କନକ ବ୍ୟୁରୋ : ବିଜେଡିରୁ ବହିଷ୍କୃତ ହେଲେ ଦାମୋଦର ରାଉତ । ଦଳବିରୋଧୀ ମନ୍ତବ୍ୟ ଦାମଙ୍କ ପାଇଁ ଘାତକ ସାବ୍ୟସ୍ତ ହୋଇଛି । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ଦାମ ରାଉତଙ୍କୁ ଦଳରୁ ବହିଷ୍କୃତ କରାଯାଇଥିବା ପ୍ରେସ ଇସ୍ତାହାରରେ ପ୍ରକାଶ ପାଇଛି । ତେବେ ବିଜେଡିରୁ ବହିଷ୍କୃତ ହେବା ପରେ ଦଳ ଓ ସୁପ୍ରିମୋଙ୍କ ବିରୋଧରେ ବିଷ ଓଗାଳିଛନ୍ତି ଦାମ । ତାଙ୍କୁ ବିନା କାରଣରେ ମନ୍ତ୍ରୀପଦରୁ ବିଦା କରାଯାଇଥିଲା । ଏପରିକି ଦଳର ଉପସଭାପତି, ପଯ୍ୟବେକ୍ଷକ ପଦରୁ ମଧ୍ୟ ବିନା କାରଣ ଦର୍ଶାଇ ତାଙ୍କୁ ବାଦ୍ ଦିଆଯାଇଥିଲା । ଆଉ ଏବେ ଦଳରୁ ବହିଷ୍କୃତ କରିବା ପରେ ଅଧିକ କ’ଣ ହେଲା ବୋଲି ସେ ପ୍ରଶ୍ନ କରିଛନ୍ତି । ଗତ ଡିସେମ୍ବର ମାସରୁ ସେ ଦଳରେ ଥିବା କଥା ଜାଣିପାରୁନାହାନ୍ତି । ଏପରିକି ଏହି ସମୟ ମଧ୍ୟରେ ତାଙ୍କୁ ଦଳ ପକ୍ଷରୁ କେହି ସର୍ମ୍ପକ କରିନଥିବା କହିଛନ୍ତି ଦାମ ।
Kanak News is now on WhatsApp
Join and get latest news updates delivered to you via WhatsApp
ବିଜେଡିରୁ ବହିଷ୍କୃତ ହେବା ନେଇ ସେ ବିବତ୍ର ନୁହଁନ୍ତି ବୋଲି କହିବା ସହ ପାଲଟା ପ୍ରଶ୍ନ କରିଛନ୍ତି, ବିଜୁ ଜନତା ଦଳରେ ସଭାପତି କିଏ? ନୈତିକତା ଦୃଷ୍ଟିରୁ ନବୀନ ସଭାପତି ନୁହଁନ୍ତି ଓ ସ୍ଥିତି ଦେଖି ନବୀନ ନୀତି ବଦଳାଇବା ଲୋକ ବୋଲି କହିବାକୁ ଭୁଲିନାହାନ୍ତି ଦାମ । ଏହାଛଡା ନବୀନଙ୍କ ସହ ବିଜୁ ଅମଳର କେଉଁ ଲୋକ ଅଛନ୍ତି ବୋଲି ଓଲଟା ପ୍ରଶ୍ନ କରିଛନ୍ତି । ଦୁର୍ନୀତି ସର୍ମ୍ପକରେ ମୁହଁ ଖୋଲିବାରୁ ଏଭଳି ପରିସ୍ଥିତି ହୋଇଛି । ଯାହାର ଜବାବ ଅଗାମୀ ଦିନରେ ଓଡିଶାବାସୀ ଦେବେ । ଯେଉଁ ଦୁନୀର୍ତି ପ୍ରସଙ୍ଗକୁ ନେଇ ଦଳରୁ ତାଙ୍କୁ ବହିଷ୍କୃତ କରାଯାଇଛି ଏବେ ସେହି ପ୍ରସଙ୍ଗକୁ ଅଧିକ ତ୍ରୀବତର କରିବି ବୋଲି ଦାମ ଗଣମାଧ୍ୟମରେ କହିଛନ୍ତି ।
