କନକ ବ୍ୟୁରୋ : ରାୟଗଡ଼ା ଜିଲ୍ଲାର ମୁନିଗୁଡ଼ା, କଲ୍ୟାଣସିଂହପୁର ଓ ବିଷମକଟକ ବ୍ଲକ ମଝିରେ ଥିବା ନିୟମଗିରି ପାହାଡ଼ରେ ବସବାସ କରନ୍ତି ଆଦିମ ଜନଜାତି ଡଙ୍ଗରିଆ ସମ୍ପ୍ରଦାୟ । ନିୟମଗିରି ପାହାଡ଼ ଏମାନଙ୍କ ରୋଜଗାରର ମାଧ୍ୟମ ହୋଇଥିବା ବେଳେ ପାହାଡ଼ରୁ ଫଳମୂଳ ଓ ଜଙ୍ଗଲଜାତ ଜିନିଷ ସଂଗ୍ରହ କରି ଏମାନେ ଜୀବିକା ନିର୍ବାହ କରନ୍ତି । ତେବେ ସପୁରି ଚାଷ ଏମାନଙ୍କର ଏକ ପ୍ରମୁଖ ଚାଷ । ପାହାଡ଼ରେ ଥିବା ସପୁରି ବାଡ଼ରୁ ଏମାନେ ସପୁରି ଅମଳ କରନ୍ତି । ଡଙ୍ଗରିଆ ମହିଳା ଏବଂ ପୁରୁଷ ମାନେ ପାହାଡ଼ରୁ ସପୁରି ତୋଳିବା ପରେ ସାଇକେଲ କିମ୍ବା ନିଜେ ମୁଣ୍ଡରେ ବୋହି ଆଣନ୍ତି । ସ୍ଥାନୀୟ ବଜାରରେ ଗୋଟିଏ ଗୋଟିଏ ସପୁରିକୁ ୧୫ରୁ ୨୦ ଟଙ୍କାରେ ବିକ୍ରି କରି କିଛି ପଇସା ରୋଜଗାର କରନ୍ତି । ଆଉ ଏଥିରେ ଚଳେ ଏମାନଙ୍କ ତେଲତୁଣର ସଂସାର ।
Kanak News is now on WhatsApp
Join and get latest news updates delivered to you via WhatsApp
ଜନଜାତି ମାନଙ୍କର ଆର୍ଥିକ ସ୍ଥିତିରେ ଉନ୍ନତି ପାଇଁ ସରକାର ଡଙ୍ଗରିଆ କନ୍ଧ ଉନ୍ନୟନ ସଂସ୍ଥା ଜରିଆରେ ଅନେକ ଯୋଜନା ପ୍ରଣୟନ କରିଛନ୍ତି । ହେଲେ ଶୀତଳଭଣ୍ଡାର , ପ୍ରକ୍ରିୟାକରଣ ୟୂନିଟ୍ ଓ ବଜାର ବ୍ୟବସ୍ଥା ନଥିବାରୁ ଏମାନଙ୍କୁ ଅନେକ ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ । ଫଳରେ ବାଧ୍ୟ ହୋଇ ପଡ଼ୋଶୀ ରାଜ୍ୟକୁ କମ୍ ଦରରେ ସପୁରି ବିକ୍ରି କରିଥାଆନ୍ତି ଡ଼ଙ୍ଗରିଆ ଜନଜାତିର ଲୋକେ ।