ପୁଣି ଖବରରେ ଢିଙ୍କିଆ: ପସ୍କୋ ବେଳେ ବିବାଦରେ, ଏବେ ଜେଏସଡବ୍ଲ୍ୟୁ ପାଇଁ ଉତ୍ତେଜନା
କନକ ବ୍ୟୁରୋ: ପୁଂଜିଭୁତ ଅସନ୍ତୋଷ ନା ଶିଳ୍ପାୟନକୁ ବିରୋଧ କରିବାର ମାନସିକତା ପୁଣି ଢିଙ୍କିଆକୁ ବିବାଦୀୟ କରିଛି, ତାର କାରଣ ଖୋଜିବାକୁ ଆମେ ଚେଷ୍ଟା କରିଥିଲୁ । ପାରମ୍ପାରିକ ଭାବେ ଧାନ, ପାନ, ମୀନ ଉପରେ ନିର୍ଭର କରି ଚଳି ଆସୁଥିବା ଲୋକେ ନିଜର ଅସୁରକ୍ଷିତ ଭବିଷ୍ୟତକୁ ନେଇ ସନ୍ଦିହାନ ହେବା ପରେ ପ୍ରତିକ୍ରିୟାଶୀଳ ହୋଇଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଢିଙ୍କିଆ ପଂଚାୟତରେ ଥିବା ପାଟଣା ଏବଂ ମାହାଳ ଗ୍ରାମକୁ ଅଲଗା ରାଜସ୍ୱ ଭାବେ ଘୋଷଣା କରାଯିବା ପରେ ଗାଁ ଗାଁ ମଧ୍ୟରେ ଏକ ଅସହଯୋଗ ସ୍ଥିତି ସୃଷ୍ଟି ହୋଇଥିଲା । ପସ୍କୋ ପାଇଁ ଅଧିକୃତ ହୋଇଥିବା ଜମି ଯେତେବେଳେ ଜେଏସଡବ୍ଲ୍ୟୁ ପ୍ରକଳ୍ପ ପାଇଁ ବ୍ୟବହାର ହେବ ବୋଲି ନିଷ୍ପତି ହୋଇଥିଲା, ସେତେବେଳେ ବସ୍ତୁତଃ ଆଉ କୈାଣସି ସମସ୍ୟା ହେବନାହିଁ ବୋଲି ଅନୁମାନ କରାଯାଉଥିଲା । ହେଲେ ଅଧିକୃତ ଜମିରୁ ଯେତେବେଳେ ଉଛେଦ ଆରମ୍ଭ ହେଲା, ସେତେବେଳେ ଦେଖାଦେଇଥିଲା ବିବାଦ ।
୬୦୦ରୁ ଅଧିକ ପାନବରଜ ଯାହା ଅଧିକୃତ ଜମି ଉପରେ ରହିଛି, ତାକୁ ଉଛେଦ କରିବାକୁ ପ୍ରଶାସନ ପକ୍ଷରୁ ଉଦ୍ୟମ ଆରମ୍ଭ କରାଯାଇଛି । ସେହିଭଳି ମାହାଳ ପାଶ୍ୱର୍ରୁ ୧୭ କମି ଯାଏଁ ରାସ୍ତା ନିର୍ମାଣ ଆରମ୍ଭ କରାଯିବାକୁ ଲକ୍ଷ୍ୟ ରହିଛି । ହେଲେ ବର୍ଷ ବର୍ଷ ଧରି ଜମି ଉପରେ ପାନବରଜ କରି ପରିବାର ପୋଷୁଥିବା ଲୋକ, ଏହାକୁ ବିରୋଧ କରୁଛନ୍ତି ।
ସରକାରୀ ଜମି ଉପରେ ଯାହାର ପାନବରଜ ରହିଥିଲା, ତାକୁ ଉଛେଦ ବେଳେ ମଧ୍ୟ କ୍ଷତିପୂରଣ ଘୋଷଣା କରାଯାଇଛି । ଡିସିମିଲ ପିଛା ୧୭ ହଜାର ୫୦୦ ଟଙ୍କା ଘୋଷଣା କରାଯାଇଛି । ହେଲେ ଲୋକେ ବିକଳ୍ପ ଜମି ପଟ୍ଟା ଦାବି କରିବା ସହ ଛକାପଂଜା ପରିସ୍ଥିତି ସୃଷ୍ଟି କରି ଆସିଛନ୍ତି । ହେଲେ ଅନ୍ୟପଟେ ୧୧ ଦଫା ଦାବି ସହ ଗୋବିନ୍ଦପୁର, ନୂଆଗାଁ ଓ ଗଡକୁଜଙ୍ଗ ଅଂଚଳରେ ଲୋକ ପ୍ରକଳ୍ପ କାର୍ଯ୍ୟ ଆଗେଇ ନେବାକୁ ଯୁକ୍ତି ରଖିଛନ୍ତି ।
ବଡ କଥା ହେଉଛି, ପ୍ରଶାସନ ପକ୍ଷରୁ ଯେତେବେଳେ ପାନବରଜ ଭାଙ୍ଗିବା ପାଇଁ ମାପଚୁପ ଆରମ୍ଭ କରାଯାଇଥିଲା, ସେତେବେଳେ କିଛି ଗ୍ରାମବାସୀ ନିଜଆଡୁ ଆସି ଏଥିରେ ସାମିଲ ହୋଇଥିଲେ । ହେଲେ ପୁଲିସ ଉପସ୍ଥିତିରେ ଚାଲିଥିବା ଏହି କାର୍ଯ୍ୟ ବେଳେ ଚାପା ଉତେଜନା ଦେଖିବାକୁ ମିଳିଥିଲା ।
ପୂର୍ବରୁ ପୁଲିସ ଓ ଢିଙ୍କିଆ ଗ୍ରାମବାସୀଙ୍କ ମଧ୍ୟରେ ଛକାପଂଜା ଦେଖିବାକୁ ମିଳିଥିଲା ଯେତେବେଳେ ପ୍ରକଳ୍ପ ବିରୋଧୀ ନେତାଙ୍କୁ ଜୋର ଜବରଦସ୍ତି ଗିରଫ କରିବା ପାଇଁ ପ୍ରଶାସନ ଉଦ୍ୟମ କରୁଥିବା ଅଭିଯୋଗ ହୋଇଥିଲା । ଏପରିକି ଢିଙ୍କିଆର ତିନି ପ୍ରବେଶ ପଥରେ ବାଉଁଶ ଫାଟକ କରି ଗ୍ରାମବାସୀ ଜଗି ରହିଥିଲେ । ଗାଁକୁ ଯେଭଳି ପୁଲିସ ପଶିପାରିବନି ସେନେଇ ଫତୱା ବି ଜାରି କରିଥିଲେ ।
ପସ୍କୋ ପାଇଁ ଅଧିକୃତ ୨୭୦୦ ଏକର ଜମି ଉପରେ ଜେଏସଡବଲ୍ୟୁ ପ୍ରକଳ୍ପ କରିବାକୁ ପ୍ରଶାସନ କରୁଥିବା ଉଦ୍ୟମ ଏବଂ ଗ୍ରାମବାସୀଙ୍କ ବିରୋଧ ଭିତରେ ଆଗାମୀ ଦିନରେ ସ୍ଥିତି କଣ ହେବ, ତାଉପରେ ନଜର ।