କେନ୍ଦ୍ରମନ୍ତ୍ରୀ ଧର୍ମେନ୍ଦ୍ରଙ୍କ ରାବଣ ଓ ଦୁର୍ଯ୍ୟୋଧନ ଉପାଖ୍ୟାନ, ଟାର୍ଗେଟରେ ରାଜ୍ୟ ସରକାର ।
କନକ ବ୍ୟୁରୋ : ମାହାଙ୍ଗା ଡବଲ ମର୍ଡର ଘଟଣାକୁ ଏହା ଭିତରେ ବର୍ଷେ ପୁରିଛି । ବିଜେପି ନେତା କୁଳମଣି ବରାଳ ଓ ଦିବ୍ୟସିଂହ ବରାଳଙ୍କ ଶ୍ରଦ୍ଧାଞ୍ଜଳି ସଭା ପାଳିଛି ଦଳ । ଆଉ ଏହି ଅବସରରେ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ନୂଆବର୍ଷ ଆରମ୍ଭରୁ ନବୀନ ସରକାରକୁ ବାଣ ମାରିଛନ୍ତି ଧର୍ମେନ୍ଦ୍ର । ଆଉ ଏହାସହ ନବୀନ ସରକାରର କାର୍ଯ୍ୟଶୈଳୀ ଉପରେ ପ୍ରଶ୍ନ ଉଠାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମାହାଙ୍ଗା ହତ୍ୟାକାଣ୍ଡକୁ ବର୍ଷେ ପୁରିଥିଲେ ଏହାର ତଦନ୍ତ କେଉଁଠି ପହଞ୍ଚିଛି? ଏଫଆଇଆର କପିରେ ବେଆଇନ ମନ୍ତ୍ରୀଙ୍କ ନାଁ ଥିଲେ ମଧ୍ୟ ଚାର୍ଜସିଟରୁ କାହିଁକି କାଟି ଦିଆଗଲା? କୁଳମଣିଙ୍କ ପୁଅଙ୍କ ଅଭିଯୋଗକ୍ରମେ ତଦନ୍ତ ସଠିକ ଢଙ୍ଗରେ ହୋଇନଥିବା କୁହାଯାଇଥିଲା । ପରେ ଏହି ମାମଲାର ମୁଖ୍ୟ ଅଭିଯୁକ୍ତ ଥିବା ବ୍ୟକ୍ତିଙ୍କର ମୃତଦେହ ମନ୍ତ୍ରୀଙ୍କ ବ୍ୟବସାୟିକ ପେଣ୍ଠସ୍ଥଳୀରୁ ମିଳିଥିଲା । ପରେ କୋର୍ଟରେ ମାମଲା ପହଞ୍ଚିବାରୁ ଚାର୍ଜସିଟରେ ମନ୍ତ୍ରୀଙ୍କ ନାଁ ରଖିବାକୁ ମଧ୍ୟ ନିର୍ଦ୍ଦେଶ ଦେଇଥିଲେ କୋର୍ଟ । ମୋ ସରକାରର ନାରା ଦିଆଯାଉଛି, ପାରଦର୍ଶୀ ସରକାର ବୋଲି କହୁଛନ୍ତି । କିନ୍ତୁ ସ୍ଥିତି କଣ ସମସ୍ତେ ଜାଣୁଛନ୍ତି । ଅନ୍ୟାୟ, ଅତ୍ୟାଚାର ବିରୋଧରେ ଲଢେଇ କରି କୁଳମଣି ପ୍ରାଣ ଦେଇଛନ୍ତି, ଆଉ ଏହି ବଳିଦାନ କେବେ ବ୍ୟର୍ଥ ଯିବନି ।
ଧର୍ମେନ୍ଦ୍ର କହିଛନ୍ତି, ନୂଆ ଡିଜି ଓଡ଼ିଶାରେ ପହଞ୍ଚିଛନ୍ତି, ତାଙ୍କ ଠାରୁ କୁଳମଣିଙ୍କୁ ଭଲ ପାଉଥିବା ବ୍ୟକ୍ତି ନ୍ୟାୟ ପାଇବା ଆଶାରେ ରହିଛନ୍ତି । ଓଡ଼ିଶାରେ ସାଇବର ଅପରାଧ ଭଲ ଭାବେ ନିୟନ୍ତ୍ରଣ କରାଯାଉଥିବା ଡିଜି କହୁଛନ୍ତି କିନ୍ତୁ ସ୍ଥାନୀୟ ପୋଲିସ ଅଧିକାରୀ, ଆଇନ ବିଭାଗର ଅଧିକାରୀ ମାଜିଷ୍ଟ୍ରେଟଙ୍କ ଆଗରେ କାହିଁକି କହୁଛନ୍ତି ଯେ, ସିଡିଆର ରିପୋର୍ଟ ମାଗିଛୁ କିନ୍ତୁ ଏଯାଏଁ ମିଳିନି । କାହିଁକି ବ୍ୟକ୍ତିଗତ ଭାବେ ହାଜର ହେଉନଥିଲେ ପୋଲିସ ଅଧିକାରୀ । ଆଇନ ତା ବାଟରେ ଯିବ ବୋଲି କହୁଥିବା ରାଜ୍ୟ ସରକାରଙ୍କ ଶାସନ ବ୍ୟବସ୍ଥା କାହିଁକି ତଳ କୋର୍ଟର ଅଧିକାର ନାହିଁ ବୋଲି କହୁଥିଲା । ନ୍ୟାୟପାଳିକା ଉପରେ କାହିଁକି ବିଶ୍ୱାସ କରୁନଥିଲେ । ସ୍ଥାନୀୟ ମାଜିଷ୍ଟ୍ରେଟ ତ କୌଣସି ଦଳୀୟ ଲୋକ ନଥିଲେ । କାହିଁକି କୋର୍ଟର କଥା ମାନୁନାହାନ୍ତି । ଡର ରହିଛି କୋର୍ଟ କଥା ମାନିଲେ ଚୋରି ଧରାପଡିଯିବ ।
ଆୱାସ ଯୋଜନାରେ ଦେଢ ହଜାର କୋଟି ଟଙ୍କା ଚୋରି ହୋଇଛି । ଫୋନି ପରେ ପ୍ରଧାନମନ୍ତ୍ରୀ ଓଡ଼ିଶା ଆସି ବୁଲି ଦେଖିଥିଲେ । ଘର ଦେବାକୁ ପୋର୍ଟାଲ ଖୋଲାଯାଇଥିଲା କିନ୍ତୁ ନାଁ ଦେଲେନି ରାଜ୍ୟ ସରକାର । ରାଜ୍ୟ ସରକାରଙ୍କ ଓଡ଼ିଆ ଲୋକଙ୍କର ଚିନ୍ତା ନାହିଁ । ଓଡ଼ିଆ ଲୋକଙ୍କର ମୁଣ୍ଡ ଉପରେ ଘର ରହୁ ଏ ଦରଦ ଆପଣଙ୍କ ପାଖରେ ନାହିଁ । କେବଳ ଜୋରଜବରଦସ୍ତ କରି ଶାସନ ଚଳାଇବା ନୀତି ହୋଇଗଲାଣି । ଏହା ଆପଣଙ୍କ ସରକାରର ଯୋଜନା ହୋଇଗଲାଣି ।
ଅବ୍ୟବସ୍ଥା,ଅତ୍ୟାଚାର ଓ ଅନ୍ୟାୟକୁ ଲୋକେ ସହନ୍ତି ନାହିଁ । ରାବଣ, ଦୁର୍ଯ୍ୟୋଧନଙ୍କର ବି ଅହଙ୍କାର ଦମ୍ଭ ଥିଲା, ଆପଣଙ୍କ ଅହଙ୍କାରକୁ ବି ମହାପ୍ରଭୁ ଜଗନ୍ନାଥ ଦେଖୁଛନ୍ତି । କେଡେ କେଡେ ବଡ ବ୍ୟକ୍ତିଙ୍କ ଦର୍ପକୁ ମହାପ୍ରଭୁ ଭାଙ୍ଗିଛନ୍ତି । ତଳକୋର୍ଟର ନିଷ୍ପତ୍ତିକୁ କାହିଁକି ଆପଣଙ୍କ ପୋଲିସ ମାନିଲା ନାହିଁ । କାହିଁକି ଏଡିଜିଏମ କୋର୍ଟକୁ ଗଲେ । ଏଡିଜିଏ କୋର୍ଟକୁ କାହିଁକି କଡା କଥା କହିବାକୁ ପଡିଲା । ଗରିବ ଲୋକଙ୍କ ଟିକସରେ ସରକାରୀ ପୋଲିସ, ବାବୁଙ୍କୁ ଦରମା ଦେଉଛନ୍ତି, ଆଉ ସେହି ଅଧିକାରୀଙ୍କୁ ଗରିବ ଲୋକଙ୍କ ବିରୋଧରେ ଲଗାଉଛନ୍ତି । ଆପଣଙ୍କ ଦିନ କାଳ ଧୀରେ ଧୀରେ ଶେଷ ହେବ, କୁଳମଣି ବାବୁଙ୍କ ବଳିଦାନ କେବେ ବ୍ୟର୍ଥ ହେବନି ।