ଚିଲିକା ଅଂଚଳରେ ମହିଳାଙ୍କୁ ସ୍ୱାବଲମ୍ବୀ କରିଛି ଶୁଖୁଆ ବ୍ୟବସାୟ । ବିଭିନ୍ନ ପ୍ରକାରର ଶୁଖୁଆ ବିକ୍ରି କରି ସ୍ୱାବଲମ୍ବୀ ହେଉଛନ୍ତି ଡାଇମଣ୍ଡ ପ୍ରଡ୍ୟୁସର ଗ୍ରୁପର ସଦସ୍ୟା
କନକ ବ୍ୟୁରୋ : ଚିଲିକାରୁ ମାଛ ସଂଗ୍ରହ କରି ଶୁଖୁଆ ପ୍ରସ୍ତୁତ କରୁଛନ୍ତି କୃଷ୍ଣପ୍ରସାଦ ବ୍ଲକ ନୂଆପଡ଼ା ପଂଚାୟତ ଖଟିସାହି ଗାଁର ୩୪ ଜଣ ମହିଳା । ଚିଲିକା ଡାଇମଣ୍ଡ ପ୍ରଡ୍ୟୁସର ଗ୍ରୁପ୍ ଗଠନ କରି ଏହି ମହିଳା ମାନେ ଶୁଖୁଆ ପ୍ରସ୍ତୁତ କରୁଛନ୍ତି । ନିଜର ଘର କାମ ସହ ଏହି କାମ ପାଇଁ ଦିନକୁ ୨ ଘଂଟା ସମୟ ଦେଉଛନ୍ତି । ରାଜ୍ୟର ବିଭିନ୍ନ ବଜାର ଓ ମେଳା ମହୋତ୍ସବରେ ମହିଳା ମାନେ ଏହି ଶୁଖୁଆ ବିକ୍ରି କରୁଛନ୍ତି । ଏଥିରୁ ଭଲ ଲାଭ ମିଳୁଥିବାରୁ ମହିଳା ମାନେ ମଧ୍ୟ ବେଶ ଖୁସି ଅଛନ୍ତି । ବିଭିନ୍ନ ପ୍ରକାରର ଶୁଖୁଆ ପ୍ରସ୍ତୁତ କରି ଅନେକ ପ୍ରଶଂସା ସାଉଁଟିଛନ୍ତି ଏହି ଗ୍ରୁପର ସଦସ୍ୟା ।
Kanak News is now on WhatsApp
Join and get latest news updates delivered to you via WhatsApp
ଚିଲିକା ଖଇଁଙ୍ଗା, କବଳା, ଡାଙ୍ଗାଳା, ଚାଉଳି, ପାତୁଆ, ପୋଲଗଣା, ରସ ପାତୁଆ, କଂଟି, ପଥରମୁଣ୍ଡି, ଗାଁଆଣ, ପାରେଇ, ଚାନ୍ଦି, ମରଡାଚିଙ୍ଗୁଡି ଏବଂ ପାନୁଚିଙ୍ଗୁଡି ଶୁଖୁଆ କରି ଭଲ ବ୍ୟବସାୟ କରୁଛନ୍ତି ଏହି ମହିଳା ମାନେ । ୨୦୨୦ ମସିହାରୁ କିଛି ରୁଣ ନେଇ ଏହି ବ୍ୟବସାୟ ଆପଣାଇଛନ୍ତି ଏହି ପ୍ରଡ୍ୟୁସର ଗ୍ରୁପ । ବିଭିନ୍ନ ଗାଁରୁ ଲୋକମାନେ ଆସି ଖଟିସାହି ଗାଁରୁ ଶୁଖୁଆ କିଣି ନେଉଛନ୍ତି । କମ୍ ଟଙ୍କା ଖର୍ଚ୍ଚ କରି ଅଧିକ ପରିମାଣର ଲାଭବାନ ହେଉଥିବା କଥା କହିଛନ୍ତି ଚିଲିକା ଡାଇମଣ୍ଡ ପ୍ରଡ୍ୟୁସର ଗୃପର ସଦସ୍ୟା । ଏହି ଶୁଖୁଆ ବ୍ୟବସାୟ ମହିଳା ମାନଙ୍କୁ ସ୍ୱାବଲମ୍ବୀ କରିଛି ।
ଗାଁ ମହିଳା ମାନେ କେବଳ ଘର କାମରେ ସୀମିତ ରୁହନ୍ତି ତା’ ନୁହେଁ, ସେମାନେ ମଧ୍ୟରେ କିଛି କାମ କରି ରୋଜଗାର କରିପାରନ୍ତି ତାହା ପ୍ରମାଣିତ କରିଛନ୍ତି ଏହି ଅଂଚଳର ମହିଳା । ଶୁଖୁଆ ବ୍ୟବସାୟ କରି ନିଜେ ସ୍ୱାବଲମ୍ବୀ ହେବା ସହ ଅନ୍ୟମାନଙ୍କ ପାଇଁ ଉଦାହରଣ ପାଲଛନ୍ତି ଚିଲିକା ଡାଇମଣ୍ଡ ପ୍ରଡ୍ୟୁସର ଗ୍ରୁପ୍ର ସଦସ୍ୟା ।