କ୍ରିକେଟ ପଡିଆରେ ଅନେକ ରେକର୍ଡ ସୃଷ୍ଟି କରି ନିକଟରେ ଅବସର ନେଇଥିବା କ୍ୟାପଟେନ କୁଲ ମହେନ୍ଦ୍ର ସିଂହ ଧୋନୀଙ୍କୁ ଏବେ ଆଉ ଏକ ସମ୍ମାନ ମିଳିଛି | କ୍ରିକେଟରୁ ଅବସର ନେବା ପରେ ପଶୁପାଳନ ଓ ଚାଷରେ ଧ୍ୟାନ କେନ୍ଦ୍ରିତ କରିଥିବା ଧୋନୀଙ୍କୁ ପୂର୍ବ ଭାରତର ସର୍ବଶ୍ରେଷ୍ଠ ଗୋପାଳକ ଭାବେ ସମ୍ମାନିତ କରାଯାଇଛି | ଝାଡ଼ଖଣ୍ଡର ରାଞ୍ଚିରେ ଚାଲିଥିବା କୃଷକ ମେଳାରେ ପୂର୍ବ ଭାରତର ୧ନମ୍ବର ଗୋପାଳକ ଭାବେ ଧୋନୀଙ୍କୁ ଏହି ପୁରସ୍କାର ଦିଆଯାଇଛି |
Kanak News is now on WhatsApp
Join and get latest news updates delivered to you via WhatsApp
କୃଷକ ମେଳାରେ ଧୋନୀଙ୍କ ପକ୍ଷରୁ ତାଙ୍କ ଫାର୍ମରେ କାମ କରୁଥିବା ଗୋପାଳକ କୁନାଲ ଗୌରବ ଏହି ପୁରସ୍କାର ଗ୍ରହଣ କରିଛନ୍ତି | କୁନାଲ କହିଛନ୍ତି ଯେ ଧୋନୀଙ୍କ ଫାର୍ମରେ ଏବେ ୭୩ଟି ଗାଈ ଥିବାବେଳେ କ୍ଷୀର ଲିଟର ପିଛା ୫୫ ଟଙ୍କାରେ ବିକ୍ରି କରାଯାଉଛି | ଧୋନୀ ଫ୍ରେଜିୟାନ ଓ ସାହିୱାଲ ପ୍ରଜାତିର ଗାଈ ରଖିଥିବାବେଳେ ସାହିୱାଲ ପ୍ରଜାତିର ଗାଈ ଦିନକୁ ୧୨ ଲିଟର କ୍ଷୀର ଦେଉଛନ୍ତି | ସେହିପରି ଫ୍ରେଜିୟାନ ପ୍ରଜାତିର ଗାଈ ୩୨ ଲିଟର କ୍ଷୀର ଦେଉଛନ୍ତି |
ସୂଚନା ଥାଉ କି କ୍ରିକେଟରୁ ଅବସର ନେବା ପରେ ଧୋନୀ ଚାଷ ଓ ଗୋପାଳନରେ ବ୍ୟସ୍ତ ଅଛନ୍ତି | ଧୋନୀ ଶେଷ ଥର ପାଇଁ ନିଜ ଅନ୍ତରାଷ୍ଟ୍ରୀୟ ମ୍ୟାଚ ୨୦୧୯ ମସିହାରେ ଖେଳିଥିଲେ | କୃଷକ ମେଳାରେ ମୁଖ୍ୟ ଅତିଥି ଭାବରେ ଝାଡ଼ଖଣ୍ଡ ବିଧାନସଭା ଅଧ୍ୟକ୍ଷ ରବିନ୍ଦ୍ରନାଥ ମାହାତୋ ଯୋଗ ଦେଇଥିଲେ | ଏହି ଅବସରରେ ସେ କହିଛନ୍ତି ଯେ ଆଜି ଯିଏ ଚାଷ କାମ କରୁଛନ୍ତି, ସେମାନଙ୍କୁ ସମ୍ମାନିତ କରାଯିବା ଆବଶ୍ୟକ | ଚାଷକୁ ନ ଛାଡି ଏହା ସହ ଜଡିତ ରହିବାକୁ ସେ ପରାମର୍ଶ ଦେଇଥିଲେ |