ବିଧାୟକ ପଦରୁ ଇସ୍ତଫା ଦେଲେ ଦିଲ୍ଲୀପ ରାୟ । ବାଚସ୍ପତିଙ୍କୁ ଭେଟି ଦେଲେ ଇସ୍ତଫା ପତ୍ର ।

କନକ ବ୍ୟୁରୋ : ବିଧାୟକ ପଦରୁ ଇସ୍ତଫା ଦେଲେ ରାଉରକେଲା ବିଧାୟକ ଦିଲ୍ଲୀପ ରାୟ । ବିଧାନସଭାରେ ବାଚସ୍ପତିଙ୍କୁ ଭେଟି ବିଧାୟକ ପଦରୁ ଇସ୍ତଫା ଦେଇଛନ୍ତି ବିଜେପିର ଏହି ବିଧାୟକ । ଦୀର୍ଘ ଦିନ ଧରି ଚାଲିଥିବା କଳ୍ପନା ଜଳ୍ପନା ଆଉ ଦିଲ୍ଲୀପଙ୍କ ଭବିଷ୍ୟତ ରଣନୀତି ଚର୍ଚ୍ଚା ଭିତରେ ଆଜି ଆସିଛି ସବୁଠାରୁ ବଡ ଖବର । ଆଇଜିଏଚକୁ ସୁପର ସ୍ପେଶାଲିଟି ହସ୍ପିଟାଲ କରିବା ଏବଂ ବ୍ରାହ୍ମଣୀ ଉପରେ ଦ୍ୱିତୀୟ ସେତୁ ପ୍ରସଙ୍ଗକୁ ନେଇ ଦିଲ୍ଲୀପ ଲଗାତର ଭାବେ ନିଜ ଅସନ୍ତୋଷ ଜାହିର କରି ଆସୁଥିଲେ ।

ସେ ବିଧାୟକ ଥିବା ଯାଏଁ ଏହି କାମ ହୋଇ ପାରିବ ନାହିଁ ଲୋକଙ୍କ ଭିତରେ ଏକ ଧାରଣ ତିଆରି ହୋଇଥିବା ଦିଲ୍ଲୀପ କନକ ନ୍ୟୁଜକୁ ସୂଚନା ଦେଇଥିଲେ । ସେହିଭଳି ଜଣେ କ୍ଷମତାଶାଳୀ ନେତା ସୁନ୍ଦରଗଡରେ ବିଜେପି ଭଲ ପ୍ରଦର୍ଶନ କରୁ ଚାହୁଁନଥିବା ଦିଲ୍ଲୀପ ଅଭିଯୋଗ କରିଥିଲେ । ଦିଲ୍ଲୀପ ଖାଲି ବିଧାୟକ ପଦରୁ ଇସ୍ତଫା ଦେଇନାହାନ୍ତି ବରଂ କେନ୍ଦ୍ରୀୟ ନେତୃତ୍ୱଙ୍କ ନିକଟକୁ ଦଳରୁ ଇସ୍ତଫା ଦେଇଥିବା ନେଇ ଚିଠି ମଧ୍ୟ ଲେଖିଛନ୍ତି । ତେବେ ଆଗାକୁ ଦିଲ୍ଲୀପ ରାୟ କଣ ପଦକ୍ଷେପ ନେବେ ତାଉପରେ ନଜର ରହିଛି ।