କନକ ବ୍ୟୁରୋ : ଶନିବାର ବିଳମ୍ବିତ ରାତ୍ରୀରୁ କଣାସ ରେଳବାଇ ଷ୍ଟେସନ ପ୍ଲାଟଫର୍ମରେ ଜଣେ ଯୁବକଙ୍କର ଖଣ୍ଡବିଖଣ୍ଡିତ ଶବ ସକାଳ ଯାଏଁ ପଡ଼ି ରହିଥିବା ଯୋଗୁଁ ସ୍ଥାନୀୟ ଗ୍ରାମବାସୀ ଉତ୍ତ୍ୟକ୍ତ ହୋଇ ରେଳ ରୋକ କରିଥିଲେ। ଶବଟି ହେଉଛି ଡେଲାଙ୍ଗ ଥାନା ଅନ୍ତର୍ଗତ ଜଗଦଳପୁର ଗ୍ରାମର ୨୭ ବର୍ଷୀୟ ଧୀରେନ କୁମାର ରାଉତରାୟଙ୍କ। ଏ ସଂକ୍ରାନ୍ତରେ ଷ୍ଟେସନ୍ ମାଷ୍ଟର ଜିଆରପିକୁ କୌଣସି ସୂଚନା ଦେଇ ନଥିଲେ ବୋଲି କୁହାଯାଉଛି। ଆଜି ସକାଳେ ସ୍ଥାନୀୟ ଲୋକେ ଏ କଥା ଷ୍ଟେସନ୍ ମାଷ୍ଟରଙ୍କୁ ଜଣାଇବା ସତ୍ତ୍ୱେ ସେ କୌଣସି ଗୁରୁତ୍ୱ ଦେଇ ନଥିଲେ।
Kanak News is now on WhatsApp
Join and get latest news updates delivered to you via WhatsApp
ଶବଟିକୁ କୁକୁର ଓ କୁଆ ଖାଉଥିବା ଦେଖି ଗ୍ରାମବାସୀମାନଙ୍କ ମଧ୍ୟରେ ଉତ୍ତେଜିତ ହୋଇପଡ଼ିଥିଲେ। ବହୁ ସଂଖ୍ୟକ ଲୋକେ ସେତେବେଳେ ଆସୁଥିବା ପୁରୀ-କଟକ-ପୁରୀ ପାସେଞ୍ଜର ଟ୍ରେନକୁ ଲେବେଲ୍ କ୍ରସିଂ ଠାରେ ଅଟକାଇଥିଲେ। ଫଳରେ ଟ୍ରେନଟି ସକାଳ ୯ଟାରୁ ୧୦: ୩୦ ଯାଏଁ ଅଟକି ରହିବାରୁ ସେ ଧାରଣାରେ ରେଳ ଚଳାଚଳ ବ୍ୟାହତ ହୋଇଥିଲା। ଟ୍ରେନ୍ ଲେବଲ୍ କ୍ରସିଂ ଉପରେ ଅଟକି ଯାଇଥିବାରୁ ଡେଲାଙ୍ଗ-କଣାସ ସଡ଼କ ପଥରେ ବି ଯୋଗାଯୋଗ ସମ୍ପୂର୍ଣ୍ଣ ବନ୍ଦ ହୋଇ ଯାଇଥିଲା।
ଖବର ପାଇ ରେଳ ବିଭାଗ ସବ୍-ଇନସପେକ୍ଟର୍ ଏସ୍ କେ ବାହିନୀପତି ସଦଳ ବଳେ ଘଟନାସ୍ଥଳରେ ପହଞ୍ଚି ଲୋକମାନଙ୍କ ସହ ଆଲୋଚନା କରିବାରୁ ରେଳପଥ ଅବରୋଧ ହଟିଥିଲା।ମୃତ ଯୁବକ ଗତ ରାତିରେ ଅନ୍ୟ କେତେକ ଯୁବକଙ୍କ ସମେତ ଉକ୍ତ ଷ୍ଟେସନ୍ ମାଷ୍ଟରଙ୍କ ଭୋଜିଭାତ କରି ଖାଇବା ସହ ମଦ୍ୟପାନ କରିଥିଲେ ବୋଲି କେତେକ କହୁଛନ୍ତି। ପୁଲିସ ଶବ ଉଦ୍ଧାର କରି ବ୍ୟବଚ୍ଛେଦ ନିମନ୍ତେ ପଠାଇବା ସହ ଘଟନାର ତଦନ୍ତ ଆରମ୍ଭ କରିଛି।