ରାତି ପାହିଲେ ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ଘୋଷଯାତ୍ରା । ବିଭିନ୍ନ ସ୍ଥାନରେ ଭକ୍ତ ତିଆରି କଲେ କୁନି ନନ୍ଦିଘୋଷ ।
କନକ ବ୍ୟୁରୋ: ରାତି ପାହିଲେ ମହାପ୍ରଭୁଙ୍କ ସବୁଠାରୁ ବଡଯାତ୍ରା ଘୋଷଯାତ୍ରା । କୋଟି ଜଗନ୍ନାଥ ପ୍ରେମୀ ମହାପ୍ରଭୁଙ୍କ ଏହି ଘୋଷଯାତ୍ରା ଦେଖିବାକୁ ଚାତକ ପରି ଚାହିଁ ରହିଛନ୍ତି । ଏମିତି ସମୟରେ କେହି କେହି ନିଆରା ଢ଼ଙ୍ଗରେ ରଥ ତିଆରି କରି ନିଜର ଭାବକୁ ପ୍ରକାଶ କରିଛନ୍ତି । ଶିଳ୍ପୀ ସୁବଳ ମହାରଣା ବିଶ୍ୱର ସବୁଠାରୁ କୁନି ରଥ ନିର୍ମାଣ କରି ଚର୍ଚ୍ଚାକୁ ଆସିଛନ୍ତିି । ସୁବଳ ତିଆରି କରିଥିବା ରଥର ଉଚ୍ଚତା ଦେଢ଼ ସେଣ୍ଟିମିଟର ରହିଥିବାବେଳେ ଚଉଡା ମାତ୍ର ୧.୪ ସେଣ୍ଟିମିଟର ରହିଛି । ନିମ୍ବ, ବେଲ, ତୁଳସୀ, ଗୁଆ କାଠରେ ୪ଘଣ୍ଟାରେ କୁନି ରଥ ନିର୍ମାଣ କରିଛନ୍ତି ସୁବଳ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଯୁକ୍ତ ତିନିରେ ପାଠପଢ଼ୁଥିବା ପୁରୀର ଶାଶ୍ୱତ ରଞ୍ଜନ ସାହୁ, ଦିଆସିଲି କାଠିରେ ବଳଭଦ୍ରଙ୍କ ତାଳଧ୍ୱଜ ରଥ ନିର୍ମାଣ କରିଛନ୍ତି । ସେ ଏଥିରେ ୧୦ ହଜାର ୨୨୦ଟି ଦିଆସିଲ କାଠି ବ୍ୟବହାର କରିଛନ୍ତି । ଏହି ରଥର ଉଚ୍ଚତା ୩୨ ଇଞ୍ଚ୍ ଥିବାବେଳେ ଚଉଡା ରହିଛି, ୧୪ ଇଞ୍ଚ । ୧୧ଦିନରେ ଏହି ରଥ ନିର୍ମାଣ କରିଛନ୍ତି ଶାଶ୍ୱତ ।
ଅନ୍ୟପଟେ ରାଉରକେଲାର ବାସନ୍ତୀ କଲୋନୀରେ ରହୁଥିବା ଦଶମ ଶ୍ରେଣୀର ଛାତ୍ର ପିୟୁଷ ନାୟକ କାଠ ଓ ସୋଲରେ ପ୍ରସ୍ତୁତ କରିଛନ୍ତି ଏକ କାରୁକାର୍ଯ୍ୟପୂର୍ଣ୍ଣ ରଥ । ସାଢ଼େ ୩ ଫୁଟର ରଥ ତିଆରି କରିବାକୁ ପିୟୁଷଙ୍କୁ ଲାଗିଛି ୨୦ ଦିନ । ମହାମାରୀ ଯୋଗୁଁ ଶ୍ରଦ୍ଧାଳୁମାନେ ସିନା ପୁରୀକୁ ଯାଇ ମହାପ୍ରଭୁଙ୍କ ରଥକୁ ଟାଣିବାର ସୁଯୋଗରୁ ବଞ୍ଚତ ହୋଇଛନ୍ତିି । କିନ୍ତୁ ବଡ ଦିଅଁଙ୍କର କୁନି ରଥ ନିର୍ମାଣ କରି ଭକ୍ତମାନେ ସେମାନଙ୍କ ଭାବନାକୁ ପ୍ରକାଶ କରିଛନ୍ତି ।