ଅନ୍ୟ ଜାତିରେ ବିବାହର ପରିଣାମ କ’ଣ ଏତେ ଭୟଙ୍କର ?
ପ୍ରେମ କରିବା ପାପ ନୁହଁ କିନ୍ତୁ ଅନ୍ୟ ଜାତିରେ ପ୍ରେମ କରିବା ପାପ । ନାହିଁ ଆଜ୍ଞା ଆମେ କହୁନୁ , କହୁଛନ୍ତି କିଛି ସଭ୍ୟ ସମାଜର ମୁଖାଧାରୀ ବ୍ୟକ୍ତି । ଆମେ ଯେତେ ନିଜକୁ ଶିକ୍ଷିତ ଏବଂ ସଭ୍ୟ ସମାଜର ନାଗରିକ କହି ଡେଙ୍ଗୁରା ପିଟିଲେ ମଧ୍ୟ ଆମ ଭିତରର ଜାତି,ଅଜାତି,ବର୍ଣ୍ଣବୈଶମ୍ୟକୁ ଅକ୍ଷରେ ଅକ୍ଷରେ ପାଳନ କରୁ । କିନ୍ତୁ ପ୍ରେମ କ’ଣ ସତରେ ଏଭଳି ସଂକୀର୍ଣ୍ଣ ମନୋବୃତ୍ତିକୁ ଆପଣାଏ । ବୋଧହୁଏ ନାହିଁ । ସମାଜରେ ଏମିତି ଅନେକ ପ୍ରେମୀଯୁଗଳ ତଥା ଦମ୍ପତୀ ଥିବେ ଯେଉଁମାନେ ଅନ୍ୟଜାତିରେ ଭଲପାଇ କଠିନ ପରିସ୍ଥିତିରେ ଗତି କରିଥିବେ ଏବଂ ଅନ୍ୟ କିଛି ଦମ୍ପତୀଙ୍କ ଅସ୍ଥିତ୍ୱ ବି ଦୁନିଆରେ ଥିବ କି ନାହିଁ ତାହା ସନ୍ଦେହ । ଏଭଳି ସମାଜକୁ ଖାତିର ନକରି ଅନ୍ୟଜାତିରେ ଭଲପାଇ ବସିଥିଲେ ୨୩ ବର୍ଷୀୟ ପ୍ରଣୟ କୁମାର ଏବଂ ୨୧ ବର୍ଷୀୟା ଅମୃତା । ତେଲେଙ୍ଗାନାର ଏକ ସ୍କୁଲରୁ ଆରମ୍ଭ ହୋଇଥିବା ବନ୍ଧୁତା ପରମୁହୂର୍ତ୍ତରେ ପ୍ରେମ ଏବଂ ବିବାହର ରୂପ ନେଇଥିଲା । କିନ୍ତୁ ଏହି ବିବାହକୁ ଅମୃତାଙ୍କ ପରିବାର ତରଫରୁ ସ୍ୱୀକୃତି ମିଳିନଥିଲା । କାରଣ ଆଇ କିଛି ନୁହଁ ତଥାକଥିତ ବର ନିଚ୍ଚଜାତିର ଥିବାବେଳେ କନ୍ୟା ଉଚ୍ଚଜାତିର ଥିଲା । ତେବେ ପ୍ରେମ ଆଗରେ ସବୁକିଛି ମାନିଥିଲା ହାର । ଦୁହେଁ ବିବାହ ବନ୍ଧନରେ ବାନ୍ଧି ହୋଇଥିଲେ ଏବଂ ହସଖୁସିରେ ବିବାହର ୮ ମାସ ବିତି ଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ବିଧିର ବିଧାନ କୁହନ୍ତୁ କିମ୍ବା ଅମାନବିକତା ଅମୃତାଙ୍କ ସ୍ୱାସ୍ଥ୍ୟ ପରୀକ୍ଷା ପାଇଁ ଦୁହେଁ ଡାକ୍ତରଖାନା ଯିବା ସମୟରେ ଜଣେ ଅଜ୍ଞାତ ବ୍ୟକ୍ତି ପଛପଟୁ ଆସି ଦୁଇଥର ପ୍ରଣୟଙ୍କୁ ଏକ ଅସ୍ତ୍ର ମାଧ୍ୟମରେ ପ୍ରହାର କରିଥିଲେ । ଘଟଣାସ୍ଥଳରେ ହିଁ ତାଙ୍କର ଜୀବନ ଚାଲିଯାଇଥିଲା । ପେଟରେ ୫ ମାସର ଶିଶୁ ଧରିଥିବା ଅମ୍ୃତା ଘଟଣାସ୍ଥଳରେ ହିଁ ଚେତାଶୂନ୍ୟ ହୋଇଯାଇଥିଲେ । ହୋସ୍ ଆସିବା ପରେ ସେ କାହାରିକୁ ଚିହ୍ନିବାଭଳି ପରିସ୍ଥିତିରେ ନଥିଲେ । କିନ୍ତୁ କିଛି ସମୟ ପରେ ସେ ବାପା ଏବଂ ଦାଦାଙ୍କୁ ଏଥିପ୍ରତି ଦୋଷାରୋପ କରିଥିଲେ । ଅନ୍ୟଜାତିରେ ବିବାହ କରିଥିବାରୁ ବାପା,ଦାଦା ଖୁସି ନଥିଲେ ଏବଂ ଅମୃତା ଗର୍ଭବତୀ ହେବା ଜାଣିବା ପରେ ଦୁହେଁ ଗର୍ଭପାତ କରାଇ ଅନ୍ୟତ୍ର ବିବାହ କରିବାକୁ ମଧ୍ୟ କହି ଆସୁଥିଲେ । କିନ୍ତୁ ଏଥିରେ ଅରାଜି ହେବାରୁ ପ୍ରଣୟଙ୍କୁ ଜୀବନରେ ମାରିବା ଏବଂ ଜିଇଁ ଥାଉ ଥାଉ ନିଜ ଝିଅକୁ ମରିବା ପାଇଁ ଛାଡିଦେବା ଭଳି କାଣ୍ଡ ଘରଲୋକ କରିଦେଲେ । ଅମୃତା ସ୍ୱାମୀଙ୍କୁ ଖୁବ୍ ଭଲ ପାଉଥିଲେ ଏବଂ ସେ ଏବେ ନିଜ ଆଗନ୍ତୁକ ଶିଶୁକୁ ସ୍ୱାମୀ ରୂପେ ଦେଖିବେ ବୋଲି କହୁଛନ୍ତି ।