ବାୟୁସେନାର ଏମଆଇ-୧୭-ଭି୧୫ ହେଲିକପ୍ଟର ଦୁର୍ଘଟଣା ପ୍ରସଙ୍ଗ । ଆଜି ଗୃହକୁ ଅବଗତ କରାଇବେ ପ୍ରତିରକ୍ଷା ମନ୍ତ୍ରୀ
କନକ ବ୍ୟୁରୋ : ସିଡିଏସ ବିପିନ ରାୱତଙ୍କ ଏମଆଇ-୧୭ବି୫ ହେଲିକପ୍ଟର ଦୁର୍ଘଟଣା ନେଇ ଆଜି ସଂସଦରେ ଉତର ରଖିବେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ସଂସଦର ଦୁଇ ଗୃହରେ ରାଜନାଥ ହେଲିକପ୍ଟର ଦୁର୍ଘଟଣାର କାରଣ ବାବଦରେ କହିବେ । ଗତକାଲି ଅପରାହ୍ନରେ ତାମିଲନାଡୁର କୁନ୍ନୁର ପାଖରେ ବାୟୁସେନାର ଏମ୍ଆଇ-୧୭ବି୫ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଥିଲା । ଏହି ଦୁର୍ଘଟଣାରେ ପ୍ରାଣ ହରାଇଛନ୍ତି ସିଡିଏସ ବିପିନ ରାୱତ, ତାଙ୍କ ପତ୍ନୀ ମଧୁଲିକା ରାୱତଙ୍କ ସମେତ ୧୧ ବାୟୁସେନା ସଦସ୍ୟ । ବିପିନି ରାୱତଙ୍କ ବିୟୋଗରେ ରାଷ୍ଟ୍ରପତି, ପ୍ରଧାନମନ୍ତ୍ରୀ, ଗୃହମନ୍ତ୍ରୀ, ପ୍ରତିରକ୍ଷାମନ୍ତ୍ରୀ ସମେତ ଅନେକ ଦେଶର ନେତା ଶୋକ ପ୍ରକାଶ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାଷ୍ଟ୍ରପତି ରାମନାଥ କୋବିନ୍ଦ କହିଛନ୍ତି ଯେ ଜେନେରାଲ ବିପିନ ରାୱତ ଏବଂ ତାଙ୍କ ପତ୍ନୀ ମଧୁଲିକାଙ୍କ ଅକାଳ ବିୟୋଗରେ ମୁଁ ସ୍ତବ୍ଧ ଏବଂ ବ୍ୟଥିତ । ଦେଶ ଆଜି ତା’ର ବୀରପୁତ୍ରମାନଙ୍କ ମଧ୍ୟରୁ ଜଣଙ୍କୁ ହରାଇଛି । ଦେଶର ସୁରକ୍ଷା ପାଇଁ ଦୀର୍ଘ ୪ ଦଶନ୍ଧିର ନିସ୍ବାର୍ଥ ସେବା ଏବଂ ଅସାଧାରଣ ବୀରତା ତାଙ୍କର ପରିଚୟ ଥିଲା ବୋଲି ରାଷ୍ଟ୍ରପତି କହିବା ସହ ଶୋକାକୁଳ ପରିବାର ପ୍ରତି ସମବେଦନା ଜଣାଇଛନ୍ତି । ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ଶୋକବାର୍ତ୍ତାରେ କହିଛନ୍ତି ଯେ ହେଲିକପ୍ଟର ଦୁର୍ଘଟଣାରେ ଆମେ ଜେନେରାଲ ରାୱତ, ତାଙ୍କ ପତ୍ନୀ ଏବଂ ଅନ୍ୟ ସୁରକ୍ଷା କର୍ମୀଙ୍କୁ ହରାଇଛୁ। ଏଥିରେ ମୁଁ ମର୍ମାହତ । ଜେନେରାଲ ରାୱତ ପୂର୍ଣ୍ଣ ନିଷ୍ଠାର ସହିତ ଭାରତର ସେବା କରିଛନ୍ତି ବୋଲି ପ୍ରଧାନମନ୍ତ୍ରୀ କହିବା ସହ ଶୋକାକୁଳ ପରିବାରକୁ ସମବେଦନା ଜଣଶଇଛନ୍ତି ।
