କୋର୍ଟଙ୍କ ବଡ ନିଷ୍ପତ୍ତି : ପୁଅ-ବୋହୂଙ୍କ ଝଗଡାକୁ ଆଉ ସହିବେନି ବାପା ମା’; ଚାହିଁଲେ ବୋହୂକୁ ଘରୁ କରିପାରିବେ ବେଦଖଲ

କନକ ବ୍ୟୁରୋ : କିଛି ପରିବାରରେ ପୁଅ ବୋହୂଙ୍କ ଝଗଡା ମଧ୍ୟରେ ପେଶି ହୋଇଯାଆନ୍ତି ବାପା ମାଆ । ଚାହିଁଲେ ବି ମୁହଁ ଖୋଲିପାରନ୍ତିନି । ହେଲେ ଏବେ ଅସହାୟ ହୋଇପଡୁଥିବା ବାପା ମାଆଙ୍କ ପାଇଁ ମୁହଁ ଖୋଲିଛନ୍ତି ଦିଲ୍ଲୀ ହାଇକୋର୍ଟ । ଏପରି ଏକ ରାୟ ଦେଇଛନ୍ତି ଯାହା ସେମାନଙ୍କୁ ଆଶ୍ୱସ୍ତ କରିଛି ।

ଏଣିକି ପୁଅ-ବୋହୂଙ୍କ ମଧ୍ୟରେ ହେଉଥିବା କଳି ଝଗଡା ସହିବାକୁ ବାଧ୍ୟ ନୁହଁନ୍ତି ବୃଦ୍ଧ ବାପାମାଆ । ସେମାନେ ଚାହିଁଲେ ବୋହୁକୁ ଘରୁ ମଧ୍ୟ ବାହାର କରିଦେଇପାରିବେ । ଘରୋଇ ହିଂସାକୁ ନେଇ ଏପରି ଗୁରୁତ୍ୱପୂର୍ଣ୍ଣ ରାୟ ପ୍ରଦାନ କରିଛନ୍ତି ଦିଲ୍ଲୀ ହାଇକୋର୍ଟ । ହାଇକୋର୍ଟଙ୍କ ରାୟ ମୁତାବକ, ଅଧିକାଂଶ ସମୟରେ କଳି ଝଗଡା କରୁଥିବା ବୋହୂକୁ ଶାଶୁଶ୍ୱଶୁରଙ୍କ ସହ ମିଳିତ ଭାବେ ଘରେ ରହିବା ନେଇ କୌଣସି ଅଧିକାର ନାହିଁ । ଶାନ୍ତିପୂର୍ଣ୍ଣ ଜୀବନ ଯାପନ ପାଇଁ ସେମାନେ ବୋହୂକୁ ଘରୁ ବେଦଖଲ କରିପାରିବେ । ନିମ୍ନ ଅଦାଲତଙ୍କ ରାୟକୁ ଚ୍ୟାଲେଞ୍ଜ କରି ଜଣେ ବୋହୂ କରିଥିବା ଆବେଦନର ଶୁଣାଣି କରି ଜଷ୍ଟିସ ଯୋଗେଶ ଖାନ୍ନା ଏହି ରାୟ ପ୍ରଦାନ କରିଛନ୍ତି ।

ଜଣେ ବୋହୂ ଶ୍ୱଶୁର ଘରେ ରହିବା ପାଇଁ ଦିଆଯାଉନଥିବା ନେଇ କୋର୍ଟରେ ଅଭିଯୋଗ କରିଥିଲେ । ହେଲେ ଏହି ମାମଲାର ବିଚାର କରି କୋର୍ଟ କହିଛନ୍ତି ଯେ, ଯଦି ବୋହୂ ଅଯଥା କାରଣରେ ଅଶାନ୍ତି ସୃଷ୍ଟି କରେ ତେବେ ଶାଶୂଶଶ୍ୱର କିଣିଥିବା ସମ୍ପତ୍ତିରେ ବୋହୂର କିଛି ଅଧିକାର ରହିବନି । ଖାସ୍ କରି ଏକ ଯୌଥ ପରିବାର ମାମଲାରେ ଏହି ନିୟମ ଲାଗୁ କରାଯିବ । ଆବଶ୍ୟକ ହେଲେ ଛୋଟ ପରିବାରରେ ମଧ୍ୟ ଏହି ନିୟମ ଲାଗୁ ହେବ । ହେଲେ ଯେପର୍ଯ୍ୟନ୍ତ ଏହି ମାମଲା କୋର୍ଟରେ ବିଚାରାଧିନ ଥିବ ବା ପୁଅ ବୋହୂଙ୍କ ମଧ୍ୟରେ ଛାଡପତ୍ର ହୋଇନଥିବ ସେପର୍ଯ୍ୟନ୍ତ ବୋହୂ ରହିବାକୁ ବିକଳ୍ପ ବ୍ୟବସ୍ଥା କରାଯିବ ।

ଶାଶୂ ଏବଂ ଶଶ୍ୱର ବରିଷ୍ଠ ନାଗରିକ । ସେମାନେ ଜୀବନର ଅପରାହ୍ଣରେ ଉପନୀତ । ପୁଅବୋହୂଙ୍କ କଳିଝଗଡାରେ ପ୍ରଭାବିତ ନହୋଇ ଶାନ୍ତିପୂର୍ଣ୍ଣ ଜୀବନଯାପନ କରିବା ସେମାନଙ୍କ ଅଧିକାର । କୋର୍ଟଙ୍କ କହିବାନୁଯାୟା, ଯଦି ବୋହୂ ଶାଶୂ ଶ୍ୱଶୁରଙ୍କ ସେବା କରୁ ନଥାଏ, ଘରର ଶୃଙ୍ଖଳା ବାହାରେ ନିଜ ମନଇଚ୍ଛା କାମ କରୁଥାଏ ଏହାକୁ ସହିବାକୁ ବାଧ୍ୟ ନୁହନ୍ତି ଶାଶୂ ଶ୍ୱଶୁର । ନିଜର ମାନସିକ ଶାନ୍ତି ପାଇଁ ସେମାନେ ଚାହିଁଲେ ଏପରି ବୋହୂକୁ ଘରୁ ବାହାର କରିପାରିବେ । କିନ୍ତୁ ଏଥିପାଇଁ ଯଥେଷ୍ଟ ପ୍ରମାଣ ଥିବା ଦରକାର ।