ଓଡ଼ିଶାର ଦେବଗଡ଼ ଜିଲ୍ଲାରେ ଚିହ୍ନଟ ହେଲା ଡେଲଟା ପ୍ଲସ୍ ଭାରିଆଣ୍ଟ । ନ୍ୟାସନାଲ ସେଣ୍ଟର ଫର ଡିଜିଜ୍ କଣ୍ଟ୍ରୋଲ ନିର୍ଦ୍ଦେଶକ ଦେଲେ ସୂଚନା । କେତେ ସଂକ୍ରାମକ ଏହି ଭାରିଆଣ୍ଟ ଚାଲିଛି ଅନୁଧ୍ୟାନ ।
କନକ ବ୍ୟୁରୋ: ଦ୍ୱିତୀୟ ଲହରରେ ଆତଙ୍କ ଖେଳାଇଥିବା କରୋନା ଭୂତାଣୁର ଡେଲଟା ଭାରିଆଣ୍ଟ ରୂପ ବଦଳାଇ ଡେଲଟା ପ୍ଲସ ଭାରିଆଣ୍ଟ ହୋଇ ନୂଆ ରୂପରେ ଆସିଛି । ଓଡିଶାର ଦେବଗଡରେ ଜଣେ ବ୍ୟକ୍ତିଙ୍କ ଠାରେ ଏହି ଭୂତାଣୁ ଚିହ୍ନଟ ହୋଇଛି । ତେବେ ସେ କେଉଁଠୁ ଆସିଥିଲେ ଏବଂ ସେ ଭାଇରସ ଓଡିଶା କେମିତି ପହଞ୍ଚିଲା ସେ ବିଷୟରେ ସଂପୂର୍ଣ୍ଣ ତଥ୍ୟ ମିଳିପାରି ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଗତ ଏପ୍ରିଲରେ ପ୍ରଥମ ଥର ପାଇଁ ଭାରତର ମହାରାଷ୍ଟ୍ରରେ ଚିହ୍ନଟ ହୋଇଥିବା ଏହି ଭାରିଆଣ୍ଟ ଡେଲଟା ଭାରିଆଣ୍ଟ ଠାରୁ ଅଧିକ ସଂକ୍ରାମକ ହୋଇପାରେ । ନ୍ୟାସନାଲ ସେଣ୍ଟର ଫର ଡିଜିଜ କଂଟ୍ରୋଲର ନିର୍ଦ୍ଦେଶକ କହିଛନ୍ତି, ଏବେ ଯାଏଁ ୪୮ଟି ଡେଲଟା ପ୍ଲସ ସଂକ୍ରମିତ ଚିହ୍ନଟ ହୋଇଛନ୍ତି । ମହାରାଷ୍ଟ୍ରରେ ୨୦ ଜଣ, ତାମିଲନାଡୁରେ ୯ ଜଣ, ମଧ୍ୟପ୍ରଦେଶରେ ୭ ଜଣ, କେରଳରେ ୩ ଜଣ, ଓଡିଶାରେ ଜଣେ, ଏହିପରି ୧୧ଟି ରାଜ୍ୟରୁ ୪୮ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ଏହି ଭାରିଆଣ୍ଟ ବ୍ରିଟେନ, କାନାଡା, ଭାରତ, ଜାପାନ, ରୁଷିଆ, ଆମେରିକା ଭଳି ୧୧ଟି ଦେଶରେ ଚିହ୍ନଟ ହୋଇଛି । ତେବେ ଏହା କେତେ ମାରାତ୍ମକ, କେତେ ସଂକ୍ରାମକ ଏବଂ କେତେ କ୍ଷତିକାରକ ହେବ ତାକୁ ନେଇ ଅନୁଧ୍ୟାନ ଚାଲିଛି ।
ବିଶ୍ୱ ସ୍ୱାସ୍ଥ୍ୟ ସଂଗଠନ କହିଛି- ଡେଲଟା ପ୍ଲସ ଭାରିଆଂଟକୁ ଅନୁଧ୍ୟାନ କରାଯାଉଛି, ଲାଗୁଛି ଏହା ଏକ ସାଧାରଣ ଭାରିଆଂଟ ନୁହେଁ । ସେହିପରି ଭାରତୀୟ ଚିକିତ୍ସା ବିଜ୍ଞାନ ଓ ଗବେଷଣା କେନ୍ଦ୍ର- ଆଇସିଏମଆର କହିଛି, ଏହି ଭାରିଆଂଟକୁ ନେଇ ଅଧିକ ଗବେଷଣା କରୁଛୁ, ଭ୍ୟାକ୍ସିନ ନେଇଥିବା ଲୋକଙ୍କୁ ଏହା କେମିତି ସଂକ୍ରମିତ କରୁଛି, ତାହାର ଅନୁଧ୍ୟାନ କରୁଛୁ । ଭାରତର ସ୍ୱାସ୍ଥ୍ୟ ମନ୍ତ୍ରାଳୟ କହିଛି- ଡେଲଟା ଭାରିଆଂଟର ଏହି ପରିବର୍ତ୍ତିତ ରୂପ ‘ଭାରିଆଂଟ ଅପ କନସର୍ନ’ ଅର୍ଥାତ ଏହା ଚିନ୍ତାଜନକ ହୋଇପାରେ । ତେବେ ଭ୍ୟାକ୍ସିନ ନେଇଥିବା ଲୋକଙ୍କୁ ଭୂତାଣୁର ଏହି ନୂଆ ରୂପ ସଂକ୍ରମିତ କରିପାରିବ କି ନାହିଁ ସେ ନେଇ ଅନୁଧ୍ୟାନ ଚାଲିଛି । ବର୍ତମାନ ଯାଏଁ ଏହାର ସଠିକ ଉତ୍ତର ଆସିନାହିଁ । ଚିକିତ୍ସା ବିଜ୍ଞାନୀମାନେ କହୁଛନ୍ତି, ଏହା ଉପରେ ବିସ୍ତୃତ ଅଧ୍ୟୟନ ଦରକାର । ଭ୍ୟାକ୍ସିନ ଦ୍ୱାରା ସୃଷ୍ଟି ହେଉଥିବା ରୋଗ ପ୍ରତିରୋଧକ ଶକ୍ତିକୁ ଏହା ଯଦି ଭାଙ୍ଗି ଦିଏ ତେବେ ନିଶ୍ଚୟ ଏହା ଏକ ବଡ ଚିନ୍ତାର କାରଣ ହୋଇଯିବ ।
ଯଦି ଡେଲଟା ପ୍ଲସ ଭାରିଆଂଟ ଅଧିକ ସଂକ୍ରାମକ ହୁଏ, ତେବେ ଏହି ଲହର ତୃତୀୟ ଲହର ଆଣିପାରେ ବୋଲି ବିଶେଷଜ୍ଞମାନେ ଆଶଙ୍କା କରୁଛନ୍ତି । କିନ୍ତୁ ପ୍ରକୃତରେ ଏହା କେତେ କ୍ଷତିକାରକ ଓ ସଂକ୍ରାମକ ହେବ ତାହା ସଂପୂର୍ଣ୍ଣ ରୂପେ ଜଣାପଡି ନାହିଁ ।