ସିଏମଆଇଇ ସର୍ଭେରେ ଚମକାଇଦେଲା ଭଳି ରିପୋର୍ଟ , କେବଳ ଅଗଷ୍ଟ ମାସରେ ଚାକିରି ହରାଇଛନ୍ତି ୧୬ ଲକ୍ଷ ଲୋକ
କନକ ବ୍ୟୁରୋ : ଦେଶରେ ଜିଡିପି ଏବେ ରେକର୍ଡ ସ୍ତରରେ ବୃଦ୍ଧି ପାଇଛି । ଜିଏସଟି ଆଦାୟ ବି ସକରାତ୍ମକ ରହିଛି । ଏହାରି ମଧ୍ୟରେ ଦେଶ ପାଇଁ ଏକ ଚିନ୍ତାଜନକ ଖବର ଆସିଛି । ଖବର ମୁତାବକ ଅଗଷ୍ଟ ମାସରେ ପୁଣିଥରେ ବେରୋଜଗାରୀ ହାର ବି ରେକର୍ଡ ସ୍ତରରେ ବୃଦ୍ଧି ପାଇଛି । ସେଣ୍ଟର ଫର ମନିଟରିଂ ଇଣ୍ଡିଆନ ଇକୋନମୀ (ସିଏମଆଇଇ)ର ସୂଚନା ମୁତାବକ କେବଳ ଅଗଷ୍ଟ ମାସରେ ଦେଶରେ ପାଖା ପାଖି ୧୬ ଲକ୍ଷ ଲୋକ ଚାକିରି ହରାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସିଏମଆଇଇର ସର୍ଭେ ରିପୋର୍ଟ ମୁତାବକ ଅଗଷ୍ଟ ମାସରେ ବେରୋଜଗାରୀ ଦର ବୃଦ୍ଧି ପାଇ ୮.୩୨ ପ୍ରତିଶତରେ ପହଂଚିଛି, ଯାହାକି ଜୁଲାଇ ମାସରେ ୬.୯୫ ପ୍ରତିଶତ ଥିଲା । ଅଗଷ୍ଟ ମାସରେ ସହରୀ ବେରୋଜଗାରୀ ଦର ପାଖା ପାଖି ୧.୫ ପ୍ରତିଶତ ବୃଦ୍ଧି ପାଇ ୯.୭୮ ପ୍ରତିଶତ ହୋଇଛି । ଯାହାକି ଜୁଲାଇ ମାସରେ ୮.୩ ପ୍ରତିଶତ ଥିଲା । ସେହିଭଳି ଗ୍ରାମୀଣ ବେରୋଜଗାରୀ ଦର ଅଗଷ୍ଟ ମାସରେ ୧.୩ ପ୍ରତିଶତ ବୃଦ୍ଧି ପାଇ ୭.୬୪ ରେ ପହଂଚିଛି , ଯାହାକି ଜୁଲାଇ ମାସରେ ୬.୩୪ ପ୍ରତିଶତ ଥିଲା ।
ସିଏମଆଇଇର ରିପୋର୍ଟ ମୁତାବକ କାର୍ଯ୍ୟରତ ଲୋକଙ୍କ ସଂଖ୍ୟା ଜୁଲାଇ ମାସରେ ୩୯.୯୩ କୋଟିରୁ ହ୍ରାସ ପାଇ ୩୯.୭୭ କୋଟିରେ ପହଂଚିଛି । ଏହି କ୍ରମରେ ଗ୍ରାମୀଣ କ୍ଷେତ୍ରରେ ୧୩ ଲକ୍ଷ ଲୋକ ବୃତ୍ତି ହରାଇଛନ୍ତି ।
କହିରଖୁ କି କେନ୍ଦ୍ର ସରକାରଙ୍କ ଦ୍ୱାରା ଏବେ ଜାରି କରାଯାଇଥିବା ଏପ୍ରିଲ ରୁ ଜୁନ ମାସ ମଧ୍ୟରେ ତ୍ରୈମାସିକ ଜିଡିପିକୁ ନଜର କଲେ ଅନୁମାନ କରାଯାଉଛି ଯେ କରୋନା ମହାମାରୀ ଭିତରେ ବି ଦେଶର ଅର୍ଥବ୍ୟବସ୍ଥାର ବ୍ୟାପକ ସୁଧାର ଆସିଛି । ଅନ୍ୟପଟେ ଜିଡିପି ବୃଦ୍ଧି ହାର ୨୦.୧ ପ୍ରତିଶତ ବୃଦ୍ଧି ପାଇଛି । ହେଲେ ଜିଡିପି କ୍ଷୀପ୍ର ଗତିରେ ବୃଦ୍ଧି ପାଉଥିବ ବେଳେ ଅଗଷ୍ଟ ମାସରେ ପୁଣି ବେରୋଜଗାରୀ ହାର ବୃଦ୍ଧି ପାଇବା ଅର୍ଥଶାସ୍ତ୍ରୀ ମାନଙ୍କୁ ଚିନ୍ତାରେ ପକାଇଛି ।