ଏସବୁ ଭିତରେ ବିଜେଡିରେ ସମ୍ବିଧାନ ନଥିବା ବୋଲି କହିଛନ୍ତି ଦାମ । ତେବେ ବହିଷ୍କୃତ ହେବା ପରେ ଅନ୍ୟ କୌଣସି ଦଳରେ ଯୋଗ ଦେବେ ନାହିଁ ବୋଲି ଦୃଢତାର ସହ କହିଛନ୍ତି । ସାଧାରଣ ଲୋକଙ୍କ ସହ ରହିଛି ତେଣୁ ଆଗାମୀ ଦିନରେ ନିର୍ବାଚନ ଲଢିବି । କେଉଁ ଟିକେଟରେ ନିର୍ବାଚନ ଲଢିବା ପ୍ରସଙ୍ଗରେ ଦାମ କହିଛନ୍ତି, ଦଳ ବା ଦଳୀୟ ଟିକେଟ ମୋ ପାଇଁ ଅନିବାର୍ଯ୍ୟ ନୁହେଁ । କେବଳ ପାରାଦ୍ୱୀପ ନୁହେଁ ବରଂ ଖୋର୍ଦ୍ଧା, ଜଟଣୀ ଏପରିକି ଓଡିଶାର ଯେକୌଣସି ସ୍ଥାନରୁ ନିର୍ବାଚନ ଲଢିବାକୁ ମୋର ସାମର୍ଥ୍ୟ ରହିଛି ବୋଲି କହି ଦମ୍ଭ ଦେଖାଇଛନ୍ତି ଦାମ ବାବୁ ।
ଦାମଙ୍କୁ ଦଳରୁ ବହିଷ୍କାର କରାଯିବା ପରେ ପ୍ରତିକ୍ରିୟା ରଖିଛନ୍ତି ଜଗତସିଂହପୁର ଜିଲ୍ଲା ସଭାପତି ବିଷ୍ଣ ଦାସ । ସେ କହିଛନ୍ତି ଦାମଙ୍କୁ ବହିଷ୍କାର କରିଥିବାରୁ ମୁଖ୍ୟମନ୍ତ୍ରୀଙ୍କୁ ସ୍ୱାଗତ । ବହୁ ଆଗରୁ ତାଙ୍କୁ ଦଳରୁ ବହିଷ୍କାର କରାଯିବାର ଥିଲା । ଦାମଙ୍କ ବହିଷ୍କାର ପରେ ଦଳ ମଜବୁତ ହେବ । ତେବେ ଏନେଇ ପୁଅ ସମ୍ବିତ ରାଉତରାୟ କହିଛନ୍ତି, ମୋ ମା’ଙ୍କ ଦେହ ଦୀର୍ଘ ଦେଢ ମାସ ହେଲା ଖରାପ ଅଛି, ସେ ହସ୍ପିଟାଲରେ ଆଡମିଟ ହୋଇଛନ୍ତି । ତେଣୁ ବହିଷ୍କୃତ ହୋଇଥିବା ବ୍ୟକ୍ତି ଓ ବହିଷ୍କାର କରିଥିବା ବ୍ୟକ୍ତି ହିଁ କହିପାରିବେ ଏହା ପଛର କ’ଣ କାରଣ ରହିଛି । ମୁଁ ଏବେ ମଧ୍ୟ ବିଜେଡି ଦଳରେ ଅଛି ବୋଲି କହିଛନ୍ତି ସମ୍ବିତ ।
ଗତ କିଛି ଦିନ ହେବ ଦଳ ବିରୋଧରେ ବେଶ ଆକ୍ରାମକ ହୋଇ ଉଠିଥିଲେ ଦାମ । ବିଭିନ୍ନ ବିଭାଗରେ ଦୁର୍ନୀତି ପ୍ରସଙ୍ଗ ଉଠାଇ ସରକାରଙ୍କ ପାଇଁ ସେ ଅଡୁଆ ସୃଷ୍ଟି କରୁଥିଲେ । ଚାରା, ଓମ୍ଫେଡ ଓ ସମବାୟ ଋଣ ଦୁର୍ନୀତି ନେଇ ସରକାରଙ୍କୁ ଘେରିଥିଲେ ଦାମ । ବିଜେଡିରେ ଥାଇ ବିରୋଧୀଙ୍କ ଭୂମିକା ତୁଲାଉଥିବା ନେଇ ତାଙ୍କ ବିରୋଧରେ ଅଭିଯୋଗ ହୋଇ ଆସୁଥିଲା । ସେପଟେ ଜଗତସିଂହପୁର ଜିଲ୍ଲା ବିଜେଡିରେ ଚାଲିଥିବା ଦଳୀୟ ଗୋଷ୍ଠୀକନ୍ଦଳ ତୀବ୍ର ହେବାରେ ଲାଗିଥିଲା । ଦଳ ବିରୋଧୀ କାର୍ଯ୍ୟ ନେଇ ନବୀନଙ୍କ ନିକଟରେ ହୋଇଥିଲା ଅଭିଯୋଗ । ଦାମୋଦର ରାଉତଙ୍କୁ ବହିଷ୍କାର ଲାଗି ଜଗତସିଂହପୁର ଜିଲ୍ଲା ବିଜେଡି କର୍ମୀ ଓ ନେତା ନବୀନଙ୍କ ନିକଟରେ ଫେରାଦ ହୋଇଥିଲେ । ଦଳୀୟ କର୍ମୀଙ୍କ ଅଭିଯୋଗକୁ ବିଚାର କରୁଛନ୍ତି ବୋଲି ନବୀନ କହିବା ପରେ ଦାମ ଦଳରୁ ବିଦା ହେବା ନେଇ ବାଟ ଫିଟୁଥିବା ଜଣା ପଡିଥିଲା । ଯାହା ଅନୁମାନ କରାଯାଉଥିଲା ତାହା ହେଲା । ଶେଷରେ ତାଙ୍କୁ ଦଳରୁ ନିଲମ୍ବନ କରିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ ।