ଆଜିି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ କରୋନା ପରୀକ୍ଷା: ଥଣ୍ଡା, ଜ୍ୱର ଯୋଗୁଁ ଅଛନ୍ତି ଅସୁସ୍ଥ; ସଂଗରୋଧରେ ରହୁଛନ୍ତି ମୁଖ୍ୟମନ୍ତ୍ରୀ
କନକ ବ୍ୟୁରୋ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କର ଆଜି ହେବ କରୋନା ଟେଷ୍ଟ । ତାଙ୍କୁ ହାଲକା ଜ୍ୱର ହେବା ସହ ଗଳା ସଂକ୍ରମିତ ହୋଇଛି । ସେଥି ପାଇଁ ତାଙ୍କର କରୋନା ପରୀକ୍ଷା କରାଯିବ । ସାମାନ୍ୟ ଜ୍ୱର ହେବା ପରେ ରବିବାରଠାରୁ ତାଙ୍କର ସମସ୍ତ ବୈଠକକୁ ବନ୍ଦ କରିଦିଆଯାଇଛି । ଏବଂ ସେ କାହାକୁ ଏବେ ସାକ୍ଷାତ କରୁନାହାନ୍ତି । ବର୍ତମାନ ସଙ୍ଗରୋଧରେ ଅଛନ୍ତି ଅରବିନ୍ଦ କେଜ୍ରିିୱାଲ । ଦେଶରେ ମହାରାଷ୍ଟ୍ର, ଗୁଜରାଟ ଓ ଦିଲ୍ଲୀରେ କରୋନା ସଂକ୍ରମଣ ସଂଖ୍ୟା ଅଧିକ ରହିଛି । ଦିଲ୍ଲୀରେ ବର୍ତମାନ ସୁଦ୍ଧା ପାଖାପାଖି ୨୯ ହଜାର ଲୋକ କରୋନାରେ ଆକ୍ରାନ୍ତ ହୋଇଛନ୍ତି । ମୃତ୍ୟୁ ସଂଖ୍ୟା ଶହେରୁ ଅଧିକରେ ପହଂଚିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଦିଲ୍ଲୀରେ କେବଳ ଦିଲ୍ଲୀବାସୀଙ୍କ ଚିକିତ୍ସା ସେବା ଯୋଗାଇବା ନେଇ ମୁଖ୍ୟମନ୍ତ୍ରୀ କେଜ୍ରିୱାଲଙ୍କ ନିଷ୍ପତିକୁ ଖାରଜ କରିଦେିଛନ୍ତି ଉପରାଜ୍ୟପାଳ ଅନିଲ ବୈଜଲ । ଦିଲ୍ଲୀ ବିପର୍ଯ୍ୟୟ ପରିଚାଳନା ପ୍ରାଧିକରଣର ଅଧ୍ୟକ୍ଷ ଭାବେ ଉପରାଜ୍ୟପାଳ ଏହି ନିଷ୍ପତିକୁ ଖାରଜ କରିଥିବା ଜଣାପଡ଼ିଛି । କୌଣସି ବାହାର ରାଜ୍ୟର ବ୍ୟକ୍ତିଙ୍କୁ ଚିକିତ୍ସା ସେବା ଯୋଗାଇ ଦେବା ପାଇଁ ମନା କରାଯିବ ନାହିଁ ବୋଲି ସେ ନିର୍ଦ୍ଦେଶ ଦେଇଛନ୍ତି । ଦିଲ୍ଲୀର ହସ୍ପିଟାଲ ଗୁଡିକରେ କେବଳ ଦିଲ୍ଲୀବାସୀଙ୍କ ଚିକିତ୍ସା ହେବ ବୋଲି ରବିବାର ଦିନ କେଜ୍ରିୱାଲ ସରକାର ନିଷ୍ପତି ନେଇଥିଲେ । କେନ୍ଦ୍ର ସରକାରଙ୍କ ଅଧିନରେ ଥିବା ଡାକ୍ତରଖାନାଗୁଡିକରେ ରାଜ୍ୟ ବାହାରର ରୋଗୀଙ୍କ ଚିକିତ୍ସା ହେବ ବୋଲି ଅରବିନ୍ଦ କେଜ୍ରିୱାଲ ଘୋଷଣା କରିଥିଲେ ।