ଭୂବନେଶ୍ୱର ସୂର୍ଯ୍ୟନଗରରେ ଘରେ ଘରେ ପହଞ୍ଚିଲା ରାସନ ସାମଗ୍ରୀ । ଅବରୋଧ ଅଂଚଳ ଘୋଷଣା ପରେ ବିଏମସିର ତ୍ୱରିତ ପଦକ୍ଷେପ
ଜନସାଧାରଣଙ୍କ ସ୍ୱାର୍ଥ ପାଇଁ ପଂଚମ ବ୍ୟକ୍ତିଙ୍କ ପରିଚୟ ସାର୍ବଜନୀନ କରିବା ସହ ସୂର୍ଯ୍ୟନଗରକୁ ସିଲ୍ କରିଛନ୍ତି ସରକାର
କନକ ବ୍ୟୁରୋ: ଭୂବନେଶ୍ୱର ସୂର୍ଯ୍ୟନଗରରେ ଘରେ ଘରେ ପହଂଚିଲା ରାସନ ସାମଗ୍ରୀ । ପଂଚମ କରୋନା ଆକ୍ରାନ୍ତ ବ୍ୟକ୍ତି ଘର ଏହି ଅଂଚଳରେ ହୋଇଥିବାରୁ ଏହାକୁ ଅବରୋଧ ଅଂଚଳ ଘୋଷଣା କରିବା ପରେ ଭୁବନେଶ୍ୱର ମହାନଗର ନିଗମ ତ୍ୱରିତ ପଦକ୍ଷେପ ନେଇଛି । ଏହି ଅଂଚଳକୁ ସଂପୂର୍ଣ୍ଣ ସିଲ କରିବା ପରେ ଘରେ ଘରେ ରାସନ ସାମଗ୍ରୀ, ପନିପରିବା ଓ ବିଭିନ୍ନ ଅତ୍ୟାବଶକୀୟ ସାମଗ୍ରୀ ପହଂଚାଇବା ଉପରେ ଗୁରୁତ୍ୱ ଦେଇଛି ବିଏମସି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ପଂଚମ କରୋନା ଆକ୍ରାନ୍ତ ରହୁଥିବା ଅଂଚଳ ଭୁବନେଶ୍ୱରର ସୂର୍ଯ୍ୟନଗରରେ ବ୍ୟାରିକେଡିଂ ବ୍ୟବସ୍ଥା କରି ସିଲ୍ କରିଛି ବିଏମସି । ଗୋପବନ୍ଧୁ ଛକରୁ ଏଲ୍ଆଇସି ଛକ, ଏଲଆଇସି ଛକରୁ ସିରିପୁର ଛକ, ସିରିପୁର ଛକରୁ ଗୋପବନ୍ଧୁ ଛକ ଯାଏଁ ଯିବା ଆସିବା ଉପରେ କଟକଣା ଲଗାଇଛି ଭୁବନେଶ୍ୱର ମହାନଗର ନିଗମ । ସୂର୍ଯ୍ୟନଗରର ପ୍ରତିରୋଧ ଅଂଚଳରେ ଲୋକମାନେ ଘରେ ରହିବାକୁ ନିର୍ଦ୍ଦେଶ ଦିଆଯାଇଛି ।
ସଂପୃକ୍ତ ଅଂଚଳରେ କେହି ବାହାର ଲୋକ ପଶିପାରିବେନି କିମ୍ବା ଭିତରର ଲୋକ ବାହାରକୁ ନଆସିବାକୁ ନିର୍ଦେଶ ଦିଆଯାଇଛି । ପ୍ରତିରୋଧ ଅଂଚଳର ସବୁ ଦୋକାନ ବଜାର ବନ୍ଦ ରଖିବା ସହ ଘରୋଇ ସରକାରୀ ଅନୁଷ୍ଠାନ ବନ୍ଦ କରିବାକୁ କୁହାଯାଇଛି । ସୂର୍ଯ୍ୟନଗର ଅଂଚଳରେ ଅତ୍ୟାବଶ୍ୟକ ସାମଗ୍ରୀ ଯୋଗାଇବା ଏବଂ ସ୍ୱାସ୍ଥ୍ୟସେବା ଓ ଅନ୍ୟାନ୍ୟ କଥା ବୁଝିବାକୁ ଦୁଇ ଜଣ ବରିଷ୍ଠ ଓଏଏସ ଅଧିକାରୀ ଓ ଜଣେ ଡାକ୍ତରଙ୍କୁ ଦାୟିତ୍ୱ ଦିଆଯାଇଛି ।