କୋଇଲିବୈକୁଣ୍ଠରେ ପୋତା ଯିବ ବିପୁଳ ପରିମାଣର ଅମୁଣିଆ ମହାପ୍ରସାଦ । କ୍ଷତିପୂରଣ ଦାବିରେ ଅଡିବସିଛନ୍ତି ସୁଆର ଓ ମହାସୁଆର ନିଯୋଗ, ଶ୍ରୀମନ୍ଦିର ପ୍ରଶାସନ କହିଲା, ଠାକୁରଙ୍କୁ ଦଣ୍ଡ ଦିଆ ନଯାଉ
କନକ ବ୍ୟୁରୋ: ଶ୍ରୀମନ୍ଦିର ରୋଷଘରୁ ଆଜି ଅମୁଣିଆ ମହାପ୍ରସାଦକୁ ବାହାର କରି ପୋତାଯିବ । କୋଇଲିବୈକୁଣ୍ଠ ପଛପଟେ ଥିବା ଉପବନରେ ଏହାକୁ ପୋତାଯିବ ବୋଲି ସୂଚନା ମିଳିଛି । ଧୋ-ପଖାଳ ସେବାୟତମାନେ ଏହି କାର୍ଯ୍ୟ ସଂପାଦନ କରିବେ । ଗତକାଲି ଶ୍ରୀମନ୍ଦିର ଗର୍ଭଗୃହକୁ ପ୍ରବେଶ ନେଇ କୋର୍ଟଙ୍କ କଟକଣା ଫଳରେ ବାହାରି ପାରିନଥିଲା ମହାପ୍ରଭୁଙ୍କ ମହାପ୍ରସାଦ । କୋର୍ଟଙ୍କ ନିର୍ଦ୍ଦେଶରେ ଶ୍ରୀମନ୍ଦିର ପ୍ରଶାସନ କେବଳ ଅଧିକୃତ ସେବାୟତଙ୍କ ଛଡା ଅନ୍ୟ କାହାରିକୁ ଗର୍ଭଗୃହକୁ ନଛାଡିବାରୁ ସୃଷ୍ଟି ହୋଇଥିଲା ବିଭ୍ରାଟ । କେବଳ ପାଳିଆ ସେବକଙ୍କ ଛଡା ଅନ୍ୟକେହି ଶ୍ରୀମନ୍ଦିର ଗର୍ଭଗୃହକୁ ଯାଇପାରିବେନି । ହାଇକୋର୍ଟଙ୍କ ଏଭଳି ନିର୍ଦ୍ଦେଶ ଫଳରେ ବର୍ଷବର୍ଷ ଧରି ସେବାୟତଙ୍କ ସହ ଯାଉଥିବା ସେମାନଙ୍କ ପରିବାର ସଦସ୍ୟ ଗର୍ଭଗୃହକୁ ପ୍ରବେଶ କରିପାରିନଥିଲେ । ସେଥିପାଇଁ ଶ୍ରୀଜୀଉଙ୍କ ନୀତିକାନ୍ତିରେ ବିଳମ୍ବ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ନୀତି ବିଭ୍ରାଟ ଫଳରେ ରୋଷଘରୁ ଅବଢା ବାହାରି ପାରିନଥିବାବେଳେ ଲକ୍ଷଲକ୍ଷ ଭକ୍ତଙ୍କ ପାଇଁ ପ୍ରସ୍ତୁତ ବରାଦି ଅବଢା ସେମିତି ରୋଷଘରେ ରହିଥିଲା । ମଙ୍ଗଳ ଆଳତିଠାରୁ ନୀତିକୁ ନେଇ ମହାବିଭ୍ରାଟ ପରେ ଭୋଗମଣ୍ଡପକୁ ଭୋଗ ଯାଇପାରି ନଥିଲା । ରୋଷଘରୁ ଅବଢା ବାହାରି ନପାରିବାରୁ ସୁଆର-ମହାସୁଆର ନିଯୋଗର ସେବାୟତମାନେ ଅସନ୍ତୋଷ ପ୍ରକାଶ କରିବା ସହ ଧାରଣାରେ ବସିରହିଥିଲେ । ତେବେ ନୀତିରେ ବିଭ୍ରାଟକୁ ନେଇ ଗଭୀର ଅସନ୍ତୋଷ ପ୍ରକାଶ କରିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ଏପରିକି ଠାକୁରଙ୍କୁ ଦଣ୍ଡ ଦିଆନଯାଉ ବୋଲି ସେ ଅନୁରୋଧ କରିଛନ୍ତି ।
ସେବାୟତମାନେ ନୀତିକାନ୍ତି ବନ୍ଦ କରି ଅନ୍ୟାୟ କରିଛନ୍ତି ଓ ସେମାନେ ନିଜ ଜିଦରେ ଅଟଳ ରହିବା ଠିକହୋଇ ନାହିଁ ବୋଲି କହିଛନ୍ତି ମୁଖ୍ୟ ପ୍ରଶାସକ ପ୍ରଦୀପ ଜେନା । ଶ୍ରୀମନ୍ଦିର ପ୍ରଶାସନ କେବଳ ହାଇକୋର୍ଟଙ୍କ ନିର୍ଦ୍ଦେଶକୁ ପାଳନ କରୁଛି । ତେଣୁ ସେବାୟତଙ୍କର ଯଦି କିଛି ଆପତି ଅଭିଯୋଗ ଥାଏ ତେବେ ସେମାନେ କୋର୍ଟରେ ପକ୍ଷ ରଖିବାକୁ ଅନୁରୋଧ କରିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ।