ବର୍ଷା ପାଣିରେ ଖେଳିବା ହେଲା କାଳ; ଚାଲିଗଲା ୨ ନିଷ୍ପାପ ଶିଶୁଙ୍କ ଜୀବନ

କନକ ବ୍ୟୁରୋ : ଦିଲ୍ଲୀରେ ଘଟିଲା ଅଭାବନୀୟ ଘଟଣା । ବର୍ଷା ପାଣିରେ ଭାସିଗଲେ ଦୁଇ ଶିଶୁ । ଦୁଇ ଶିଶୁଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ବର୍ଷା ପାଣିରେ ଖେଳିବା ବେଳେ ଏହି ଅଘଟଣ ଘଟିଥିବା କୁହାଯାଉଛି ।

ସୂଚନା ମୁତାବକ ଦିଲ୍ଲୀ ପ୍ରେମ ନଗର ଅଞ୍ଚଳରେ ବର୍ଷା ପାଣିରେ ଖେଳୁଥିଲେ ୪ ଶିଶୁ । ପାଣିରେ ଖେଳୁ ଖେଳୁ ହଠାତ ସେ ପୋଖରୀ ପାଖକୁ ଚାଲିଯାଇଥିଲେ । ବର୍ଷା ପାଣିରେ ଖେଳିବା ମଜା ହେଲା କାଳ। ୪ ସାଙ୍ଗଙ୍କ ମଧ୍ୟରୁ ପାଣିରେ ବୁଡ଼ିଗଲେ ଦୁଇ ଶିଶୁ । ମୃତକ ଦୁଇ ନାବାଳକଙ୍କ ବୟସ ୯ ଓ ୧୫ ବର୍ଷ ବୋଲି ସୂଚନା ମିଳିଛି ।

ଗତକାଲି ଦିଲ୍ଲୀରେ ପ୍ରବଳ ବର୍ଷା ହୋଇଥିଲା । ବର୍ଷା ପାଣି ବିଭିନ୍ନ ସ୍ଥାନରେ ଜମି ରହିଥିବା ବେଳେ ପ୍ରେମ ନଗର ଅଞ୍ଚଳରେ ଥିବା ପୋଖରୀରେ ପାଣି ଭର୍ତ୍ତି ହୋଇଯାଇଥିଲା। ବର୍ଷା ପାଣିରେ ଖେଳିବାକୁ ସନ୍ଧ୍ୟାରେ ୪ ସାଙ୍ଗ ଘରୁ ବାହାରିଥିଲେ । ଏହାପରେ ସେମାନେ ନିକଟସ୍ଥ ପୋଖରୀକୁ ଚାଲି ଯାଇଥିଲେ । ସେଠାରେ ଦୁର୍ଭାଗ୍ୟବଶତଃ ଦୁଇ ଶିଶୁ ପାଣିରେ ଖସି ପଡ଼ିଥିଲେ । ଯାହାଫଳରେ ଦୁଇ ଶିଶୁଙ୍କ ପ୍ରାଣ ଯାଇଛି ।

ଖବର ପାଇ ସ୍ଥାନୀୟ ଲୋକେ ଅଗ୍ନିଶମ କର୍ମଚାରୀଙ୍କୁ ଖବର ଦେଇଥିଲେ । ଅଗ୍ନିଶମ କର୍ମଚାରୀ ପହଞ୍ଚି ବହୁଚେଷ୍ଟା ପରେ ପାଣିରୁ ଦୁଇ ଶିଶୁଙ୍କୁ ଉଦ୍ଧାର କରିଥିଲେ । ସେମାନଙ୍କୁ ନିକଟସ୍ଥ ମେଡିକାଲ ନିଆଯାଇଥିବା ବେଳେ ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ ।