ଦିଲ୍ଲୀରେ କମିଲା ଦୂରତା ? ସାଢ଼େ ୪ କୋଟି ଓଡିଆଙ୍କ ସୁଖ ପାଇଁ ହେଲା ସାକ୍ଷାତ । ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ମିଳିଲା ୩ କୋଟି
କନକ ବ୍ୟୁରୋ: ନିର୍ବାଚନ ସରିବାକୁ ଆଉ ଫଳାଫଳ ବାହାରିବାକୁ ମାସଟିଏ ବି ହେଇନି ହେଲେ ସରି ଯାଇଛି ସବୁ ଶତ୍ରୁତା । ଯୁଦ୍ଧ ମାଟିରେ ହିଁ ମିଳେଇ ଯାଇଛି ରାଜନୀତିର ସବୁ ରାଗ । ବାକଯୁଦ୍ଧରେ ପଡି଼ଛି ଯବନିକା ଆଉ ଟାଣ ଖରାରେ ମିଳେଇ ଯାଇଛି ପରସ୍ପରକୁ କରାଯାଉଥିବା ଟାର୍ଗେଟ । ନିର୍ବାଚନ ପୂର୍ବରୁ ରାଜନୈତିକ ଦଳମାନଙ୍କ ମଧ୍ୟରେ ଯେଉଁ ଦୋଷ ଲଦାଲଦି ଚାଲିଥିଲା ଫୋନି ପବନରେ ସେସବୁ ଉଡିଯାଇଛି । ଉଭୟ କେନ୍ଦ୍ର-ରାଜ୍ୟ ମଧ୍ୟରେ ଯେଉଁ ତୁତୁ ମେଁମେଁ ଚାଲିଥିଲା ତାହା ଏବେ ମିଳେଇ ଯାଇଛି । ଆଉ ତାହାର ପ୍ରଭାବରେ ଉଭୟ କେନ୍ଦ୍ର-ରାଜ୍ୟର ହେଭିୱେଟମାନେ ପରସ୍ପରର ପାଖାପାଖି ହେଉଛନ୍ତି । ଯାହାର ଉଦାହରଣ ଆଜି ନବୀନ-ଧର୍ମେନ୍ଦ୍ରଙ୍କ ଭେଟଘାଟରୁ ବାରି ହୋଇପଡିଛି । ତେବେ ନୂଆଦିଲ୍ଲୀରେ ନବୀନ-ଧର୍ମେନ୍ଦ୍ର ଉଭୟ ଉଭୟଙ୍କୁ ଅଦିନିଆ ସାକ୍ଷାତ କରିବା ପରେ ଚର୍ଚ୍ଚା ଜୋର ଧରିଛି । ଧର୍ମେନ୍ଦ୍ର ନବୀନଙ୍କୁ ଭେଟି ଏକ ଫୁଲତୋଡା ଦେଇଥିଲେ । ଆଉ ନବୀନ ବି ତାକୁ ସାଦରେ ଗ୍ରହଣ କରିଥିଲେ । ନବୀନ-ଧର୍ମେନ୍ଦ୍ରଙ୍କ ମଧ୍ୟରେ ଫୁଲତୋଡା ଏକ ବଡ ଗୁରୁତ୍ୱ ବହନ କରିଥିଲା । ତେଣୁ ଫୁଲତୋଡାକୁ ନେଇ ରାଜ୍ୟ ରାଜନୀତିରେ ମଧ୍ୟ ଚର୍ଚ୍ଚା ହେଉଥିବା ଶୁଣିବାକୁ ମିଳିଛି । ଫୋନି ପରେ ଫୁଲତୋଡା ବିଜେପି-ବିଜେଡି ମଧ୍ୟରେ ଫାଟ ଯୋଡୁଥିବା ଚର୍ଚ୍ଚା ଫୁସୁରୁ ଫାସୁରୁ ଶୁଣାଯାଉଛି । ମାତ୍ର ସେ ଚର୍ଚ୍ଚାକୁ ଫର୍ଚ୍ଚା କରି ଉଭୟେ କହିଛନ୍ତି ସାକ୍ଷାତକାର ସୌଜନ୍ୟମୂଳକ ଥିଲା । କୌଣସି ରାଜନୈତିକ ଉଦ୍ଦେଶ୍ୟ ନଥିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ ନିର୍ବାଚନ ପୂର୍ବରୁ ଆଉ ନିର୍ବାଚନ ବେଳେ ଉଭୟ ଉଭୟଙ୍କୁ ଗାଳି ଦେଉଥିବା ହେଭିୱେଟ ନେତା ଏବେ ଫୁଲତୋଡା ଦେଇ ଦୁହେଁ ଦୁହିଁଙ୍କ ପାଖାପାଖି ହୋଇଛନ୍ତି । ସେପଟେ ରାଜ୍ୟର ସ୍ୱାର୍ଥ, ରାଜ୍ୟର ବିକାଶ ପାଇଁ ଆଉ ସାଢ଼େ ୪ କୋଟି ଓଡିଆଙ୍କ ସୁଖ ପାଇଁ ଏ ସାକ୍ଷାତ ବୋଲି ଧର୍ମେନ୍ଦ୍ର ପ୍ରଧାନ କହିଛନ୍ତି ।
ଇସ୍ପାତ କ୍ଷେତ୍ରରେ ଆଗାମୀ ଦିନରେ ଓଡିଶାକୁ ଫୋକସକ କରାଯିବ । ଇସ୍ପାତ ପଲିସିରେ ୩୦୦ ମିଲିୟନ ମେଟ୍ରିକ ଟନ ଷ୍ଟିଲ ଉତ୍ପାଦନ ହେବା ଲକ୍ଷ୍ୟ ରଖା ଯାଇଥିବା ବେଳେ ସେଥିକୁ କେବଳ ଓଡିଶାରୁ ୧୦୦ ମିଲିୟନ ମେଟ୍ରିକ ଟନ ଷ୍ଟିଲ ଉତ୍ପାଦନ ହେବ । ଓଡିଶାର ବିକାଶ ପାଇଁ କେନ୍ଦ୍ରର ଦାୟିତ୍ୱ ଅଛି ତେଣୁ ଆଗାମୀ ଦିନରେ ଇସ୍ପାତ କ୍ଷେତ୍ରରେ ଓଡିଶାକୁ ଗୁରୁତ୍ୱ ଦିଆଯିବ ବୋଲି ନବୀନଙ୍କୁ ଭେଟିବା ପରେ ଧର୍ମେନ୍ଦ୍ର କହିଛନ୍ତି । ତେବେ ସାକ୍ଷାତ ଅବସରରେ ଷ୍ଟିଲ ଅଥରିଟି ଅଫ ଇଣ୍ଡିଆ ପକ୍ଷରୁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ୩ କୋଟି ଟଙ୍କା ପ୍ରଦାନ କରା ଯାଇଛି । ଏହା ସହ ଫୋନି ପରେ ପୁନରୁଦ୍ଧାରରେ ବାକି ରହିଥିବା କାମକୁ କେନ୍ଦ୍ର କରିବ ବୋଲି ଭେଟଘାଟରୁ ସ୍ପଷ୍ଟ ହୋଇଛି ।