ଆଇପିଏଲର ଚାଲୁଥିବା ବେଳେ ପୁଣିଥରେ ଭାଇରାଲ ହେଲା ଧୋନୀଙ୍କ ଫଟୋ । କାହିଁକି ଏମିତି କରନ୍ତି ଧୋନୀ, ପୂରା କାହାଣୀ କହିଲେ ଅମିତ ।
କନକ ବ୍ୟୁରୋ : ୪୦ ବର୍ଷ ବୟସରେ ବି କ୍ରିକେଟରେ ଧମାଲ କରୁଛନ୍ତି ଚେନ୍ନାଇ ସୁପର କିଙ୍ଗସର ମହେନ୍ଦ୍ର ସିଂ ଧୋନୀ । ଆଇପିଏଲରେ ଧୋନୀ ପୁଣିଥରେ ନିଜକୁ ପ୍ରମାଣିତ କରିଛନ୍ତି । ଅଧିନାୟକ ପଦ ହାତେଇବା କ୍ଷଣି ପୁଣିଥରେ ଚେନ୍ନାଇର ବିଜୟ ରଥ ଗଡିବା ଆରମ୍ଭ ହୋଇଛି । ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ଶେଷ ଆଡକୁ ଦ୍ରୁତ ରନ୍ ସଂଗ୍ରହ କରି ପୁଣିଥରେ ମାହି ଫର୍ମକୁ ଫେରିଥିବାର ସଂକେତ ଦେଇଛନ୍ତି । ତେବେ ଏହି ମ୍ୟାଚର ଏକ ଫଟୋ ଏବେ ସୋସିଆଲ ମିଡ଼ିଆରେ ଜୋରଦାର ଭାଇରାଲ ହେବାରେ ଲାଗିଛି । ଯେଉଁଥିରେ ଧୋନୀ ନିଜର ବ୍ୟାଟରେ କିଛି ଛିଣ୍ଡାଉଥିବାର ଦେଖିବାକୁ ମିଳିଛି । ଏହା ପ୍ରଥମ ଥର ନୁହେଁ ଯେବେ ଧୋନୀ ବ୍ୟାଟ ସହ ଏଭଳି କରିଛନ୍ତି । ଏହାପୂର୍ବରୁ ଅନେକଥର ଏଭଳି ଦେଖିବାକୁ ମିଳିଛି । ଆଉ ଧୋନୀ କାହିଁକି ଏଭଳି କରିଥାନ୍ତି ତାହା ଉପରୁ ପରଦା ହଟାଇଛନ୍ତି ପୂର୍ବତନ ଭାରତୀୟ କ୍ରିକେଟର ଅମିତ ମିଶ୍ରା ।
Kanak News is now on WhatsApp
Join and get latest news updates delivered to you via WhatsApp
ଅମିତ୍ ମିଶ୍ରା ଟ୍ୱିଟରରେ ଏକ ପୋଷ୍ଟ ସେୟାର କରି କହିଛନ୍ତି ଯେ, ଯଦି ଆପଣ ଭାବୁଥାନ୍ତି ଧୋନୀ ନିଜର ବ୍ୟାଟ ଖାଉଛନ୍ତି ତେବେ ଏହା ସମ୍ପୂର୍ଣ୍ଣ ଭୁଲ । କାରଣ ଧୋନୀ ନିଜ ବ୍ୟାଟରୁ ଅନେକ ସମୟରେ ଟେପ୍ ବାହାର କରିଥାନ୍ତି । ଧୋନୀ ସବୁବେଳେ ନିଜର ବ୍ୟାଟକୁ ସଫା ରଖିବାକୁ ପସନ୍ଦ କରିଥାନ୍ତି । ଯେଉଁଥିପାଇଁ ଧୋନୀଙ୍କ ବ୍ୟାଟରେ ଆପଣ କେବେ ବି ଗୋଟିଏ ସୂତା ବା ଟେପ୍ ଛିଣ୍ଡିଥିବାର ଦେଖିବାକୁ ପାଇବେନି ।
In case you’re wondering why Dhoni often ‘eats’ his bat. He does that to remove tape of the bat as he likes his bat to be clean. You won’t see a single piece of tape or thread coming out of MS’s bat. #CSKvDC #TATAIPL2022
— Amit Mishra (@MishiAmit) May 8, 2022
ଚଳିତ ବର୍ଷ ଆଇପିଏଲ ଖେଳୁନାହାନ୍ତି ଅମିତ ମିଶ୍ରା । ମେଗା ନିଲାମୀରେ ଅମିତଙ୍କୁ କୌଣସି ଟିମ୍ କିଣିନଥିବା ବେଳେ ଦିଲ୍ଲୀ କ୍ୟାପିଟାଲ୍ସ ପାଇଁ ସେ ଯେକୌଣସି ଭୂମିକାରେ ଉପଲବ୍ଧ ରହିବେ ବୋଲି କହିଥିଲେ । ଅମିତ ଏବେ ଆଇପିଏଲ ଖେଳୁନଥିବା ବେଳେ ସୋସିଆଲ ମିଡ଼ିଆରେ ବେଶ ସକ୍ରିୟ ରହିଛନ୍ତି । ଚଳିତବର୍ଷ ଚେନ୍ନାଇ ନିଜର ଚତୁର୍ଥ ବିଜୟ ହାସଲ କରିଛି । ଦିଲ୍ଲୀ ବିପକ୍ଷରେ ବିଜୟ ସହ ପଏଣ୍ଟ ଟେବୁଲର ଅଷ୍ଟମ ସ୍ଥାନକୁ ଉଠିଛି ଚେନ୍ନାଇ । ଏପରିକି ପୁଣିଥରେ ପ୍ଲେ-ଅଫରେ ଖେଳିବା ପାଇଁ ଚେନ୍ନାଇ ପାଇଁ ସୁଯୋଗ ସୃଷ୍ଟି ହୋଇଛି ।