ଦିଲ୍ଲୀରେ ଦୁର୍ବଳ ‘ହାତ’ ! ପୁଣି କଂଗ୍ରେସକୁ ବନବାସ ପଠାଇ ପାରନ୍ତି କେଜ୍ରିୱାଲ? ଏକଜିଟ୍ ପୋଲ୍ କହିଲା ଏଥର ବି ମାଟି କାମୁଡି ପଡିପାରେ ‘ହାତ’, ଖୋଲି ନପାରେ ଖାତା ।

କନକ ବ୍ୟୁରୋ: ଫେଲ ମାରିଲା କଂଗ୍ରେସର ସବୁ ଚାଲ । ଅନେକ ଉଦ୍ୟମ ପରେ ବି ଏଥର ବି ଖାତା ଖୋଲିନପାରେ କଂଗ୍ରେସ । କାରଣ ବୁଥ ବାହୁଡା ମତରେ ସେଭଳି କୌଣସି ଆଶାଜନକ ମତ ହାତ ସପକ୍ଷରେ ଯାଇନି । ଅର୍ଥାତ ଏଥର ବି ଦିଲ୍ଲୀବାସୀ କଂଗ୍ରେସକୁ ବିଶ୍ୱାସକୁ ନେଇପାରି ନାହାନ୍ତି ।

ଭୋଟ ସରିବା ପରେ ବିଭିନ୍ନ ସଂସ୍ଥା ଦେଇଥିବା ବୁଥ ବାହୁଡା ମତରେ କଂଗ୍ରେସ ଗୋଟିଏ ଦୁଇଟି ଆସନ ଆଣିପାରେ ବୋଲି ପୂର୍ବାନୁମାନ କରାଯାଇଥିବା ବେଳେ ଅନେକ ସଂସ୍ଥା ମଧ୍ୟ କଂଗ୍ରେସ ଏଥର ବି ଖାତା ଖୋଲି ପାରିବନି ବୋଲି ଆକଳନ କରିଛନ୍ତି । ତେବେ ନଜର ପକାନ୍ତୁ କେଉଁ ସଂସ୍ଥା କଂଗ୍ରେସ ଉପରେ କେଉଁ ଆକଳନ କରିଛି ।

ଟାଇମସ ନାଓ ଏବଂ ଇଣ୍ଡିଆ ଟିଭିର ସର୍ଭେ ଅନୁସାରେ ଆପକୁ ୪୪, ବିଜେପିକୁ ୨୬ ଏବଂ କଂଗ୍ରେସକୁ କୌଣସି ବି ଗୋଟିଏ ଆସନ ମିଳିନପାରେ । ରିପବ୍ଲିକ ଟିଭିର ମତ ଅନୁସାରେ ଆପ ୪୮ରୁ ୬୧ଟି ଆସନ ପାଇବ, ବିଜେପି ୯ରୁ୨୧ ଏବଂ କଂଗ୍ରେସ ଗୋଟିଏ ଆସନ ଅକ୍ତିଆର କରିପାରେ । ସୁଦର୍ଶନ ନ୍ୟୁଜ୍ ଅନୁସାରେ ଆପ- ୪୦-୪୫, ବିଜେପି- ୨୪ରୁ ୨୮, କଂଗ୍ରେସ- ୨ରୁ ୩ । ଟିଭି୯ ଭାରତବର୍ଷ ଅନୁସାରେ ଆପ- ୫୪, ବିଜେପି- ୧୫, କଂଗ୍ରେସ-୧ । ଇଣ୍ଡିଆ ନ୍ୟୁଜ୍ ନେତାର ଆକଳନ ଅନୁସାରେ ଆପ- ୫୩ରୁ ୫୭, ବିଜେପି- ୧୧ରୁ ୧୭ ଏବଂ କଂଗ୍ରେସକୁ ମାତ୍ର ୨ଟି ଆସନ ମିଳିପାରେ ।

ତେବେ ଦିଲ୍ଲୀରେ ୨୦୧୫ରେ କଂଗ୍ରେସ ହାତରୁ କ୍ଷମତା ଛଡାଇ ନେଇଥିଲା ଆପ । ଝାଡୁ ମାରି ଆପ ୬୭ ଆସନ ପୋଛି ନେଇଥିବା ବେଳେ ବିଜେପି ଖାତାରେ ପଡିଥିଲା ମାତ୍ର ୩ଟି ଆସନ । ଆଉ କଂଗ୍ରେସ ଗୋଟିଏ ବି ଜିତି ନପାରି ମାଟି କାମୁଡି ପଡିଥିଲା । ତେବେ ଏଥର କମବ୍ୟାକ କରିବାକୁ ହାତ ଅନେକ କସରତ କରିଥିବା ବେଳେ ବିଭିନ୍ନ ପ୍ରସଙ୍ଗକୁ ଆଳକରି ଭୋଟ ମାଗିଥିଲା ।

ସିଏଏ ଭଳି ଜାତୀୟ ପ୍ରସଙ୍ଗକୁ କଂଗ୍ରେସ ମୁଦ୍ଦା କରି ପ୍ରଚାର ମୈଦାନକୁ ଓହ୍ଲାଇଥିବା ବେଳେ ବେରୋଜଗାରୀ ପ୍ରସଙ୍ଗକୁ ବଡ ଅସ୍ତ୍ର କରି ମୋଦିଙ୍କୁ ଟାର୍ଗେଟ କରି ଲୋକଙ୍କ ଆସ୍ଥା ଜିତିବାକୁ ଚାହିଁଥିଲା କଂଗ୍ରେସ । ଏପରିକି ସଂଖ୍ୟାଲଘୁ ସଂପ୍ରଦାୟକୁ ନେଇ ମଧ୍ୟ ରାଜନୀତି କରି ଭୋଟ ମାଗିଥିଲା କଂଗ୍ରେସ । ହେଲେ ହାତର ସବୁ ଚାଲ ଫୁସକି ଗଲା ଆଉ ଜନମତ ଅନ୍ୟ ଦଳକୁ ଚାଲିଯାଇଥିବା ବୁଥ ବାହୁଡା ମତ କହୁଛି ।

ତେବେ ଦିଲ୍ଲୀ ଦଖଲ କରିବା କଂଗ୍ରେସ ପାଇଁ ଏକ ବଡ ଆହ୍ୱାନ ଥିବାବେଳେ ସମ୍ମାନର ପ୍ରଶ୍ନ ମଧ୍ୟ ଥିଲା । ଶୀଲା ଦିକ୍ଷୀତଙ୍କ ପରେ ଦିଲ୍ଲୀରେ ସେଭଳି କୌଣସି ଲୋକପ୍ରିୟ ଚେହେରା, ଲୋକପ୍ରିୟ ନେତା ନଥିବାରୁ କଂଗ୍ରେସ ପଛରେ ପଡିଥିବା ରାଜନୈତିକ ପଣ୍ଡିତମାନେ କହୁଥିବା ବେଳେ ବୁଥ ବାହୁଡା ମତ ଆକଳନ କରିଛି କି ଏଥର ବି ମାଟି କାମୁଡି ପଡିପାରେ କଂଗ୍ରେସ ।