କରୋନାର ତୃତୀୟ ଲହରକୁ ନେଇ ସତର୍କ କଲେ ଡାକ୍ତର । କହିଲେ, ତୃତୀୟ ଲହରରେ ପିଲାଙ୍କୁ ବିପଦ, ତୁରନ୍ତ ଟିକା ନିଅନ୍ତୁ ବାପା, ମାଆ
କନକ ବ୍ୟୁରୋ: ଥରକୁଥର କରୋନା ତାର ରୂପ ବଦଳାଇ ବିଭିନ୍ନ ବୟସବର୍ଗଙ୍କୁ ଟାର୍ଗେଟ କରୁଛି । ପ୍ରଥମ ଲହରରେ ଏହା ବୟସ୍କମାନଙ୍କୁ ଅଧିକ ପ୍ରଭାବିତ କରିଥିଲା, ଯଦିଓ ଯୁବବର୍ଗଙ୍କ ଦ୍ୱାରା ଅଧିକ ସଂକ୍ରମିତ ହୋଇଥିଲା । ଦ୍ୱିତୀୟ ଲହର ବେଳକୁ ଏହା ଯୁବପିଢୀଙ୍କୁ ଅଧିକ ପ୍ରଭାବିତ କରୁଛି । ଘରର ରୋଜଗାରିଆ ବ୍ୟକ୍ତିଙ୍କୁ ହସ୍ପିଟାଲ ବେଡକୁ ନେଇଯାଉଛି । ଅବସ୍ଥା ଗୁରୁତର ହେଲେ ମୃତ୍ୟୁ ମଧ୍ୟ ହେଉଛି । ତେଣୁ ଆଶଙ୍କା କରାଯାଉଛି କରୋନାର ତୃତୀୟ ଲହର ପିଲାମାନଙ୍କୁ ଅଧିକ ଆକ୍ରମଣ କରିପାରେ । ଏଭଳି ଆଶଙ୍କା ପଛରେ ଯଥେଷ୍ଟ ଯୁକ୍ତି ବି ରହିଛି ।
Kanak News is now on WhatsApp
Join and get latest news updates delivered to you via WhatsApp
ଦେଶର ପ୍ରତିଷ୍ଠିତ ହୃଦରୋଗ ବିଶେଷଜ୍ଞ ତଥା ନାରାୟଣ ହୃଦୟାଳୟର ପ୍ରତିଷ୍ଠାତା ଡାକ୍ତର ଦେବୀ ସେଠୀଙ୍କ କହିବା ହେଲା, ଅଧିକାଂଶ ଯୁବବର୍ଗ କରୋନାରେ ଆକ୍ରାନ୍ତ ହୋଇସାରିଲେଣି କିମ୍ବା ତୃତୀୟ ଲହର ବେଳକୁ ଟିକା ନେଇସାରିବେଣି । କିନ୍ତୁ ୧୮ ବର୍ଷରୁ ତଳକୁ ଟିକା ନେବାର ବ୍ୟବସ୍ଥା ନଥିବାରୁ ଏଥର ସେହିମାନେ ଭୂତାଣୁର ଟାର୍ଗେଟ ପାଲଟିବେ ।
ବିଶେଷଜ୍ଞ ଡାକ୍ତରଙ୍କ କହିବା ହେଲା, ଦେଶରେ ପିଲା କରୋନା ଆକ୍ରାନ୍ତ ହେଲେ ସେମାନଙ୍କୁ ଚିକିତ୍ସା ସେବା ଯୋଗାଇଦେବା ନେଇ ଏକ ବଡ ସମସ୍ୟା ରହିଛି ।
ପିଲାଙ୍କୁ କରୋନା ହେଲେ କ’ଣ ହେବ?
– ଆମ ଦେଶରେ ୧୨ ବର୍ଷରୁ କମ୍ ବୟସର ପ୍ରାୟ ୧୬ କୋଟି ୫୦ ଲକ୍ଷ ପିଲା ଅଛନ୍ତି
– ସେମାନଙ୍କ ଭିତରୁ ମାତ୍ର ୫% ଗୁରୁତର ହେଲେ ୧ ଲକ୍ଷ ୬୫ ହଜାର ପେଡିଆଟ୍ରିକ ଆଇସିୟୁ ଦରକାର
– ଏବେ ବୟସ୍କଙ୍କ ପାଇଁ ୯୦ ହଜାର ଓ ପିଲାଙ୍କ ପାଇଁ ୨ ହଜାରରୁ ବି କମ୍ ଆଇସିୟୁ ବେଡ ସହ ଆମେ ସଂଘର୍ଷ କରୁଛେ
– ତେଣୁ ଆମେ ପିଲାଙ୍କୁ ନଜରରେ ରଖି କରୋନାର ତୃତୀୟ ଲହର ପାଇଁ ପ୍ରସ୍ତୁତ ହେବାକୁ ପଡିବ
୬ ମାସର କିମ୍ବା ବର୍ଷକର ଛୁଆ କରୋନା ଆକ୍ରାନ୍ତ ହେଲେ, ତାକୁ ଏକୁଟିଆ କରୋନା ହସ୍ପିଟାଲରେ ଛାଡି ଦେଇ ହେବ କି? ଛୋଟ ଛୁଆର ହସ୍ପିଟାଲରେ ଚିକିତ୍ସା ବେଳେ ବାପା,ମାଆଙ୍କ ଭିତରୁ କେହି ପାଖରେ ରହିବାକୁ ପଡିବ ।
ଗୋଟିଏ ପଟେ ଆମ ପାଖରେ ଡାକ୍ତର, ନର୍ସଙ୍କ ଘୋର ଅଭାବ ରହିଛି । ଅନ୍ୟପଟେ ଖୀର ଖାଉଥିବା ଛୁଆ ସହିତ ମାଆକୁ ବି ହସ୍ପିଟାଲ ଆଇସିୟୁରେ ରହିବାକୁ ପଡିବ । ଛୋଟଛୁଆ କିଭଳି ମୁହଁରୁ ଅକ୍ସିଜେନ ମାସ୍କ କାଢିନଦିଏ, ତାକୁ ଜଗିବାକୁ ପଡିବ । ତେଣୁ ବିଶେଷଜ୍ଞ ଡାକ୍ତର କହିଛନ୍ତି ତୃତୀୟ ଲହରି ପାଇଁ ପ୍ରସ୍ତୁତି କରିବାକୁ ହେଲେ ପ୍ରଥମେ ପିଲାଙ୍କ ବାପା, ମାଆଙ୍କ ଟିକାକରଣ କରିବାକୁ ପଡିବ । ଏଥିପାଇଁ ଆମକୁ ଆଗାମୀ କିଛିାସ ମଧ୍ୟରେ ପ୍ରାୟ ୩୦ କୋଟି ବାପା, ମାଆଙ୍କ ଟିକାକରଣ ସାରିବାକୁ ପଡିବ ।