ଚେତାଇ ଦେଲେ ପରିବହନ ମନ୍ତ୍ରୀ, ଆସନ୍ତା ୧ରୁ କଡାକଡି ହେବ ନୂଆ ଟ୍ରାଫିକ ନିୟମ । ଗାଡି କାଗଜପତ୍ର ପାଇଁ ଆରଟିଓ ଅଫିସରେ ଅସମ୍ଭାଳ ଭିଡ ।
କନକ ବ୍ୟୁରୋ : ହାତରେ ଆଉ ମାତ୍ର ୪ ଦିନ । ପୁଣି ଥରେ କଡ଼ାକଡ଼ି ଭାବେ ଲାଗୁ ହେବ ନୂଆ ଟ୍ରାଫିକ୍ ନିୟମ । ଆଉ ନିର୍ଦ୍ଧାରିତ ସମୟ ପୂର୍ବରୁ ସମସ୍ତ କାଗଜପତ୍ର ପ୍ରସ୍ତୁତ କରିବା ପାଇଁ ରାଜ୍ୟର ବିଭିନ୍ନ ପରିବହନ କାର୍ଯ୍ୟାଳୟ ଗୁଡ଼ିକରେ ଲାଗୁଛି ଅସମ୍ଭାଳ ଭିଡ଼ । ଭୁବନେଶ୍ୱର, କଟକ, ନୟାଗଡ଼ ଏବଂ କେନ୍ଦ୍ରାପଡ଼ାରେ ଆଜି କେମିତି ଥିଲା ଆରଟିଓ ଅଫିସର ସ୍ଥିତି । ଏହାର ସ୍ଥିତି ପରଖିଥିଲା କନକ ନ୍ୟୁଜ ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦେଇଥିବା ସମୟ ସୀମା ସରିବା ପୂର୍ବରୁ ପରିବହନ ମନ୍ତ୍ରୀଙ୍କ ସତର୍କବାଣୀ ପୁଣି ଥରେ ଗାଡ଼ି କାଗଜପତ୍ର ପ୍ରସ୍ତୁତିକୁ ନେଇ ଲୋକଙ୍କ ଭିତରେ ତତ୍ପରତା ବଢ଼ାଇ ଦେଇଛି । ଏବେ ଲୋକଙ୍କ ହାତରେ ମାତ୍ର ୪ ଦିନ ସମୟ । ଡିସେମ୍ବର ପହିଲାରୁ ପୁଣି ପୂର୍ବଭଳି କଡ଼ାକଡ଼ି ଭାବେ ଲାଗୁ ହେବ ନୂଆ ଟ୍ରାଫିକ୍ ନିୟମ । ସେଇଥିପାଇଁ ଭୁବନେଶ୍ୱର ଆରଟିଓ- ଦୁଇରେ ଏହି ଅସମ୍ଭାଳ ଭିଡ଼ । ଦିନ ସରିଯାଉଛି ସିନା କିନ୍ତୁ ଲାଇନ୍ ସରୁନି । ଆଉ ଅନ୍ୟପଟେ ପରିବହନ ମନ୍ତ୍ରୀଙ୍କ ବୟାନ ରାଜଧାନୀରେ ଗାଡି ଚାଳକଙ୍କ ମନରେ ଛନକା ଭରିଛି ।
ଭୁବନେଶ୍ୱର ଭଳି କଟକରେ ବି ସେହି ସମାନ ଚିତ୍ର । କିଏ ରେଜିଷ୍ଟ୍ରସନ୍ ସାର୍ଟିଫିକେଟ୍ ପାଇଁ ଲାଇନରେ ଲାଗିଛି, ତ ଆଉ କିଏ ଡ୍ରାଇଭିଂ ଲାଇସେନ୍ସ ପାଇଁ ପରିବହନ କାର୍ଯ୍ୟାଳୟରେ ପହଂଚିଛି । ଏଣିକି, ବିନା କାଗଜପତ୍ରରେ ଗାଡ଼ି ଚଳାଇଲେ ଆଉ ମିଳିବନି ନିସ୍ତାର । ଉପଯୁକ୍ତ ପ୍ରମାଣପତ୍ର ନଥିଲେ ଆସନ୍ତା ମାସ ପହିଲାରୁ ଗଣିବାକୁ ହେବ ମୋଟା ଅଙ୍କର ତଣ୍ଡ । ତେଣୁ କଟକ ପରିବହନ କାର୍ଯ୍ୟାଳୟରେ ଲୋକ ଘଂଟା ଘଂଟା ଅପେକ୍ଷା କରି ପ୍ରସ୍ତୁତ କରୁଛନ୍ତି ଆବଶ୍ୟକ ଗାଡ଼ି କାଗଜପତ୍ର ।
ଭୁବନେଶ୍ୱର ରାଜମହଲ ଛକରେ ହୋଇଥିବା ଗଣ୍ଡଗୋଳକୁ ଦୃଷ୍ଟିରେ ରଖି, କାଗଜପତ୍ର ପ୍ରସ୍ତୁତ ପାଇଁ ନିୟମକୁ ୩ ମାସ ପାଇଁ କୋହଳ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଉ ଯେତେବେଳେ ଏହି ସମୟ ସୀମା ସରି ଆସୁଛି, ଗାଡ଼ି ଚାଳକକୁ ପୁଣି ଥରେ ଚେତାଇ ଦେଇଛନ୍ତି ପରିବହନ ମନ୍ତ୍ରୀ । ଗାଡି କାଗଜପତ୍ର ପାଇଁ ୩ ମାସର ଲମ୍ବା ସମୟ ଦିଆଯାଇଥିଲା କିନ୍ତୁ ଏହାପରେ ଏହାକୁ କୋହଳ କରାଯିବ ନାହିଁ । ପରିବହନ ମନ୍ତ୍ରୀଙ୍କ ଏହି ସତର୍କବାଣୀ ପରେ ଭୁବନେଶ୍ୱର-କଟକ ସମେତ କେନ୍ଦ୍ରାପଡ଼ା ଏବଂ ନୟାଗଡ଼ ଆରଟିଓ କାର୍ଯ୍ୟାଳୟରେ ଦେଖିବାକୁ ମିଳୁଛି ଲୋକଙ୍କ ପ୍ରବଳ ଗହଳି ।