ନିୟମ ମାନିଲେନି ବୋଲି…ଚେକିଂ ନାଁରେ କନେଷ୍ଟବଳଙ୍କ ଦାଦାଗିରି: ବିଚ୍ ରାସ୍ତାରେ ଯୁବକଙ୍କୁ ଅସଭ୍ୟ ଭାଷାରେ ଗାଳି କରିବା ସହ ମାଡ ମାରି ଫଟାଇଦେଲେ ମୁହଁ
କିଛି ଦୂରରେ ଥିଲେ ବି ରୋକିଲେ ନାହିଁ ଫାଣ୍ଡି ଅଧିକାରୀ
କନକ ବ୍ୟୁରୋ: ବର୍ତ୍ତମାନ ସବୁଆଡେ ପାଳନ ହେଉଛି ସଡକ ସୁରକ୍ଷା ସପ୍ତାହ । ଲୋକମାନଙ୍କୁ ସଚେତନ କରାଯାଉଛି । ହେଲମେଟ ପିନ୍ଧିଥିବା ଲୋକଙ୍କୁ ଗୋଲାପ ଫୁଲ ଦେଇ ଉତ୍ସାହିତ କରାଯାଉଛି ଓ ନପିନ୍ଧିଥିବା ଅମାନିଆଙ୍କୁ ସଚେତନ କରିବା ସହ ତାଗିଦ୍ ମଧ୍ୟ କରାଯାଉଛି । ହେଲେ ଖଲ୍ଲିକୋଟରୁ ଆସିଛି ଅଭାବନୀୟ ଚିତ୍ର ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଗତକାଲି ସନ୍ଧ୍ୟାରେ ଖଲ୍ଲିକୋଟ୍ ଥାନା ଅନ୍ତର୍ଗତ ଭେଜିପୁଟ ଫାଣ୍ଡି ତରଫରୁ ଗାଡି ଚେକିଂ କରାଯାଉଥିବା ବେଳେ କନେଷ୍ଟବଳ ସୁଦର୍ଶନ ଜେନାଙ୍କ ଦବଙ୍ଗଗିରି ଦେଖିବାକୁ ମିଳିଛି । ସୁଦର୍ଶନ ଜଣେ ଯୁବକଙ୍କୁ ଅସଭ୍ୟ ଭାଷାରେ ଗାଳି ଗୁଲଜ କରିବା ସହ ତାଙ୍କୁ ଚାପୁଡା ମାରିବାର ଏକ ଭିଡିଓ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି । ଏପରିକି ପୋଲିସ ବାବୁଙ୍କ ମାଡରେ ଯୁବକଙ୍କ ମୁହଁ ଫାଟି ଯାଇ ରକ୍ତ ବାହାରିଛି ।
ତେବେ ପ୍ରଶ୍ନ ଉଠୁଛି ଯୁବକ ଜଣଙ୍କ ଯଦି କିଛି ନିୟମ ଭାଙ୍ଗି ଥିଲେ ତେବେ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯାଇପାରିଥାନ୍ତା । ହେଲେ ସେଭଳି କିଛି ନକରି ବିଚ୍ ରାସ୍ତା ଉପରେ ମାଡ ମାରିବାକୁ ପୋଲିସକୁ ଏହି ଅଧିକାର ଦେଲା କିଏ । ସବୁଠାରୁ ବଡ କଥା ହେଉଛି, ଘଟଣାସ୍ଥଳର ମାତ୍ର କିଛି ଦୂରରେ ଫାଣ୍ଡି ଅଧିକାରୀ ଉପସ୍ଥିତ ରହିଥିଲେ ମଧ୍ୟ କନେଷ୍ଟବଳଙ୍କୁ ରୋକିବା ବଦଳରେ ସମ୍ପୃକ୍ତ ଯୁବକଙ୍କୁ ସାଙ୍ଗରେ ନେଇ ଯାଇଥିଲେ ।