ସାମୁଦ୍ରିକ ଝଡ଼ର ରୂପ ନେଇ ସ୍ଥଳଭାଗ ଆଡକୁ ମୁହାଁଉଛି ବାତ୍ୟା ‘ନିସର୍ଗ’ । କାଲି ଅପରାହ୍ଣରେ ଗୁଜରାଟର ହରିହରେଶ୍ୱର ଏବଂ ଡାମନ ମଧ୍ୟବର୍ତୀ ଅଂଚଳରେ କରିବ ଲ୍ୟାଣ୍ଡଫଲ, ଘଂଟାପ୍ରତି ୧୨୦ କିଲୋମିଟର ବେଗରେ ବହିପାରେ ପବନ ।
କନକ ବ୍ୟୁରୋ: ମାଡି ଆସୁଛି ବାତ୍ୟା ନିସର୍ଗ । ଆରବ ସାଗରରେ ସୃଷ୍ଟି ହୋଇଥିବା ଏହି ସାମୁଦ୍ରିକ ଝଡ଼ ପାଇଁ ଗୁଜୁରାଟ ଏବଂ ମହାରାଷ୍ଟ୍ରରେ ହାଇଆର୍ଲଟ ଜାରି କରାଯାଇଛି । ଉଭୟ କେନ୍ଦ୍ର ଏବଂ ରାଜ୍ୟ ସରକାର ବତ୍ୟାକୁ ନେଇ ପୁରା ସଜାଗ ରହିଛନ୍ତି । ଗୁଜୁରାଟ ମୁଖ୍ୟମନ୍ତ୍ରୀ ବିଜୟ ରୁପାଣି ବାତ୍ୟାକୁ ନେଇ ଜରୁରୀ ବୈଠକ କରିଛନ୍ତି । କରୋନା ସଂକଟ ଭିତରେ ବାତ୍ୟାର ମୁକାବିଲା ସରକାରଙ୍କ ଆଗରେ ଏକ ବଡ ଆହ୍ୱାନ ହୋଇ ଛିଡା ହୋଇଛି । ପାଣିପାଗ ବିଭାଗର ସୁଚନା ଅନୁସାରେ ବାତ୍ୟା ନିସର୍ଗ ଉତର ପୁର୍ବ ଦେଇ ଆଗକୁ ବଢିବା ପରେ ହରିହରେଶ୍ୱର ଏବଂ ଦମନ ମଧ୍ୟରେ ଗତିକରିପାରେ । ଉତର ମହାରାଷ୍ଟ୍ର ଏବଂ ଗୁଜୁରାଟର ସମୁଦ୍ରରେ ଜୁନ୍ ୩ତାରିଖ ସକାଳ କିମ୍ବା ରାତିରେ ପହଂଚିପାରେ ।
Kanak News is now on WhatsApp
Join and get latest news updates delivered to you via WhatsApp
ବାତ୍ୟା ବିପଦକୁ ଦୃ୍ଷ୍ଟିରେ ରଖି ମୁମ୍ବାଇ ଏବଂ ଗୁଜୁରାଟର ସମୁଦ୍ର କୂଳିଆ ଅଂଚଳରେ ରହୁଥିବା ଲୋକଙ୍କୁ ସ୍ଥାନାନ୍ତର ପ୍ରକ୍ରିୟା ଆରମ୍ଭ ହୋଇଛି । ମତ୍ସ୍ୟଜୀବୀଙ୍କୁ ସମୁଦ୍ରକୁ ଯିବା ପାଇଁ ବାରଣ କରାଯାଇଛି । ମୁମ୍ବାଇରେ ମତ୍ସ୍ୟଜୀବୀମାନେ ସେମାନଙ୍କ ମାଛଧରା ବୋଟ ଗୁଡ଼ିକୁ ସମୁଦ୍ର କୂଳକୁ ଆଣୁଥିବାର ଦେଖିବାକୁ ମିଳିଛି । ଲୋକଙ୍କୁ ସତର୍କତାର ସହ ରହିବା ପାଇଁ ନିର୍ଦ୍ଦେଶ ଦିଆଯାଇଛି । ଏହା ସହ ପରିସ୍ଥିତିର ମୁକାବିଲା ପାଇଁ ଏନଡ଼ିଆରଏଫ ଟିମ୍କୁ ମୁତୟନ କରାଯାଇଛି । ବାତ୍ୟା ନିସର୍ଗ ପ୍ରଭାବରେ ପ୍ରବଳ ବର୍ଷା ଏବଂ ପବନ ହେବାର ସମ୍ଭାବନା ରହିଛି । ଯଦି ଝଡ଼ବାତ୍ୟା ଭୟଙ୍କର ରୁପ ନିଏ ତେବେ ଘଂଟା ପ୍ରତି ୧୦୫ରୁ ୧୧୫ କିଲୋମିଟରରେ ପବନ ବହିବାର ସମ୍ଭାବନା ରହିଛିି । ଜୁନ୍ ୪ତାରିଖ ସଂଧ୍ୟାରେ ବାତ୍ୟା ଦୁର୍ବଳ ହେବା ବେଳକୁ ଘଂଟା ପ୍ରତି ୬୦ରୁ ୭୦ କିମି ପବନ ବହିପାରେ ।
ଗୃହମନ୍ତ୍ରୀ ଅମିତ ଶାହ ବାତ୍ୟା ନିସର୍ଗକୁ ନେଇ ଜରୁରୀ ବୈଠକ କରିଛନ୍ତି । ଏହି ବୈଠକରେ ଏନଡ଼ିଆରଏଫ ସମେତ ଅନ୍ୟ ବିଭାଗ ମଧ୍ୟ ସାମିଲ ହୋଇଥିଲେ । ନିସର୍ଗକୁ ନେଇ ଗୁଜରାଟ ମୁଖ୍ୟମନ୍ତ୍ରୀ ବିଜୟ ରୂପାନି ଓ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ସହ ଆଲୋଚନା କରିଛନ୍ତି ଗୃହମନ୍ତ୍ରୀ ଅମିତ ଶାହ । ସାମୁଦ୍ରିକ ଝଡର ମୁକାବିଲା ପାଇଁ କେନ୍ଦ୍ର ସବୁ ପ୍ରକାରର ସହାୟତା ଯୋଗାଇବ ବୋଲି ଆଶ୍ୱସନା ଦେଇଛନ୍ତି ଗୃହମନ୍ତ୍ରୀ ।