ୟୁଟ୍ୟୁବର ଧ୍ରୁବ୍ ରାଠୀଙ୍କ ବିରୋଧରେ ସ୍ୱାତୀ ମାଲିୱାଲଙ୍କ ବଡ ବୟାନ । କହିଲେ, ନିଜକୁ ସ୍ୱତନ୍ତ୍ର ସାମ୍ବାଦିକ କହୁଥିବା ଧ୍ରୁବ୍ ରାଠୀ ଆପ୍ ନେତାଙ୍କ ଘନିଷ୍ଠ ।
କନକ ବ୍ୟୁରୋ: ୟୁଟ୍ୟୁବର ଧ୍ରୁବ୍ ରାଠୀଙ୍କୁ ନେଇ ଆପ୍ ରାଜ୍ୟସଭା ସାଂସଦ ସ୍ୱାତୀ ମାଲିୱାଲଙ୍କ ବଡ ବୟାନ । ସ୍ୱାତୀ ଦାବି କରିଛନ୍ତି ଯେ, ନିଜକୁ ସ୍ୱତନ୍ତ୍ର ସାମ୍ବାଦିକ କହୁଥିବା ୟୁଟ୍ୟୁବର୍ ଧ୍ରୁବ୍ ରାଠୀ ଅସଲରେ ଆପ୍ ନେତାଙ୍କ ଘନିଷ୍ଠ । ତେବେ ସ୍ୱାତୀ ଏହା ମଧ୍ୟ କହିଛନ୍ତି ଯେ, ଧ୍ରୁବ୍ ରାଠୀ ତାଙ୍କ ବିରୋଧରେ ଏକତରଫା ଭିଡିଓ ପ୍ରସ୍ତୁତ କରି ଏହାକୁ ୟୁଟ୍ୟୁବରେ ସେୟାର କରିଛନ୍ତି । ଯାହା ପରେ ତାଙ୍କୁ ଲଗାତାର ଦୁଷ୍କର୍ମ ଏବଂ ହତ୍ୟା କରିବା ନେଇ ଧମକ ମିଳୁଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ, ଆପ୍ ରାଜ୍ୟସଭା ସାଂସଦ ସ୍ୱାତୀ ମାଲିୱାଲ କେଜ୍ରିୱାଲଙ୍କ ବ୍ୟକ୍ତିଗତ ସଚିବ ଥିବା ବିଭବ କୁମାରଙ୍କ ବିରୋଧରେ ମାରପିଟ୍ ଅଭିଯୋଗ ଆଣିଥିଲେ । ଯାହାପରେ ଏହି ମାମଲା କୋର୍ଟରେ ବିଚାରଧୀନ ରହିଛି । ଆଉ ଏହାରି ଭିତରେ ପୁଣି ଏକ ସଙ୍ଗୀନ ଅଭିଯୋଗ ଆଣିଛନ୍ତି ଏହି ଆପ୍ ସାଂସଦ ।
ତେବେ ପୂର୍ବରୁ ଦିଲ୍ଲୀ ମହିଳା ଆୟୋଗର ଅଧ୍ୟକ୍ଷ ଥିବା ସ୍ୱାତୀ ମାଲିୱାଲ ଦାବି କରିଛନ୍ତି ଯେ, ଧ୍ରୁବ୍ ରାଠୀ ଅସଲରେ ଆମ୍ ଆଦମୀ ପାର୍ଟି ସହ ଜଡିତ ଅଛନ୍ତି । ଏମିତି କି ସେ ଦଳ ପାଇଁ ଭଲ୍ୟୁଣ୍ଟର ମଧ୍ୟ ରହିସାରିଛନ୍ତି । ତା ସହିତ ସେ ଦଳର କିଛି ନେତାଙ୍କ ସହ ଘନିଷ୍ଠ । ପୂର୍ବରୁ ମଧ୍ୟ ତାଙ୍କ କାମକୁ ସେ ପସନ୍ଦ କରୁଥିଲେ, ହେଲେ ଏବେ କରୁନାହାଁନ୍ତି ବୋଲି କହିଛନ୍ତି ସ୍ୱାତୀ ମାଲିୱାଲ । ତେବେ ସ୍ୱାତୀଙ୍କ ଏହି ଅଭିଯୋଗ ନେଇ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ରଖିନାହାଁନ୍ତି ଧ୍ରୁବ୍ ରାଠୀ । ଅନ୍ୟପଟେ ସ୍ୱାତୀଙ୍କ କହିବା କଥା ହେଲା, ଧ୍ରୁବ୍ ରାଠୀଙ୍କ ଭିଡିଓ ପରେ ତାଙ୍କୁ ଲଗାତାର ଦୁଷ୍କର୍ମ ଏବଂ ହତ୍ୟା କରିବାର ଧମକ ମିଳୁଛି ।