କନକ ବ୍ୟୁରୋ : ଦିଲ୍ଲୀ ନଗର ନିଗମ ପାଇଁ ହୋଇଥିବା ଉପନିର୍ବାଚନର ଫଳାଫଳ ଘୋଷଣା କରାଯାଇଛି । ମୋଟ ୫ ଟି ଆସନରୁ ଆମ୍ ଆଦମୀ ପାର୍ଟି ୪ ଟି ଆସନରେ ବିଜୟଲାଭ କରିଥିବା ବେଳେ ଗୋଟିଏ ଆସନ କଂଗ୍ରେସ ଖାତାକୁ ଯାଇଛି । ତ୍ରୈଲୋକ୍ୟପୁରୀ, ରୋହିଣୀ, କଲ୍ୟାଣପୁରୀ ଓ ଶାଲିମାର ବାଗ ଆସନରେ ଆପ୍ ବାଜିମାତ୍ କରିଥିବା ବେଳେ ଚୌହାନ ବାଙ୍ଗଡ ଆସନରେ କଂଗ୍ରେସ ବିଜୟୀ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ତ୍ରୈଲୋକ୍ୟପୁରୀ ଆସନରୁ ଆପ୍ ପ୍ରାର୍ଥୀ ବିଜୟ କୁମାର ୪୯୮୬ ଭୋଟରେ ବିଜୟୀ ହୋଇଥିବା ବେଳେ ରୋହିଣୀ ଆସନରୁ ଆପ୍ ପ୍ରାର୍ଥୀ ରାମଚନ୍ଦ୍ର କୋ ୨୯୮୫ ଖଣ୍ଡ ଭୋଟ ବ୍ୟବଧାନରେ ବିଜୟୀ ହୋଇଛନ୍ତି । ସେହିଭଳି ଶାଲିମାର ବାଗ ଆସନରୁ ଆପ୍ ପ୍ରାର୍ଥୀ ସୁନିତା ମିଶ୍ରା ୨୭୦୫ ଖଣ୍ଡ ଭୋଟରେ ବିଜୟୀ ହୋଇଥିବା ବେଳେ ଚୌହାନ ବାଙ୍ଗଡ ଆସନରୁ କଂଗ୍ରେସ ପ୍ରାର୍ଥୀ ଚୌଧୁରୀ ଜୁବେର ଅହମ୍ମଦ ବିଜୟୀ ହୋଇଛନ୍ତି । ଅନ୍ୟପଟେ କଲ୍ୟାଣପୁରୀ ଆସନରୁ ଆପ୍ ପ୍ରାର୍ଥୀ ଧିରେନ୍ଦ୍ର କୁମାର କୋ ୭୦୪୩ ଖଣ୍ଡ ଭୋଟରେ ବିଜୟଲାଭ କରିଛନ୍ତି ।
ଏହି ବିଜୟ ପରେ ଆମ୍ ଆଦମୀ ପାର୍ଟିର କର୍ମକତ୍ତା ମାନଙ୍କ ଭିତରେ ଉତ୍ସାହ ଦେଖିବାକୁ ମିଳିଛି । ଆପ୍ କର୍ମକର୍ତ୍ତା କହିଛନ୍ତି କି ‘ହୋଇଗଲା କାମ, ଜୟ ଶ୍ରୀରାମ’ । ଏନେଇ ଆପ୍ ନେତା ଦୁର୍ଗେସ୍ ପାଠକ କହିଛନ୍ତି କି ୨୦୨୨ ରେ ହେବାକୁ ଥିବା ନଗର ନିଗମ ନିର୍ବାଚନ ପୂର୍ବରୁ ଏହା ସେମି ଫାଇନାଲ ଥିଲା, ଯାହାର ସମ୍ପୂର୍ଣ୍ଣ ଚିତ୍ର ୨୦୨୨ ନିର୍ବାଚନରେ ଦେଖିବାକୁ ମିଳିବ । ଅନ୍ୟପଟେ କଂଗ୍ରେସ ମାତ୍ର ଗୋଟିଏ ଆସନରେ ବିଜୟଲାଭ କରିଥିବା ବେଳେ କେନ୍ଦ୍ର ଶାସନ କ୍ଷମତାରେ ଥିବା ବିଜେପିର ହାତ ଶୂନ୍ୟ ହୋଇଯାଇଛି ।