବୋଲି ମନ୍ତ୍ରୀ କହିଛନ୍ତି । ତେବେ ବିଜେପିର ପ୍ରଶ୍ନ ହେଉଛି- ଯଦି ମହାନଦୀ ଏତେ ସାଂଘାତିକ ପରିସ୍ଥିତି ସୃଷ୍ଟି କରିବାକୁ ଯାଉଛି, ତେବେ ୧୮ ବର୍ଷ ଧରି ସରକାର କାହିଁକି ଚୁପ ବସିଥିଲେ । ସେପଟେ କଂଗ୍ରେସ ଆଶଙ୍କା କରୁଛି ଛତିଶଗଡ଼ର ପ୍ରକଳ୍ପ କାର୍ଯ୍ୟକାରୀ ହେଲେ ମହାନଦୀ ଓ ହୀରାକୁଦ ଶୁଖିଯିବ । କିନ୍ତୁ ଓଡ଼ିଶା ସରକାର ଏହି ଗମ୍ଭୀର ସମସ୍ୟାକୁ ସମାଧାନ ଦିଗରେ ଆନ୍ତରିକତା ଦେଖାଉ ନାର୍ହାନ୍ତି ବୋଲି ଅଭିଯୋଗ ଆଣିଛନ୍ତି ।
ମହାନଦୀର ଜଳ ପ୍ରବାହ କମିବା ଯୋଗୁଁ ଓଡ଼ିଶାର ୧୫ଟି ଜିଲ୍ଲା ପ୍ରଭାବିତ ହେବାର ଆଶଙ୍କା ରହିଛି । କିନ୍ତୁ ରାଜନୈତିକ ଦୃଷ୍ଟି କୋଣରୁ ଦେଖିଲେ ଏହି ପ୍ରସଙ୍ଗ ଆଗାମୀ ନିର୍ବାଚନରେ ୩୦ଟି ଜିଲ୍ଲାକୁ ପ୍ରଭାବିତ କରିବାର କ୍ଷମତା ରଖିଛି । ତେଣୁ ରାଜନୈତିକ ଦଳ ଗୁଡ଼ିକ ପାଇଁ ଏହି ବିଷୟ ଏକ ସ୍ପର୍ଶକାତର ପ୍ରସଙ୍ଗ ହୋଇ ସାମ୍ନାକୁ ଆସିଛି ।
ମହାନଦୀ ଜଳ ବିବାଦକୁ ନେଇ ଓଡ଼ିଶା-ଛତିଶଗଡ଼ ମୁହାଁମୁହିଁ ଭିତରେ ଉପରମୁଣ୍ଡରେ ନିର୍ମାଣ ବନ୍ଦ କରିବା ପାଇଁ ଛତିଶଗଡ଼କୁ ଚିଠି ଲେଖିଛନ୍ତି ଓଡ଼ିଶା ସରକାର । ରାୟପୁର ଜିଲ୍ଲାରେ ମୋହମେଲା ସିରପୁରରେ ପ୍ରସ୍ତାବିତ ବ୍ୟାରେଜ୍ ନିର୍ମାଣକୁ ବନ୍ଦ କରିବାକୁ ଛତିଶଗଡ଼ର ଜଳ ସଂପଦ ସଚିବଙ୍କୁ ଚିଠି ଲେଖି ଜଣାଇଛନ୍ତି ଓଡ଼ିଶା ଜଳ ସଂପଦ ସଚିବ । ଏହି ପ୍ରକଳ୍ପ ଏନଜିଟି ନିର୍ଦ୍ଦେଶକୁ ଉଲଂଘନ କରୁଥିବା ଓଡ଼ିଶା ଜଣାଇବା ସହ ନିର୍ମାଣ ପ୍ରକ୍ରିୟାକୁ ବନ୍ଦ କରିବାକୁ ଅନୁରୋଧ କରିଛନ୍ତି । ସେହିପରି ଏହା ସିଡବ୍ଲୁସିର ଗାଇଡ ଲାଇନ୍କୁ ଉଲଂଘନ କରୁଥିବା ଏହି ଚିଠିରେ ଜଣାଇଛନ୍ତି ଜଳ ସଂପଦ ସଚିବ ପ୍ରଦୀପ ଜେନା ।