କନକ ବ୍ୟୁରୋ : ମୋତେ ଟିକେଟ ଦିଅ, ନହେଲେ ଏହି ଟାୱାର ଉପରୁ ତଳକୁ ଡେଇଁ ଆତ୍ମହତ୍ୟା କରିବି । ଏଭଳି କିଛି ରୋଚକ ଚିତ୍ର ଦେଖିବାକୁ ମିଳିଛି ଦିଲ୍ଲୀରେ । ଏଠାରେ ଆମ୍ ଆଦମୀ ପାର୍ଟି ତରଫରୁ ଜଣେ ଆଶାୟୀ ପ୍ରାର୍ଥୀଙ୍କୁ ଟିକେଟ ନମିଳିବାରୁ ସେ ଆଜି ଏକ ମୋବାଇଲ ଟାୱାର ଉପରକୁ ଚଢିଯାଇ ଆତ୍ମହତ୍ୟା ଧମକ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ହସିବ ଓଲ ହସନ ନାମକ ଜଣେ ବ୍ୟକ୍ତିଙ୍କୁ ଦିଲ୍ଲୀ ନଗରନିଗମରୁ ପ୍ରାର୍ଥୀ କରିବାକୁ ଆମ୍ ଆଦମୀ ପାର୍ଟି ପ୍ରତିଶ୍ରୁତି ଦେଇଥିଲା । ହେଲେ ତାଙ୍କୁ ଟିକେଟ ମିଳିନଥିବାରୁ ସେ ଏଭଳି କରିଛନ୍ତି । ସେ ଶାସ୍ତ୍ରୀ ପାର୍କ ନିକଟରେ ଥିବା ଏକ ଟାୱାର ଉପରେ ଚଢିଯାଇଥିଲେ । ସେ କହୁଛନ୍ତି କି, ପାର୍ଟି ମୋତେ ଟିକେଟ ଦେଲାନାହିଁ ତେଣୁ ମୁଁ ଆତ୍ମହତ୍ୟା କରିବି ।
କହିରଖୁ କି ଦିଲ୍ଲୀ ନଗରନିଗମ ନିର୍ବାଚନ ପାଇଁ ଆମ୍ ଆଦମୀ ପାର୍ଟି ପ୍ରଥମ ତାଲିକାରେ ୧୩୪ ଓ ଦ୍ୱିତୀୟ ତାଲିକାରେ ୧୧୬ ଜଣ ପ୍ରାର୍ଥୀଙ୍କ ନାମ ଘୋଷଣା କରିଛି । ଏହି ତାଲିକାରେ ଅଧିକରୁ ଅଧିକ ପୁରୁଣା କାର୍ଯ୍ୟକର୍ତ୍ତା ରହିଛନ୍ତି । ହେଲେ ହସନ ଓଲଙ୍କ ନାମ ଏହି ତାଲିକାରେ ନାହିଁ । ସେପଟେ ତାଙ୍କର ଏଭଳି ଆତ୍ମହତ୍ୟା ଉଦ୍ୟମ ବାବଦରେ ଜାଣିବା ପରେ ଅଗ୍ନିଶମ ବିଭାଗ ଘଟଣା ସ୍ଥଳରେ ପହଂଚି ତାଙ୍କୁ ଉଦ୍ଧାର କରିଛି ।
ଦିଲ୍ଲୀ ନଗରନିଗମର ମୋଟ ୨୫୦ ଟି ଆସନ ପାଇଁ ଡିସେମ୍ବର ୪ ତାରିଖରେ ଭୋଟ ଗ୍ରହଣ ହେବ ଓ ୭ ତାରିଖରେ ଫଳାଫଳ ଘୋଷଣା କରାଯିବ । ଏନେଇ ଦିଲ୍ଲୀ ଶାସନ କ୍ଷମତାରେ ଥିବା ଆମ୍ ଆଦମୀ ପାର୍ଟି ପ୍ରାର୍ଥୀ ତାଲିକା ଘୋଷଣା କରିବା ସହ ଷ୍ଟାର ପ୍ରଚାରକ ତାଲିକା ବି ଘୋଷଣା କରିସାରିଛି ।