ହାତୀ ସହ ସେଲଫି ପଡିଲା ମହଙ୍ଗା । ହାତୀ ପାଦ ତଳେ ଦଳି ହୋଇ ଦୁଇଜଣଙ୍କ ମୃତ୍ୟୁ, ମୃତ ପରିବାରକୁ ସହାୟତା ପ୍ରଦାନ କଲା ବନବିଭାଗ ।
କନକ ବ୍ୟୁରୋ : ଗଞ୍ଜାମ ଭଞ୍ଜନଗରରେ ହାତୀ ଆକ୍ରମଣରେ ପ୍ରାଣ ହରାଇଥିବା ଦୁଇଜଣଙ୍କ ପରିବାରକୁ ସହାୟତା ପ୍ରଦାନ କରିଛି ବନବିଭାଗ । ହାତୀ ଛୁଆ ଦେଖିବାକୁ ଯାଇଥିବା ବେଳେ ହାତୀ ଆକ୍ରମଣରେ ଜଣେ ବୃଦ୍ଧାଙ୍କ ଜୀବନ ଯାଇଥିବା ବେଳେ ସେଲଫି ନିଶାରେ ନାବାଳକ ପ୍ରାଣ ହରାଇଛି । ତୁରନ୍ତ ଉଭୟ ପରିବାରକୁ ବନ ବିଭାଗ ପକ୍ଷରୁ ୪୦ ହଜାର ଲେଖାଁଏ ଟଙ୍କା ଦିଆଯାଇଛି । ବାକି ୩ ଲକ୍ଷ ୬୦ ହଜାର ଟଙ୍କା ପରେ ଦିଆଯିବ ବୋଲି ବିଭାଗ ପକ୍ଷରୁ ପ୍ରତିଶୃତି ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଭଞ୍ଜନଗର ଉତରଘୁମୁସର ବନଖଣ୍ଡ ଗାଲେରୀ ରେଂଜ ବଦାଙ୍ଗିବିଟର ନୁଆପଲ୍ଲୀ ଗାଁ ନିକଟ କାଜୁ ଜଙ୍ଗଲରେ ଦୁଇଟି ହାତୀ ଛୁଆ ଜନ୍ମ ହୋଇଛନ୍ତି । ଏବଂ ୨୨ଟିକିଆ ହାତୀପଲ ଛୁଆଙ୍କୁ ସୁରକ୍ଷା ଦେଉଛନ୍ତି । ଏହି ଖବର ନିକଟସ୍ଥ ଗାଁରେ ପହଞ୍ଚିବା ପରେ ହାତୀ ଛୁଆକୁ ଦେଖିବା ପାଇଁ କାଜୁ ଜଙ୍ଗଲରେ ଲୋକଙ୍କ ଭିଡ ଲାଗିଥିଲା । ଅଧିକ ଲୋକଙ୍କୁ ଦେଖି ହାତୀପଲ ଚିଡି ଯାଇଥିଲେ । ହାତୀପଲରେ ଥିବା ଦନ୍ତାହାତୀ ଲୋକଙ୍କୁ ଆକ୍ରମଣ କରିଥିଲା । ହାତୀ ପାଦତଳେ ଦଳି ହୋଇ ସୁକୁରିଆ ନାଇକ ନାମକ ଜଣେ ବୃଦ୍ଧଙ୍କର ମୃତ୍ୟୁ ହୋଇଥିବା ବେଳେ ସେଲଫି ନିଶାରେ ପ୍ରାଣ ହରାଇଛି ୧୩ ବର୍ଷର ନାବାଳକ ଗଣେଷ ଗୌଡ଼ ।
ସେହିଭଳି ଗଣେଷ ଗୌଡ ହାତୀର ନିକଟତର ହୋଇ ଫଟୋ ଉଠାଉଥିବା ବେଳେ ହାତୀ ସୁଣ୍ଢରେ ଘୋଷାଡି ଆଣି ବହୁ ଦୁରକୁ ଫିଙ୍ଗି ଦେଇଥିଲା । ପରେ ଗୁରୁତର ଅବସ୍ଥାରେ ଗଣେଷକୁ ଉଦ୍ଧାର କରି ଡାକ୍ତରଖାନାକୁ ନେବା ବାଟରେ ରାସ୍ତାରେ ତାର ମୃତ୍ୟୁ ଘଟିଥିଲା । ସେପଟେ ବନବିଭାଗ ପକ୍ଷରୁ ମୃତକଙ୍କ ପରିବାରକୁ ୪୦ ହଜାର ଟଙ୍କା ସହାୟତା ରାଶି ଦିଆଯାଇଛି । ମୃତକଙ୍କ ପରବାରକୁ ୪ ଲକ୍ଷ ଲେଖାଏଁ କ୍ଷତିପୂରଣ ପ୍ରଦାନ କରାଯିବ ବୋଲି ପ୍ରତିଶୃତି ଦେଇଛନ୍ତି ଭଞ୍ଜନଗର ଏସିଏଫ ।
ସୁକୁରିଆର ମୃତଦେହ ନିକଟରେ ହାତୀ ଜଗି ରହିଥିବାରୁ ରାତି ଯାଏଁ ମୃତଦେହ ଉଧାର ହୋଇପାରିନଥିଲା । ରାତି ୨ଟା ବେଳକୁ ବନବିଭାଗ ନିଆଁ ହୁଳା ଓ ବାଣ ପୁଂଟାଇ ହାତୀ ଘଉଡ଼ାଇବା ପରେ ମୃତଦେହକୁ ଉଦ୍ଧାର କରାଯାଇଥିଲା । ତେବେ ଭଂଜନଗର ଅଞ୍ଚଳରେ ହାତୀ ପଲ୍ଲ ପଲ୍ଲ ହୋଇ ବୁଲୁଥିବାରୁ ହାତୀ ମଣିଷର ଲଢ଼େଇ ବାରମ୍ବାର ଦେଖବାକୁ ମିଳୁଛି ।