ପ୍ରଥମେ ହତ୍ୟା ତା’ପରେ ଆତ୍ମହତ୍ୟା : ମହିଳା ଏସଆଇଙ୍କୁ ହତ୍ୟା କରିବା ପରେ ନିଜକୁ ଗୁଳି କଲେ ସହକର୍ମୀ । ହତ୍ୟା କାରଣ ଅସ୍ପଷ୍ଟ
ନିଜ ମହିଳା ସହକର୍ମୀଙ୍କୁ ହତ୍ୟା ପରେ ଆତ୍ମହତ୍ୟା କରିଛନ୍ତି ଜଣେ ଯୁବ ପୁଲିସ ସବ୍-ଇନ୍ସପେକ୍ଟର । ଉତ୍ତର-ପଶ୍ଚିମ ଦିଲ୍ଲୀର ରୋହିଣୀସ୍ଥିତ ମେଟ୍ରୋ ରେଳ ଷ୍ଟେସନ୍ ଅଞ୍ଚଳରେ ଦିଲ୍ଲୀ ପୁଲିସର ସବ୍-ଇନ୍ସପେକ୍ଟର ପ୍ରୀତି ଅହଲାୱତଙ୍କୁ ଅତି ନିକଟରୁ ଗୁଳି କରି ହତ୍ୟା କରିଛନ୍ତି ସହକର୍ମୀ ସବ୍-ଇନ୍ସପେକ୍ଟର ଦୀପାଂଶୁ ରଥି । ପ୍ରୀତି ଷ୍ଟେସନ୍ ରୁ ବାହାରୁଥିବାବେଳେ ତାଙ୍କ ମୁଣ୍ଡକୁ ଲକ୍ଷ୍ୟକରି ଦୀପାଂଶୁ ତିନୋଟି ଗୁଳି ମାରିଥିଲେ ଓ ଘଟଣାସ୍ଥଳରେ ହିଁ ପ୍ରିତୀଙ୍କ ମୃତ୍ୟୁ ହୋଇ ଯାଇଥିଲା। ପ୍ରୀତିଙ୍କୁ ମାରିବା ପରେ ଦୀପାଂଶୁ ମଧ୍ୟ ଆତ୍ମହତ୍ୟା କରିଛନ୍ତି । ୨୦୧୮ ରେ ମହିଳା ସବ ଇନ୍ସପେକ୍ଟର ପ୍ରୀତି ଅହଲାୱତ ଓ ଦୀପାଂଶୁ ଦିଲ୍ଲୀ ପୋଲିସରେ ଯୋଗଦେଇଥିଲେ । ଦୁଇଜଣ ଗୋଟିଏ ବ୍ୟାଚ୍ ରେ ଥିଲେ । କିନ୍ତୁ କଣ ପାଇଁ ପ୍ରୀତିଙ୍କୁ ଦୀପାଂଶୁ ହତ୍ୟା କଲେ ଏହାର ସୂଚନା ମିଳିନାହିଁ । ତଦନ୍ତ ଜାରି ରହିଛି ବୋଲି ପୋଲିସ ପକ୍ଷରୁ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଶୁକ୍ରବାର ରାତି ୯.୩୦ ସମୟରେ ରୋହିଣୀ ଇଷ୍ଟ ମେଟ୍ରୋ ଷ୍ଟେସନ ନିକଟରେ ମହିଳା ସବ ଇନ୍ସପେକ୍ଟର ପ୍ରୀତି ଅହଲାୱତଙ୍କୁ ଗୁଳି କରି ହତ୍ୟା କରାଯାଇଥିଲା । ପୋଲିସ ତଦନ୍ତ ଜାରି ରଖିଥିବା ବେଳେ ପିଏସ୍ ଆଇ ଦୀପାଂଶୁଙ୍କ ମୃତଦେହ ଉଦ୍ଧାର ହୋଇଛି । ଦିଲ୍ଲୀ ପଟପଡଗଞ୍ଜ ଶିଳ୍ପାଞ୍ଚଳ ପୋଲିସ ଥାନାରେ ମୁତୟନ ଏସଆଇ ଭାବେ କାର୍ଯ୍ୟ କରୁଥିଲେ ପ୍ରୀତି । ମହିଳା ସବ ଇନ୍ସପେକ୍ଟରଙ୍କୁ ହତ୍ୟା କରାଯିବା ଘଟଣାରେ ପୋଲିସ ପିଏସଆଇ ଦୀପାଂଶୁଙ୍କୁ ସନ୍ଦେହ କରୁଥିଲା । ଘଟଣା ସଂପର୍କରେ ପୋଲିସ ଜାଣିବା ପରେ ଦୀପାଂଶୁ ଅନ୍ୟ କୌଣସି ଉପାୟ ନ ପାଇ ଶେଷରେ ଆତ୍ମହତ୍ୟା କରିଛନ୍ତି ବୋଲି ଜଣାପଡିଛି । ତେବେ ଅଭିଯୁକ୍ତ ଦୀପାଂଶୁ ଯେଉଁ ପିସ୍ତଲରେ ମହିଳା ଇନ୍ସପେକ୍ଟରଙ୍କୁ ଗୁଳି କରିଥିଲା, ସେଥିରେ ହିଁ ନିଜକୁ ଗୁଳି କରି ଆତ୍ମହତ୍ୟା କରିଛନ୍ତି ।