‘ରୂପାନ୍ତରିକରଣ ନା ପ୍ରତାରଣା’: ଖୋଲା ବିତର୍କ ପାଇଁ ନବୀନଙ୍କୁ ଧର୍ମେନ୍ଦ୍ରଙ୍କ ଆହ୍ୱାନ
କନକ ବ୍ୟୁରୋ: ବିଭିନ୍ନ ଯୋଜନା ଦ୍ୱାରା ରାଜ୍ୟରେ ରୂପାନ୍ତରଣ ହେଉଥିବା, ରାଜ୍ୟ ସରକାର ଦାବି କରୁ ଆସୁଛନ୍ତି । ସ୍ୱାସ୍ଥ୍ୟ, ଶିକ୍ଷା, କଳା କ୍ଷେତ୍ରରେ ପରିବର୍ତନ ଆସିଥିବା କହୁଛନ୍ତି । କିନ୍ତୁ ସରକାରଙ୍କ ଏହି ଦାବିକୁ କଡା ସମାଲୋଚନା କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସ୍ୱାସ୍ଥ୍ୟ, ଶିକ୍ଷା, ଜଳସେଚନ ଓ ଆଇନଶୃଂଖଳା ସମେତ ଏକାଧିକ ପ୍ରସଙ୍ଗ ଉଠାଇ ଏହା କେମିତିକା ରୂପାନ୍ତରଣ ବୋଲି ପ୍ରଶ୍ନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଜେଡି ନେତାମାନେ ବାରମ୍ବାର ଟାର୍ଗେଟ କରି ଆସୁଥିଲେ ବି ପ୍ରାୟତଃ ଚୁପ ରହୁଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କଡା ଜବାବ ଦେଇଛନ୍ତି । କିନ୍ତୁ ଏଥର ଧର୍ମେନ୍ଦ୍ର ସିଧାସଳଖ ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରିଛନ୍ତି । ବିଜେପିର ମିଶ୍ରଣ ପର୍ବ ମଂଚରୁ ନବୀନ ପଟ୍ଟନାୟକଙ୍କୁ ସିଧାସଳଖ ଖୋଲା ବିତର୍କ ପାଇଁ ଆହ୍ୱାନ ଦେଇଛନ୍ତି । କହିଛନ୍ତି, ୨୫ ବର୍ଷ ହେଲା ଲୋକ ଆପଣଙ୍କୁ ଭରସା କଲେ, ଖାଲି ରୂପାନ୍ତରଣ କଥା କହୁଛନ୍ତି । ହେଲେ ଏହାର ହିସାବ ଦେବାକୁ ପଡିବ । ରପୂାନ୍ତରଣ ନା ପ୍ରତାରଣା? ରୂପାନ୍ତରଣ ନା ଛଳନା? କେବଳ ଏତିକି ନୁହେଁ ବିଏସକେୱାଇ କାର୍ଡ, ଉଜ୍ୱଳା ଯୋଜନା କଥା ଉଠାଇ ସରକାର ଓ ବିଜେଡି ନେତାଙ୍କ ଉପରେ ବର୍ଷିଛନ୍ତି । ଏଥିସହ ମୁଖ୍ୟମନ୍ତ୍ରୀଙ୍କୁ ଶ୍ୱେତପତ୍ର ପ୍ରକାଶ କରିବାକୁ ଆହ୍ୱାନ ଦେଇଛନ୍ତି ଧର୍ମେନ୍ଦ୍ର ।
ବିତର୍କ ପାଇଁ ମୁଖ୍ୟମନ୍ତ୍ରୀଙ୍କୁ ଧର୍ମେନ୍ଦ୍ର ଆହ୍ୱାନ ଦେବା ପରେ ପାଲଟା ପ୍ରଶ୍ନ କରିଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ଟୁଇଟ୍ କରି ଲେଖିଛନ୍ତି, ଭାଇ ଆପଣଙ୍କୁ ଆଇନା ଦେଖାଇଲେ ଏତେ ଚିଡି ଯାଉଛନ୍ତି କଣ ପାଇଁ? ୩ଟି ସାଧାରଣ ପ୍ରଶ୍ନ ଆପଣଙ୍କୁ ପଚରାଯାଇଥିଲା । … ଲାଗୁଛି ପ୍ରଶ୍ନ ସବୁ ଶୁଣି ଆପଣ ରାଗି ଯାଇଛନ୍ତି ଓ ରକ୍ତଚାପ ବଢ଼ିଯାଇଛି । ଆପଣ ଅନ୍ତର୍ଜାତୀୟ ଯୋଗ ଦିବସରେ ଯୋଗ କରିଥିବା ଦେଖିଥିଲି । ଅନୁରୋଧ କରୁଛି ଏବେ ନିୟମିତ ଭାବେ ଯୋଗ କରନ୍ତୁ ।
କେବଳ ପ୍ରଣବ ପ୍ରକାଶ ଦାସ ନୁହନ୍ତି, ବିଜେଡିର ଅନ୍ୟନେତାମାନେ ମଧ୍ୟ ଧର୍ମେନ୍ଦ୍ରଙ୍କ ସମାଲୋଚନାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ଅନୁଗୋଳ ଓ ସମ୍ବଲପୁର ଗସ୍ତବେଳେ କେନ୍ଦ୍ରମନ୍ତ୍ରୀଙ୍କୁ ଟାର୍ଗେଟ କରିଥିଲେ ଫାଇଭ-ଟି ଅଧ୍ୟକ୍ଷ ଭି.କେ.ପାଣ୍ଡିଆନ । ଶିକ୍ଷା ଓ ଦକ୍ଷତା ବିକାଶ ମନ୍ତ୍ରୀ ହୋଇ ବି ନିଜ ମାଟି ପାଇଁ ବିଶ୍ୱବିଦ୍ୟାଳୟ, କି ଗୋଟିଏ ନୂଆ କେନ୍ଦ୍ରୀୟ ବିଦ୍ୟାଳୟ କିମ୍ବା ଜବାହର ନବୋଦୟ ବିଦ୍ୟାଳୟଟେ କରି ନାହାନ୍ତି ବୋଲି ଅଭିଯୋଗ କରିଥିଲେ । ଦକ୍ଷତା ବିକାଶ କେନ୍ଦ୍ରଟେ ବି ସ୍ଥାପନ କରିନାହାନ୍ତି ବୋଲି କହିଥିଲେ । ଜାତୀୟ ରାଜପଥ-୫୫ର ଅବସ୍ଥା ନେଇ କେନ୍ଦ୍ରମନ୍ତ୍ରୀଙ୍କୁ ପ୍ରଶ୍ନ କରିଥିଲେ । ..ତେବେ ପ୍ରଣବଙ୍କ ଅଭିଯୋଗ ପରେ ବିଜେପି ବିଧାୟକ ଲଳିତେନ୍ତୁ ବିଦ୍ୟାଧର ମହାପାତ୍ର ଟୁଇଟ୍ କରି ତାଙ୍କୁ କଡା ସମାଲୋଚନା କରିଛନ୍ତି ।