ଏନଏସି ମାନ୍ୟତା ପାଇଁ ଦାବି ବଢୁଛି: ବିଭିନ୍ନ ଅଂଚଳରେ ତେଜୁଛି ଆନ୍ଦୋଳନ
କନକ ବ୍ୟୁରୋ: ରାଜ୍ୟ ସରକାର ନିକଟରେ ୩୫ଟି ଅଂଚଳକୁ ଏନଏସି ଭାବେ ଘୋଷଣା କରିଛନ୍ତି । ହେଲେ ଏହି ଘୋଷଣା ପରଠୁ ବିଭିନ୍ନ ଜାଗାରେ ପ୍ରତିବାଦ ଦେଖିବାକୁ ମିଳୁଛି । ଯେଉଁ ଅଂଚଳ ଗୁଡ଼ିକ ଏହି ଏନଏସି ତାଲିକାକରୁ ବାଦ ପଡ଼ିଛନ୍ତି, ସେଠାରେ ବିଭିନ୍ନ ଉପାୟରେ ପ୍ରତିବାଦ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ୩୫ଟି ନୂଆ ଏନଏସି ଘୋଷଣା ପରେ ମୁଖ୍ୟମନ୍ତ୍ରୀଙ୍କୁ ଭେଟି ଧନ୍ୟବାଦ ଜଣାଇବାକୁ ନବୀନ ନିବାସରେ ନେତା, ଜନତାଙ୍କ ଭିଡ ଜମୁଛି । ଅନ୍ୟପଟେ ଏନଏସି ଘୋଷଣାରୁ ବାଦ ପଡିଥିବା ଅଂଚଳରେ ଆନ୍ଦୋଳନ ମୁଣ୍ଡ ଟେକିଛି । ଜନତା ରାସ୍ତାକୁ ଓହ୍ଲାଇଛନ୍ତି ।
ଏନଏସି ମାନ୍ୟତା ଦାବିରେ ବନ୍ଦ ପାଳନ । ଜଗତସିଂହପୁର କୁଜଙ୍ଗରେ ୧୨ ଘଂଟିଆ ବନ୍ଦ ପାଳନ କରାଯାଇଛି । ଅଂଚଳର ଦୋକାନ ବଜାର ବନ୍ଦ ଥିବା ବେଳେ ରାସ୍ତାଘାଟ ଖାଲି ରହିଛି । ରାଜ୍ୟ ସରକାର କୁଜଙ୍ଗକୁ ଅବହେଳା କରୁଥିବା ସ୍ଥାନୀୟବାସିନ୍ଦା ଅଭିଯୋଗ କରିଛନ୍ତି ।
ସେପଟେ ସୁବର୍ଣ୍ଣପୁର ଉଲୁଣ୍ଡାରେ ମଧ୍ୟ ଦିନିକିଆ ବନ୍ଦ ପାଳନ କରାଯାଇଛି । ଉଲୁଣ୍ଡାକୁ ଏନଏସି ଘୋଷଣା, ଜେଏମଏଫସି କୋର୍ଟ ଓ ସୈନିକ ସ୍କୁଲ ଦାବିରେ ସଚେତନ ନାଗରିକ ମଂଚ ତରଫରୁ ବନ୍ଦ ପାଳନ ହୋଇଛି । ସମସ୍ତ ଦୋକାନ ବଜାର, ଯାନବାହନ ଚଳାଚଳ ବନ୍ଦ ଥିବା ଦେଖିବାକୁ ମିଳିଛି ।
ଏନଏସି ଦାବିରେ କାକଟପୁରରେ ପଦଯାତ୍ରା । କିଛି ସ୍ଥାନୀୟ ଯୁବକ ମଙ୍ଗଳା ବାହାରି ନବୀନ ନିବାସ ଅଭିମୁଖେ ବାହାରିଛନ୍ତି । କାକଟପୁରକୁ ଏନଏସି ମାନ୍ୟତା ଦେବାକୁ ସେମାନେ ଦାବି କରିଛନ୍ତି ।
ଆଗକୁ ନିର୍ବାଚନ ଆସୁଛି । ତେଣୁ ରାଜ୍ୟ ସରକାରଙ୍କ ଉପରେ ଚାପ ପକାଇ ଏନଏସି ମାନ୍ୟତା ଦାବି ହାସଲ କରିବାକୁ ବିଭିନ୍ନ ଅଂଚଳର ଲୋକ ଭିନ୍ନ ଭିନ୍ନ ତରିକାରେ ପ୍ରତିବାଦ କରୁଛନ୍ତି ।