ଗୃହମନ୍ତ୍ରୀ ଅମିତ ଶାହ କହିଛନ୍ତି ଯେ ଜେନେରାଲ ରାୱତଙ୍କ ଅନୁକରଣୀୟ ଅବଦାନ ଏବଂ ପ୍ରତିବଦ୍ଧତାକୁ ଶବ୍ଦରେ ପ୍ରକାଶ କରିହେବ ନାହିଁ । ପ୍ରତିରକ୍ଷା ମନ୍ତ୍ରୀ ରାଜନାଥ କହିଛନ୍ତି ଯେ ରାୱତଙ୍କ ଅକାଳ ମୃତ୍ୟୁ ଆମର ଦେଶ ଏବଂ ସେନା ପାଇଁ ଅପୂରଣୀୟ କ୍ଷତି । କଂଗ୍ରେସ ନେତା ରାହୁଲ ଗାନ୍ଧି ମଧ୍ୟ ରାୱତଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି । ଆମେରିକା, ରୁଷ୍, ପାକିସ୍ତାନ ଏବଂ ଇସ୍ରାଏଲ୍ ରାୱତଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି ଏବଂ ପ୍ରତିରକ୍ଷା ସମ୍ପର୍କ ସୁଦୃଢ଼ କରିବା ଦିଗରେ ରାୱତଙ୍କ ଭୂମିକାକୁ ସେମାନେ ମନେ ପକାଇଛନ୍ତି । ଆମେରିକା ଦୂତାବାସ ଦ୍ବାରା ଜାରି ହୋଇଥିବା ଏକ ବିବୃତିରେ କୁହାଯାଇଛି ଯେ, ଭାରତର ସାମରିକ ସ୍ଥିତିକୁ ଏକ ନୂ୍ଆ ପର୍ଯ୍ୟାୟରେ ପହଞ୍ଚାଇବା ପାଇଁ ସିଡିଏସ୍ ରାୱତଙ୍କର ଏକ ନିର୍ଣ୍ଣାୟକ ଭୂମିକା ଥିଲା ।
ଆମେରିକାର ସେ ଜଣେ ଘନିଷ୍ଠ ବନ୍ଧୁ ଥିଲେ। ଗତ ସେପ୍ଟେମ୍ବରରେ ରାୱତଙ୍କ ଆମେରିକା ଗସ୍ତ ସଂକ୍ରାନ୍ତରେ ମଧ୍ୟ ଏଥିରେ କୁହାଯାଇଛି । ରୁଷ୍ ମଧ୍ୟ ରାୱତଙ୍କ ମୃତ୍ୟୁ ଘଟଣାରେ ଶୋକ ପ୍ରକାଶ କରିଛି । ରୁଷ୍ ରାଷ୍ଟ୍ରଦୂତ ନିକୋଲେ କୁଦାସେଭ୍ କହିଛନ୍ତି, ଭାରତ ଏହାର ଜଣେ ଶ୍ରେଷ୍ଠ ଦେଶଭକ୍ତଙ୍କୁ ହରାଇଲା ଏବଂ ରୁଷ୍ ମଧ୍ୟ ଜଣେ ଘନିଷ୍ଠ ବନ୍ଧୁଙ୍କୁ ହରାଇଲା । ଭାରତ ଏବଂ ରୁଷ୍ ମଧ୍ୟରେ ବିଭିନ୍ନ ଦ୍ବିପାକ୍ଷିକ ଏବଂ ରଣନୈତିକ ସମ୍ପର୍କ ସୁଦୃଢ଼ କରିବା ଦିଗରେ ତାଙ୍କର ଗୁରୁତ୍ବପୂର୍ଣ୍ଣ ଭୂମିକା ଥିଲା। ଇସ୍ରାଏଲ ଏବଂ ପାକିସ୍ତାନ ମଧ୍ୟ ରାୱତଙ୍କ ମୃତ୍ୟୁ ଘଟଣାରେ ଦୁଃଖ ପ୍ରକାଶ କରିଛନ୍ତି । ଇସ୍ରାଏଲ ପ୍ରତିରକ୍ଷା ମନ୍ତ୍ରୀ ରାୱତଙ୍କୁ ଜଣେ ପ୍ରକୃତ ବନ୍ଧୁ ବୋଲି କହିଛନ୍ତି । ଭାରତ ଏବଂ ଇସ୍ରାଏଲ ମଧ୍ୟରେ ପ୍ରତିରକ୍ଷା ସମ୍ପର୍କ ସୁଦୃଢ଼ କରିବାରେ ତାଙ୍କର ବଳିଷ୍ଠ ଭୂମିକା ଥିଲା ବୋଲି ସେ କହିଛନ୍ତି ।