ସାଂସଦ ପଦ ରଦ୍ଦ ହେବା ପରେ ମହୁଆ ମୋଇତ୍ରଙ୍କ ପ୍ରଥମ ବୟାନ, ଜାଣନ୍ତୁ ଏଥିକ୍ସ କମିଟିର ରିପୋର୍ଟକୁ ନେଇ କ’ଣ କହିଲେ ?

କନକ ବ୍ୟୁରୋ : ଟଙ୍କା ନେଇ ସଂସଦରେ ପ୍ରଶ୍ନ ପଚାରିବା ମାମଲାରେ ଟିଏମସି ସାଂସଦ ମହୁଆ ମୋଇତ୍ରଙ୍କ ସାଂସଦ ପଦ ରଦ୍ଦ ହୋଇଛି । ପଦ ରଦ୍ଦ ହେବା ପରେ ମହ୍ରୁଆ ତାଙ୍କ ପ୍ରତିକ୍ରିୟାରେ କହିଛନ୍ତି କି, ଏହି ମାମଲାରେ ମୋ ବିରୋଧରେ କୌଣସି ପ୍ରମାଣ ନାହିଁ , ମୁଁ ସଂସଦରେ ଆଦାନୀ ଦୁର୍ନୀତି ପ୍ରସଙ୍ଗ ଉଠାଇଥିବାରୁ ମୋତେ ଏଭଳି ଦଣ୍ଡ ମିଳିଛି । ହେଲେ ଆଗକୁ ମଧ୍ୟ ଆଦାନୀ ଦୁର୍ନୀତି ମାମଲା ଉଠାଇବେ ବୋଲି ମହୁଆ କହିଛନ୍ତି ।

ସେପଟେ ମହୁଆ ମୋଇତ୍ରଙ୍କ ସାଂସଦ ପଦ ରଦ୍ଦ ନେଇ ପ୍ରସ୍ତାବ ଆସିବା ପରେ ଲୋକସଭାରୁ ବାହାରି ଯାଇଥିଲେ ବିରୋଧୀ ସାଂସଦମାନେ । ଏଥିକ୍ସ କମିଟି ରିପୋର୍ଟ ଉପରେ ଯେତେବେଳେ ଲୋକସଭାରେ ଆଲୋଚନା ଆରମ୍ଭ ହୋଇଥିଲା ସେତେବେଳେ ଟିଏମସି ସାଂସଦ ସୁଦୀପ ବନ୍ଦୋପାଧ୍ୟାୟ ବାଚସ୍ପତିଙ୍କୁ ଅନୁରୋଧ କରିଥିଲେ ଯେ ମହୁଆଙ୍କୁ ମଧ୍ୟ ତାଙ୍କ ପକ୍ଷ ରଖିବାର ସୁଯୋଗ ଦିଆଯାଉ ।

ଅନ୍ୟପଟେ ଲୋକସଭା ବାଚସ୍ପତି ଓମ୍ ବିର୍ଲା କହିଥିଲେ ଯେ ଏଥିକ୍ସ କମିଟିର ନିଷ୍କର୍ସକୁ ସଂସଦ ସ୍ୱିକାର କରୁଛି କି, ଜଣେ ସାଂସଦ ଭାବେ ମହୁଆ ମୋଇତ୍ରଙ୍କ ଆଚରଣ ଅନୈିତିକ ଓ ଅଶୋଭନୀୟ ଥିଲା । ତେଣୁ ସେ ସାଂସଦ ଭାବେ ରହିବା ଉଚିତ୍ ନୁହେଁ ବୋଲି ଓମ୍ ବିର୍ଲା କହିଛନ୍ତି ।

କଂଗ୍ରେସ ସାଂସଦ ମନୀଷ ତିୱାରୀ କହିଛନ୍ତି କି, ଯଦି ଏହି ମାମଲା ଉପରେ ଆସିଥିବା ରିପୋର୍ଟକୁ ସଂସଦ ୩-୪ ଦିନ ସମୟ ନେଇ ସମୀକ୍ଷା କରିଥାନ୍ତା ଓ ପରେ ରାୟ ଶୁଣାଇଥାନ୍ତା ତେବେ କିଛି ଅସୁବିଧା ହୋଇନଥାନ୍ତା ।